Natano—O Sē e Lagolagoina ma le Faamaoni le Tapuaʻiga Mamā

E lē faigofie le taumafai e faatalitonu se tamāloa o loo iai le pule e faapea, e piʻopiʻo ona ala ma e manaʻomia ona toe faasaʻo. Pe e mafai ona e feutagaʻi ma se tasi ua e iloa na ia fasiotia se isi, ina ia lē taʻuleagaina ai o ia?

Sa tō Patesepa ona o le mulilua sa la faia ma Tavita, le tupu o Isaraelu anamua. Ina ia ufiufi le la agasala, sa fafau e Tavita le fasiotia o le tane a Patesepa ma ave o ia e fai ma ana avā. Ua mavae le tele o masina ma sa ola o ia i se olaga uigalua, ma e mautinoa sa faaauau pea ona faia ona tiute tautupu. Ae e leʻi tuua e Ieova agasala a Tavita e aunoa ma le faailoaina atu. Sa ia auina atu lana perofeta o Natano ina ia feutagaʻi ma Tavita.

E leʻi faigofie lenei tulaga. Seʻi tuu oe i le tulaga o Natano. E mautinoa o le faamaoni iā Ieova ma le pipiimau i ana tapulaa, sa uunaʻia ai Natano e faamanatu atu iā Tavita ana agasala. O le a faapefea ona faia e Natano lenei mea, ma faatalitonu le tupu o Tavita e manaʻomia ona ia salamō?

SE FAIAʻOGA FAAUTAUTA

Ia faaalu ni nai minute e faitau ai i le 2 Samuelu 12:1-25. Seʻi mafaufau o oe lea ua i le tulaga o Natano, a o e faamatala atu iā Tavita lenei tala: “Sa iai ni tagata se toʻalua i le tasi aai, e mauʻoa le tasi, ae e mativa le isi. Sa matuā tele mamoe ma povi a le tagata mauʻoa; ae e leai se mea a le tagata mativa, e na o le tasi lava le tamaʻi mamoe fafine na ia faatauina mai. Sa tausia e le tamāloa o ia, ma ola aʻe faatasi ma ia ma ona atalii. Sa ʻai o ia i fasi meaʻai a le tamāloa, sa inu foʻi mai i lana ipu, sa taoto o ia i lona fatafata, ma sa pei lava o se afafine o le tamāloa. Mulimuli ane, ua alu ane se tagata e asiasi i le  tamāloa mauʻoa, ae e na te leʻi avea sana mamoe po o sana povi, e sauni ai se meaʻai a le tagata malaga ua alu atu iā te ia. A ua ia ave le tamaʻi mamoe fafine a le tagata mativa, ma sauni ai se meaʻai a le tagata na alu atu iā te ia.”—2 Samu. 12:1-4.

Na manatu Tavita o sē na avea ma leoleo mamoe, o lenei tala o se mea moni lava na tupu. Ua faapea mai se tagata faitofā o le Tusi Paia: “Atonu na masani ona alu Natano iā Tavita ina ia talosaga atu e toe faaleleia tulaga o i latou ua faileagaina, ona e leai se isi e mafai ona fesoasoani iā i latou, ma atonu na mafaufau Tavita o le māfuaaga lenā na alu atu ai Natano.” E tusa lava po o le tulaga lenā, ae na manaʻomia e Natano le faamaoni i le Atua ma le lototele, ina ia talanoa atu ai i le tupu e pei ona ia faia. Na matuā ita Tavita i le tala na faamatala atu e Natano ma faapea mai: “O loo soifua Ieova, e tatau ona oti le tagata ua faia lenei mea!” Ona taʻu saʻo atu lea e Natano e faapea: “O oe lava le tagata!”—2 Samu. 12:5-7.

Seʻi mafaufau i le auala na taulima ai e Natano le faafitauli. E faigatā mo se tagata ona mafaufau lelei i lona tulaga ua iai, pe afai ua iai ni ona faalogona mo le isi tagata. O i tatou uma lava e masani ona faia ni faamolemolega, ina ia taʻutonuina ai i tatou pe afai ua lē talafeagai a tatou gaoioiga. Ina ua taʻusalaina le tagata lea na taʻua i le talafaatusa a Natano, e leʻi iloa e Tavita ua ia taʻusalaina o ia lava. Na iloa lelei e le tupu le leaga o le amio a le tagata lea na faamatala atu e Natano. Peitaʻi, ina ua uma ona taʻusalaina e Tavita lenā amioga, ona faailoa atu loa lea e Natano, o loo faatatau atu le talafaatusa i le tupu o Tavita. Ua iloa nei e Tavita le matuiā o lana agasala, ma ua faasagatonu ai lona mafaufau ina ia talia aʻoaʻiga. Na faailoa mai i ana amioga sa faia ma Patesepa lona “ʻinoʻino” iā Ieova, ma sa ia talia le aʻoaʻiga na manaʻomia.—2 Samu. 12:9-14; Sala. 51, ulutala.

O le ā e tatou te aʻoaʻoina mai i lenei mea? O le sini o se faiaʻoga o le Tusi Paia, o le fesoasoani lea i le tagata faalogo ina ia iloa le faaiʻuga talafeagai. Na faaaloalogia e Natano Tavita ma na ia feutagaʻi ma ia i se auala faautauta. Na iloa lelei e Natano le naunau moni o Tavita i le amiotonu ma le faamasinotonu. O lea, na ia faaaogā ai se talafaatusa e iai sona aafiaga iā Tavita, o lē sa iai nei uiga faale-Atua. E mafai foʻi ona tatou fesoasoani i tagata faamaoni taʻitoʻatasi, ina ia malamalama i le silafaga o le Atua. E faapefea? E ala i le taulaʻi atu i o latou lagona i le mea saʻo, e aunoa ma le mafaufau e sili atu i tatou i tulaga tau amio ma le faaleagaga, nai lo o lenā tagata. O le manatu o le Tusi Paia e faailoa mai ai iā i tatou le mea e saʻo ma le mea sesē, ae e lē o o tatou lava manatu.

E sili atu nai lo o se isi lava mea, o le faamaoni i le Atua na mafai ai e Natano ona faasaʻo se tupu malosi. (2 Samu. 12:1) O lenā faamaoni, o le a tatou maua ai le lototele e pipiimau ai i mataupu silisili amiotonu a Ieova.

O SĒ E LAGOLAGOINA LE TAPUAʻIGA MONI

E foliga mai e uō lelei Natano ma Tavita, ona sa faaigoa e Tavita se tasi o ona atalii iā Natano. (1 No. 3:1, 5) O le taimi muamua lava na taʻua ai Natano i le Tusi Paia, sa faatasi o ia ma Tavita. Na alolofa uma i laʻua iā Ieova. E faamaonia le faatuatuaina e Tavita o le perofeta o Natano, e ala i lona faailoa atu o lona faanaunauga, ina ia fausia se malumalu mo Ieova. Na faapea atu Tavita: “ʻVaai! o loo oʻu nofo i le fale arasi, ae o loo tuu le atolaau a le Atua moni i totonu o faleʻie.’ Ona fai mai lea o Natano i le tupu: ʻO mea uma ua e finagalo i ai, inā alu ia ma fai, auā o loo faatasi Ieova ma oe.’”—2 Samu. 7:2, 3.

I le avea ma tagata tapuaʻi faamaoni o Ieova, na naunau Natano e lagolagoina le fuafuaga a Tavita ina ia fausia se malumalu muamua i le lalolagi, e avea ma taulaʻiga o le tapuaʻiga moni. Peitaʻi, e tusa ai ma lenā mea, e foliga mai na faailoa atu e Natano lona lava manatu e aunoa ma le faailoa atu o le finagalo o Ieova. I lenā lava pō, na faatonuina ai e le Atua le perofeta ina ia taʻu atu i le tupu se isi feʻau e ese: E lē fausia e Tavita le malumalu o Ieova ae o le a fausia e lona atalii. Na faailoa atu e Natano ua osia e le Atua se feagaiga ma Tavita e faapea, o le a “matuā faatumauina . . . i aso uma” lana nofoaiga.—2 Samu. 7:4-16.

E leʻi ōgatusa le finagalo o le Atua ma le manatu o Natano e tusa ai ma le fausia o le malumalu. Peitaʻi, e aunoa ma le muimui, sa lolo atu lenei perofeta lotomaulalo i le fuafuaga a Ieova ma usiusitaʻi iai. Maʻeu se faaaʻoaʻoga lelei e mulimuli iai pe a faasaʻo i tatou e le Atua! O gaoioiga a Natano na  faaalia ai lona mauaina pea o le finagalo malie o le Atua. O le mea moni, e aliali mai na faagaeeina e Ieova Natano, faapea ai ma Kato le faamatala faaaliga, ina ia taʻitaʻia Tavita e faamaopoopo se ʻaufaimusika e 4,000 mo le auaunaga i le malumalu.—1 No. 23:1-5; 2 No. 29:25.

O SĒ E PUIPUIA LE TULAGA TAUTUPU

Na iloa e Natano o Solomona lea o le a avea ma tupu e sosoo atu iā Tavita. Na gaoioi ma le maumauaʻi Natano ina ua ia iloa le faufauga a Atonia ina ia faoa le nofoālii, a o faasolo ina vaivai Tavita. Na faaalia ai foʻi i gaoioiga a Natano lona faautauta ma le faamaoni. Na ia uunaʻia Patesepa e faamanatu iā Tavita lana taʻutinoga, ina ia avea la la tama o Solomona ma tupu. Ona ulufale atu lea o Natano i le mea o loo iai le tupu, ma fesili atu pe na ia faamaonia le avea o Atonia ma lē e sosoo atu iā te ia i le tulaga tautupu. I le iloaina o le matuiā o lenei tulaga, na faatonu loa e le tupu Natano ma isi auauna faamaoni ina ia faauuina Solomona, ma faailoa atu o ia o le tupu. Na faalēaogāina le fouvalega a Atonia.—1 Tu. 1:5-53.

SE TUSITALA O TALAFAASOLOPITO E LĒ FAAMAUALUGA

E masani ona taʻua Natano ma Kato o ē na tusia mataupu e 25 e oo i le 31 o le 1 Samuelu, ma le tusi lona lua atoa a Samuelu. Ua faapea mai talafaasolopito faagaeeina o loo taʻua i le Tusi Paia: “A o le olaga uma o le tupu o Tavita, o mea muamua ma mea mulimuli, ua tusia ia i le tala a Samuelu le tagata e iloa faaaliga, o tala a Natano le perofeta, ma tala a Kato lē e faamatalaina faaaliga.” (1 No. 29:29) Na faamauina foʻi e Natano faamatalaga e faatatau i “le olaga uma o Solomona.” (2 No. 9:29) E foliga mai, na faaauau pea ona auauna Natano i le maota o le tupu, ina ua mavae le maliu o Tavita.

O le tele o mea e tatou te iloaina e faatatau iā Natano, atonu na tusia e le perofeta lava ia. Peitaʻi, e tele foʻi isi mea e mafai ona tatou iloa e faatatau iā te ia, ona o mea e na te leʻi tusia. O Natano e lē o se tusitala o talafaasolopito e faamaualuga, ma e leʻi faanaunau e taʻutaʻua o ia. I se lomifefiloi faale-Tusi Paia, o loo taʻua ai o ia i se faamaumauga faagaeeina, ae “e leai se faamatalaga e faatatau iā te ia ma le talaaga o lona aiga.” E leai se mea e tatou te iloa e faatatau i le talaaga o le gafa o Natano, po o lona olaga.

UUNAʻIA E LE FAAMAONI IĀ IEOVA

E ala mai i nai faamatalaga o loo i le Tusi Paia e faatatau iā Natano, e manino mai ai o ia o se tagata e lotomaulalo, ae e galue mamafa e puipui faatulagaga uma a le Atua. Na tuuina atu e Ieova le Atua ni tiute tauave faigatā iā te ia. Ia manatunatu loloto i uiga lelei o Natano e pei o le faamaoni i le Atua, ma le talisapaia loloto o mea e na te faafinagaloina. Ia taumafai malosi e faaaʻoaʻo i na uiga.

Atonu e lē tofia oe e faasaʻo se tupu ua mulilua, pe e faalēaogā se faufauga leaga a se tasi e faoa se tulaga tautupu. Peitaʻi, e ala i le fesoasoani a le Atua, e mafai ona e faamaoni iā te Ia, ma tumau i ana tapulaa amiotonu. E mafai foʻi ona avea oe ma faiaʻoga o le upu moni e lototele, ae i le taimi e tasi e faautauta, ma o sē e lagolagoina le tapuaʻiga mamā.

[Ata i le itulau 25]

I le avea ma sē e puipuia le tulaga tautupu, na talanoa atu ma le faautauta Natano iā Patesepa