O Faamaoniga ua Leva Ona Natia i Tel Arad

O se aai na leiloa. O se malumalu lilo. O ni faaputuga o tusitusiga anamua na nātia. Atonu e manatu nisi e talafeagai lenei tala mo se ata tifaga. E lē gata i lea, o nei mea uma ma isi mea na natia mo le tele o senituri i lalo o faaputuga oneone i Tel Arad, i Isaraelu, ae faatoʻā maua lava ina ua amata eli e tagata suʻesuʻe lenā vaipanoa.

I ASO nei, ua manatu le toʻatele o tagata asiasi i Arata ua na o se tasi o taulaga masani o Isaraelu. E 27,000 tagata e nonofo ai, ma e tū i le vao o Iutaia i le itu i sisifo o le Sami Mate. Peitaʻi, o le aai anamua o Isaraelu o Arata, na tū i le pe ā ma le lima maila (8 kilomita) i le itu i sisifo. O i inā la na eliina ai e tagata suʻesuʻe faaputuga oneone, ma maua ai le tele o toega o fale ma tusitusiga.

O nei tusitusiga na maua i toega o ipu omea lea na faaaogā mo tusitusiga. O le tusitusi i luga o nei mea o se faiga masani lea i vaitaimi o le Tusi Paia. O eligāmea i Tel Arad, ua faamatalaina o faaputuga o fasi ipu omea e aupito i tele ia na mauaina i Isaraelu. Ae o le ā le tāua o lenei eligāmea mai anamua?

O mea na maua i Tel Arad o loo aofia ai se taimi tele o le talafaasolopito o le Tusi Paia, e mai le taimi o Faamasino o Isaraelu seʻia oo mai i le taimi na osofaʻia ai e ʻau a Papelonia ia Iuta i le 607 T.L.M. Ua mafai la e nei mea na maua ona faamaonia ai le saʻo aʻiaʻi o le Tusi Paia. Ua aumaia ai foʻi se faaaʻoaʻoga mataʻina o le auala na vaai ai tagata o Isaraelu anamua i le suafa totino o le Atua.

Arata ma le Tusi Paia

E moni e lē tele se faamatalaga a le Tusi Paia e faatatau iā Arata. Na pulea e lenei aai e lelei lona tulaga ia auala autū mo fefaatauaʻiga. E lē o se mea e ofo ai la le faapea mai o talafaasolopito ma toegamea na maua, o le nofoaga nei mai anamua, na fai ma faatoʻilaloina, faaumatia, ma toe fausia aʻe a o faagasolo ona vaitau lelei ma lē lelei foʻi. O le faaauau ona  toe fausia aʻe o lenei aai ua faia aʻe ai le tel, po o se aai maupuʻepuʻe telē.  

Sa muaʻi faasino atu le Tusi Paia iā Arata a o faamatala le vaega faaiʻu o le 40 tausaga o le savaliga a le nuu o Isaraelu i le vao. E leʻi leva ona maliu Arona le uso o Mose, ae taulalata atu loa tagata o le Atua i le itu i saute o le tuaoi o le Nuu o le Folafolaga. Sa manatu le tupu Kanana o loo i Arata e faigofie ona faatoʻilaloina nei tagata ua leva ona savavali i le vao. Sa ia osofaʻia loa i latou. Ona o le fesoasoani a Ieova le Atua mo le nuu o Isaraelu, na latou toe tau atu ai, ma manumalo aʻiaʻi ai ma faaumatia atoatoa Arata, ae na sao mai ai lava nai tagata.—Numera 21:1-3.

Na vave ona toe fausia e Kanana lo latou aai; ina ua taunuu Iosua i lenā vaipanoa i nai tausaga mulimuli ane ai, na ia amata osofaʻi mai le itu i mātū seʻia aveesea uma tagata Kanana mai “atu mauga, ma le itu i toga,” ma o se tasi o ē na faatautee ane “o le tupu o Arata.” (Iosua 10:40; 12:14) Mulimuli ane, o suli o Opapo le sa Kenī, o ē na lagolagoina ma nonofo faatasi ma tagata Isaraelu a o iai i le vao, na latou nonofo i le itu i toga.—Faamasino 1:16.

Toegamea Anamua na Eli Aʻe

Pe a oo mai i nisi o mea na tutupu mulimuli ane i vaitaimi o le Tusi Paia, e mataʻina mea na maua i toegamea i Tel Arad e lagolagoina ai nei faamatalaga. O se faataʻitaʻiga, na maua e tagata suʻesuʻe se faasologa o pā puipui. O nisi o nei mea e mai le taimi o le nofoaiga a le tupu o Solomona, o lē na lauiloa i le fausiaina o le tele o aai. (1 Tupu 9:15-19) O se tasi o eligāmea o loo faamaonia ai le faaumatiaga e ala i le afi, ma o loo faapea na tupu i le amataga o le senituri lona sefulu T.L.M. E ōgatusa na mea na maua ma le taimi o le osofaʻiga a le tupu o Aikupito o Seseka, i le lima tausaga mulimuli ane talu ona maliu Solomona. I Karnak i Aikupito i saute, o loo i ai se pā o loo faamanatu ai lenā osofaʻiga ma o loo lisiina ai Arata i le tele o aai ua mou atu.—2 Nofoaiga a Tupu 12:1-4.

O se isi mea mataʻina o le tele o taʻega ipu omea, pe ā ma le 200 o nei taʻega ipu omea o loo iai ni tusitusiga, o loo iai ni igoa Eperu o loo maua i le Tusi Paia, e pei o Pasura, Meremota, ma atalii o Koru. O nisi o nei faamaumauga e sili atu ona tāua, ona e maua ai le suafa totino o le Atua. O loo faia aʻe i mataʻitusi Eperu e fā יהוה (YHWH), e masani ona taʻua o le Tetakalamatone, ma e tutasi lenei suafa mo le Atua e ou le Malosi Uma Lava. Mulimuli ane ona o uputuu, ua talitonu ai le toʻatele o le taʻua po o le tusia o le suafa o le Atua o se lē faaaloalo lea. E ui i lea, o mea na maua i Tel Arad e pei o isi mea, o loo faamaonia ai i vaitaimi o le Tusi Paia na saʻoloto le faaaogāina o le suafa o le Atua i aso taʻitasi, i faafeiloaʻiga, ma faamanuiaga. O se faataʻitaʻiga, o se tasi o nei tusitusiga o loo faapea mai: “Mo loʻu matai o Elyashib. Ia fesoasoani atu Yahweh [Ieova] iā te oe. . . O loo ia nofo i le malumalu o Yahweh.”

Ae faapefea le malumalu lilo na taʻua muamua? O se toega o se fale i Tel Arad ua tele ai fefaaaliaʻiga o manatu o se toega o se  malumalu, o loo iai ma se fata faitaulaga, mai le vaitaimi o Iutaia. E ui e laʻitiiti mamao lea malumalu i le malumalu o Solomona i Ierusalema, ae e tele mea e tutusa ai. Aiseā ma o anafea na fausia ai le malumalu o Arata? Na faapefea ona faaaogāina? E na o le taumatemate lava le mea e mafai ona fai e tusitala o talafaasolopito ma tagata suʻesuʻe.

Na faatonuina ma le manino e Ieova, o le malumalu i Ierusalema ua na o le pau lea o le nofoaga o le a ia taliaina ai le faamanatuina o aso faamanatu ma le ofoina atu o taulaga. (Teuteronome 12:5; 2 Nofoaiga a Tupu 7:12) Na fausia le malumalu i Arata e faatautee atu ai i le Tulafono a le Atua, atonu i se vaitaimi na tele ai ni fata faitaulaga ma ni tū faalotu, lea na taaʻina ese ai le toʻatele mai le tapuaʻiga mamā. (Esekielu 6:13) I lenā tulaga, o lenā nofoaga mo tapuaʻiga sesē, atonu na faaumatia aʻiaʻi e Esekia po o Iosia i le senituri lona valu ma le fitu T.L.M.—2 Nofoaiga a Tupu 31:1; 34:3-5, 33.

O lea la, o sina talafaasolopito o Arata na sao mai, e i ai ni lesona tāua tatou te aʻoaʻoina mai ai. I lalo o le faaputuga oneone mo le tele o senituri, ua maua ai ni toegamea e faamaonia ai le saʻo aʻiaʻi o le Tusi Paia, o loo tusia ai le tulaʻi mai ma le toe mou atu o tapuaʻiga sesē, ma o loo maua ai ni faaaʻoaʻoga o le faaaogāina o le suafa o Ieova i aso taʻitasi i se auala faaaloalo.

[Faafanua/Ata i le itulau 23]

(Tagaʻi i le lomiga mo le ata atoa)

IERUSALEMA

Sami Mate

Arata

Tel Arad

[Ē Ana le Ata]

Pictorial Archive (Near Eastern History) Est.

[Ata i le itulau 24]

Se vaaiga i le pā puipui i Karnak, i Aikupito

[Ē Ana le Ata]

Pictorial Archive (Near Eastern History) Est.

[Ata i le itulau 25]

O loo faapea mai se vaega o nei tusitusiga: “Ia fesoasoani atu Yahweh [Ieova] iā te oe”

[Ē Ana le Ata]

Photograph © Israel Museum, Jerusalem; courtesy of Israel Antiquities Authority

[Ata i le itulau 25]

Se vaega o le malumalu i Tel Arad, o faaalia mai ai le fata faitaulaga

[Ata i le itulau 25]

O se vaaiga o le ʻolo i Tel Arad mai le itu i sasaʻe

[Ē Ana le Ata i le itulau 25]

Todd Bolen/Bible Places.com