E Mafai e le Tusi Paia Ona Suia Olaga

O LE Ā le mea na manatu se tamāloa mai i Sikotilani e sili ona tauia, nai lo o se galuega faapisinisi e taulau manuia? O le ā na fesoasoani i se tamāloa mai i Pasili ina ia lafoaʻi lona olaga lē mamā, ma le faaaogāina o fualaau faasāina? Na faapefea i se tamāloa mai i Slovenia ona tuua lana masaniga o le inu seʻia tau i le ua? Faitau i a latou tala.

“Na foliga mai sa sologa lelei loʻu olaga.”—JOHN RICKETTS

TAUSAGA FANAU: 1958

ATUNUU: SIKOTILANI

TALAAGA: FAIPISINISI TAULAU MANUIA

OLAGA SA IAI: Sa lelei loʻu olaga a o ou tuputupu aʻe. E masani ona siitia solo lo matou aiga ona sa maualuga le tulaga o loʻu tamā i le vaegaau a Peretania. E ese mai i le atunuu o Sikotilani, sa matou nonofo i Egelani, Siamani, Kenya, Meleisia, Aialani, ma Kuperu. I le valu o oʻu tausaga, na ou alu ai i aʻoga nofotumau i Sikotilani. Na mulimuli ane faauu aʻu mai i le Iunivesite i Cambridge.

O le 20 o oʻu tausaga na amata ai ona ou faigaluega i se pisinisi suāuu mo le valu tausaga. I le taimi muamua, sa ou faia lenei galuega i Amerika i Saute, ona sosoo lea ma Aferika, ae faaiʻu i Ausetalia i Sisifo. Ina ua ou siitia atu i Ausetalia, sa faatū ai loa saʻu pisinisi e faafaigaluega ai tupe, lea na mulimuli ane ou faatauina ese atu.

O le tupe sa ou maua mai i le faatauina ese atu o lenā pisinisi, na mafai ai ona ou mālōlō litaea i le 40 o oʻu tausaga. Sa ou faaaogā loʻu taimi e faimalaga solo ai. E faalua ona ou taamilo i Ausetalia i laʻu pasika, ma sa ou faimalaga foʻi i le lalolagi atoa. Na foliga mai sa sologa lelei loʻu olaga.

SUIA E LE TUSI PAIA LOʻU OLAGA: Ae ou te leʻi mālōlō mai i laʻu galuega, sa ou manaʻo e iai se auala ou te faafetai ai i le Atua mo le olaga lelei sa ou ola ai. Na amata ona ou alu i le Lotu Egelani lea sa masani ona ou auai ai a o ou laʻitiiti, ae o le tele o a latou aʻoaʻoga e lē mai i le Tusi Paia. Ona sosoo lea ma le matou suʻesuʻe ma le Mamona, ae sa mou atu loʻu fiafia ona e seāseā ona latou faaaogā le Tusi Paia.

I se tasi o aso, na asiasi mai ai ni Molimau a Ieova i loʻu fale. Na vave lava ona ou iloa e faavae a latou aʻoaʻoga mai i le Tusi Paia. O se tasi o mau sa latou faamatala mai iā te aʻu, o le 1 Timoteo 2:3, 4. O loo taʻua i lenā mau, e finagalo le Atua ina ia “faaolaina ituaiga uma o tagata, ma ia maua le poto saʻo i le upu moni.” Na ou maofa ona na faailoa mai e Molimau le poto saʻo e faavae mai i le Tusi Paia.

O le suʻesuʻeina o le Tusi Paia ma Molimau a Ieova na fesoasoani iā te aʻu ina ia maua le poto  saʻo. O se faaaʻoaʻoga, na ou aʻoaʻoina ai, o le Atua ma Iesu e lē o se vaega o le misitelio lilo o le Tolutasi, ae e eseese i laʻua. (Ioane 14:28; 1 Korinito 11:3) Na ou matuā fiafia ina ua ou aʻoaʻoina lenā upu moni. Ae i le taimi e tasi, sa ou lē fiafia i le maʻimau o le tele o le taimi na alu, e taumafai ai e malamalama i se aʻoaʻoga sesē e faigatā ona malamalama i ai!

E leʻi umi ae ou auai i sauniga a Molimau a Ieova. Na faafiafiaina aʻu ona o uiga faaleuō o tagata, ma le maualuluga o a latou tapulaa tau amio. Na pei i latou o ni tagata paia. O lo latou alofa moni, na ou talitonu ai ua ou maua le tapuaʻiga moni.—Ioane 13:35.

AOGĀ IĀ TE AʻU: Ina ua uma ona ou papatiso, sa ma feiloaʻi ai loa ma se tamaʻitaʻi lalelei e igoa iā Diane. Sa ola aʻe o ia o se Molimau a Ieova, ma e tele ni ona uiga lelei sa ou fiafia i ai. E leʻi umi ae ma faaipoipo, ma o lana lagolagosua ua avea o se faamanuiaga tele mai iā Ieova.

Na ma naunau ma Diane ina ia ō atu i se oganuu o loo manaʻomia tele ai tagata talaʻi o le tala lelei o le Tusi Paia. I le tausaga 2010, na ma siitia atu ai i Belize, i Amerika Tutotonu. O i ina na ma talaʻi atu ai i tagata e alolofa i le Atua ma e mananaʻo e iloa atili o ia.

O le iloaina o le upu moni e uiga i le Atua ma lana Afioga le Tusi Paia, ua ou maua ai le filemu o le mafaufau. I le avea ma faifeʻau faataimi atoa, ua ou maua le olioli i le aʻoaʻoina o le toʻatele e uiga i le Tusi Paia. E leai se mea e sili atu ona lelei nai lo o le vaai atu o faaleleia e upu moni o le Tusi Paia le olaga o se tasi, e pei foʻi ona faaleleia ai loʻu olaga. O lea la, ua ou maua le auala sili e faafetai ai i le Atua mo le olaga lelei ua ou fiafia ai.

“Na latou agalelei mai iā te aʻu.”—MAURÍCIO ARAÚJO

TAUSAGA FANAU: 1967

ATUNUU: PASILI

TALAAGA: OLAGA LĒ MAMĀ

OLAGA SA IAI: Na ou ola aʻe i Avaré, o se tamaʻi taulaga i le setete o São Paulo. O le toʻatele o tagata e iai i inā, o ni tagata faigaluega.

Na maliu loʻu tamā a o maʻitaga loʻu tinā iā te aʻu. A o ou laʻitiiti, e masani ona ou ofu i ofu o loʻu tinā pe a alu e tafao. Na amata ona ou fiafia i uiga faafafine, ma na manatu ai tagata iā te aʻu o se faafāfine po o se tauatane. E leʻi umi ae ou faia feusuaʻiga ma tama ma tamāloloa.

Ina ua lata i le 20 o oʻu tausaga, a ua faigofie iā te aʻu le saʻilia o nisi e matou te faia feusuaʻiga (tama po o teine) i so o se mea lava, e pei o pa pia, fale kalapu, ma e oo lava i le lotu. Pe a oo i taimi o faafiafiaga, ou te faia ni ofu e pei o se teine ma ou siva a o alu le savali a se aʻoga e aʻo ai le siva o le samba, ma sa taʻutaʻua tele ai aʻu.

O aʻu uō o ni tauatane, o ē e faia faiga faatalitane, ma ē e faaaogāina fualaau faasāina. O nisi o i latou na taaʻina aʻu e faaaogā le crack cocaine (fualaau faasāina), ma e leʻi umi ae ou fiafia i ai. O nisi o taimi ou te faaesea ai aʻu lava ma faaaogāina le crack cocaine i le aso atoa. Sa ou matuā paee lava, ma na fai ai e nisi ni tala e faapea ua maua aʻu i le faamaʻi o le AIDS.

 SUIA E LE TUSI PAIA LOʻU OLAGA: O le taimi lea na matou feiloaʻi ai ma Molimau a Ieova. Na latou agalelei mai iā te aʻu. O se tasi o mau na latou faitauina mai iā te aʻu o le Roma 10:13, lea e faapea mai: “E faaolaina i latou uma o ē e valaau i le suafa o Ieova.” Na faamamafa mai e na upu iā te aʻu le tāua o le faaaogā o le suafa o Ieova. O le tele o taimi pe a uma ona ou ulaina crack cocaine i le pō atoa, ou te tatala loʻu faamalama, vaavaai i le lagi ma tatalo iā Ieova ma loimata, ma augani atu iā te ia ina ia fesoasoani mai iā te aʻu.

Sa ou popole i si oʻu tinā o lē na matuā faanoanoa lava, a o vaavaai mai i le auala o loo oʻu faaleagaina ai aʻu lava i fualaau faasāina. O le māfuaaga lea na faia ai laʻu faaiʻuga ina ia tuu lea masaniga. O lea na ou talia ai loa se suʻesuʻega faale-Tusi Paia ma Molimau a Ieova. Na latou faamautinoa mai iā te aʻu, o le a fesoasoani aʻu suʻesuʻega i le Tusi Paia, e faamalosia ai laʻu faaiʻuga ina ia tuu le faaaogāina o fualaau faasāina, ma o le mea moni lenā na tupu!

A o faaauau ona ou suʻesuʻeina le Tusi Paia, na ou iloa ai e tatau ona suia loʻu olaga. Na matuā faigatā ona tuua oʻu uiga faatauatane, auā ua umi tele ona ou faia nei faiga. Peitaʻi, o se tasi o mea na fesoasoani iā te aʻu, o le suia lea o loʻu siʻomaga. Na ou lē toe faauō atu i aʻu uō sa iai, ma na ou lē toe alu i ni pa pia po o ni fale kalapu.

E ui lava e leʻi faigofie ona faia nei suiga, ae na ou maua le faamāfanafanaga i le iloaina o loo manatu mamafa mai Ieova, ma o loo ia silafia mea ua ou lē taulau ai. (1 Ioane 3:19, 20) O le tausaga e 2002, na ou lē toe faia ai ni faiga faatauatane, ma na papatisoina ai aʻu i lenā tausaga e avea ma Molimau a Ieova.

AOGĀ IĀ TE AʻU: Na matuā maofa loʻu tinā i nei suiga, ma ia suʻesuʻe ai loa i le Tusi Paia. O le taimi lea, ua mafatia ai loʻu tinā ina ua pē le isi itu o lona tino, ae na faaauau pea ona ia atiaʻe le alofa mo Ieova ma le upu moni o le Tusi Paia.

I tausaga e valu ua mavae, na ou auai ai i le auaunaga faataimi atoa, ma faaalu le tele o loʻu taimi e aʻoaʻo ai isi e uiga i le Tusi Paia. O le mea moni, e iai taimi ou te tauivi ai ma faanaunauga lē talafeagai, ae e faamāfanafanaina aʻu i le iloa, e mafai ona ou faafiafiaina le finagalo o Ieova pe afai ou te lē lolo atu i nei faanaunauga.

O le mafuta vavalalata atu iā Ieova ma le ola i se auala e faafiafia ai o ia, ua ou maua ai le olioli. Ua avea aʻu i aso nei o se tane fiafia.

“O aʻu o se paelo e mama.”—LUKA ŠUC

TAUSAGA FANAU: 1975

ATUNUU: SLOVENIA

TALAAGA: INU SEʻIA TAU I LE UA

OLAGA SA IAI: Na ou fanau i le laumua o Slovenia o Ljubljana. Na fiafia lava loʻu olaga a o ou laʻitiiti seʻia oo i le fā o oʻu tausaga, ina ua pule loʻu tamā i lona soifua. O lenei tulaga mataʻutia, na tatau ai ona faigaluega loʻu tinā ina ia tausia i maʻua ma loʻu uso matua.

O le 15 o oʻu tausaga na ou nofo ai i le tinā o loʻu tinā. Sa ou fiafia i le nonofo faatasi ma ia ona e toʻatele aʻu uō e nonofo i lenā vaipanoa. Sa tele  foʻi loʻu saʻolotoga nai lo o le taimi sa ou iai ma loʻu tinā. O le 16 o oʻu tausaga na amata ai ona ou faauō atu i tagata e fiafia e inu pia i le faaiʻuga o le vaiaso. Na faauumi loʻu lauulu, amata ona ou ofu i se auala e faailoa atu ai o aʻu o se tagata fouvale, ma mulimuli ane fai ma aʻu masaniga le ulaula.

E ui ina ou faaaogāina fualaau faasāina eseese, ae na sili ona ou fiafia i le inu, ma e leʻi mafai ona ou tuua. E leʻi umi ae faateteleina laʻu inu mai i ni nai ipu uaina, i le inuina o le fagu atoa i le taimi e tasi. Na ou poto tele e nanā loʻu onā, ma e masani lava e na o laʻu mānava e iloa ai sa ou inu. Peitaʻi, e leai ma se tasi e iloa ua ou inuina le ova atu ma le fā lita o le pia, uaina, po o se fagu malosi foʻi na sui.

O le tele o taimi, ou te fesoasoani ai e tau taʻitaʻi isi o aʻu uō ua onanā pe a uma mai se siva, e ui lava e faaluaina le tele o le ʻava malosi sa ou inuina nai lo o i latou. I se tasi o aso, sa ou lagona atu ai o faapea mai se tasi o aʻu uō, o aʻu o se paelo e mama, o se faaupuga faalumaluma i le gagana Slovenia, e ave i se tagata e sili atu lana inu i lo o se isi lava. Na matuā tigā lava loʻu loto i lenā tala.

Na amata ona ou mafaufau po o le ā le mea o loo oʻu faia i loʻu olaga. Na matuā faatumulia aʻu i faalogona lē aogā. E foliga mai e leai ma se uiga o mea uma o loo oʻu faia i loʻu olaga.

SUIA E LE TUSI PAIA LOʻU OLAGA: O le taimi lea na ou mātauina ai ni suiga i se tasi o tamaitiiti o laʻu vasega, ma ua avea o sē e agamalu. O loʻu fia iloa o le māfuaaga ua sui ai o ia, na ou valaaulia ai o ia e ma te ō i se faleʻaiga. A o ma talanoa, sa ia faamatala mai iā te aʻu o lea ua amata ona ia suʻesuʻeina le Tusi Paia ma Molimau a Ieova. Na ia faasoa mai iā te aʻu nisi o mea na ia aʻoaʻoina, ma sa matuā fou na mea iā te aʻu, auā e leʻi aʻoaʻoina lava aʻu i le Tusi Paia a o ou tuputupu aʻe. Na amata loa ona ou auai i sauniga a Molimau ma suʻesuʻe le Tusi Paia ma i latou.

O le suʻesuʻeina o le Tusi Paia na ou iloa ai le tele o upu moni e uunaʻia ai. O se faaaʻoaʻoga, na ou iloa ai o loo tatou ola i taimi o loo taʻua i le Tusi Paia “o aso e gata ai.” (2 Timoteo 3:1-5) Na ou iloa ai foʻi e lē o toe umi ona aveesea lea e le Atua o tagata leaga mai i le lalolagi, ae avatu i tagata lelei le avanoa e olioli ai i le ola e faavavau i le Parataiso. (Salamo 37:29) Na ou lagona se faanaunauga malosi e faamamā loʻu olaga ina ia avea aʻu o se tagata lelei.

Na amata ona ou taʻu atu i aʻu uō upu moni o le Tusi Paia ia ua ou aʻoaʻoina. O le toʻatele o i latou na tauemu mai iā te aʻu ona o aʻoaʻoga na ou faamatala atu, ma o le auala na tali mai ai, na ou mautinoa ai e lē o i latou o ni aʻu uō moni. O lea na ou iloa ai, o laʻu masaniga o le inu tele na aafia ai le auala na filifilia ai aʻu uō. A o faagasolo le vaiaso atoa, e latou te tulimataʻia le faaiʻuga o le vaiaso e inu ma onanā ai.

Na motusia aʻu faauōga ma i latou, ae faia ni faauōga e atiaʻe ai ma Molimau a Ieova. O le auaufaatasi ma i latou sa matuā faalaeiauina ai aʻu, ona o i latou o ni tagata e alolofa faamaoni i le Atua, ma o loo taumafai e ola e tusa ai ma ana tapulaa. Na faasolosolo mālie lava ona ou tuua laʻu masaniga o le inu e tau i le ua.

AOGĀ IĀ TE AʻU: Ou te matuā lotofaafetai iā Ieova ona ua ou lē toe manaʻomia le ʻava malosi e faafiafia ai aʻu. Ou te lē iloa po o fea semanū ou te iʻu i ai pe ana ou faaauau pea i loʻu olaga sa iai. Peitaʻi, ou te matuā talitonu lava ua sili atu loʻu olaga i le taimi lenei.

I tausaga e fitu ua mavae, na ou maua ai le faaeaga e auauna i le ofisa o le lālā o Molimau a Ieova i Slovenia. O le iloaina ma le auauna atu iā Ieova ua ou maua ai le fiafia moni i loʻu olaga.