“E Faape‘ī la Outou Amio e tatau Ona Iai!”
“E Faapeʻī la Outou Amio e tatau Ona Iai!”
“Talu ai o le a mavae atu nei mea uma, ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua!”—2 PETE. 3:11.
1. Aiseā na avea ai le tusi lona lua a Peteru ma faalaeiauga na fetaui lelei i Kerisiano i ona aso?
INA ua tusi e Peteru lana tusi faagaeeina lona lua, e tele sauāga ua onosaia e le faapotopotoga Kerisiano, ae e leʻi faaitiitia ai le maelega ma le tuputupu aʻe o le faapotopotoga. O lea, na faaaogā ai e le Tiapolo se isi metotia sa taulau i le tele o taimi ua mavae. E pei ona faailoa mai e Peteru, na taumafai Satani e faaleagaina tagata o le Atua e ala i aʻoaʻo pepelo o ē “ua naunau tele i latou i le mulilua” ma “ua masani o latou loto i le manaʻo tele.” (2 Pete. 2:1-3, 14; Iuta 4) E tusa ai ma lenei tulaga, ua avea ai le tusi lona lua a Peteru ma faalaeiauga e tumau ai i le faamaoni.
2. O le ā o taulaʻi atu i ai le 2 Peteru mataupu e 3, ma o ā fesili e tatou te fesili ifo ai iā i tatou?
2 Na tusi Peteru: “Ua tonu i loʻu manatu, a o ou iai pea i lenei faleʻie, ia ou faamalosiau atu iā te outou i loʻu faamanatu atu, auā ua ou iloa e toeitiiti ona tuueseina lea o loʻu faleʻie . . . O lea, ou te faia ai foʻi le mea aupito i sili i taimi uma lava, ma pe a ou alu ese, e mafai ona outou faamanatu nei mea iā te outou.” (2 Pete. 1:13-15) Ioe, sa iloa e Peteru ua lata lona maliu, ma sa ia manaʻo ia manatua pea ana faamanatu talafeagai. Ua avea na faamanatu ma vaega o le Tusi Paia ua mafai ona tatou faitau i ai i aso nei. O le mataupu e 3 o le tusi lona lua a Peteru e faapitoa ona tatou naunau i ai, ona o loo taulaʻi atu i “aso e gata ai” o lenei faiga o mea, ma le faaumatiaga o le lagi ma le lalolagi faafaatusa. (2 Pete. 3:3, 7, 10) O le ā le fautuaga ua aumaia e Peteru mo i tatou? E faapefea i le faatatauina o lana fautuaga ona fesoasoani iā i tatou ia maua le finagalo malie o Ieova?
3, 4. (a) O ā faamatalaga faaoso naunau na faia e Peteru, ma o le ā le lapataʻiga na ia taʻu mai? (e) O ā manatu e tolu o le a tatou iloiloina?
3 Ina ua uma ona taʻua e Peteru le tafiesea o le lalolagi a Satani, ona faapea mai lea o ia: “E faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua!” (2 Pete. 3:11, 12) E manino mai, e na te leʻi lāgā se fesili ae na ia faia se faamatalaga faaoso naunau. Sa iloa e Peteru e na o i latou e faia le finagalo o Ieova ma amioaʻi e tusa ma amioga e fiafia ai o ia, o le a faasaoina i le “aso [o le] tauimasui.” (Isa. 61:2) O lea, na fai mai atili le aposetolo: “O le mea lea, o outou le ʻaupele e, ona ua outou muaʻi iloa lenei mea, ia outou leoleo ai iā te outou ina neʻi taʻitaʻieseina outou e i latou [aʻoaʻo pepelo] i le sesē o tagata solitulafono, ma outou paʻuʻū ai mai i lo outou tutū maumauaʻi.”—2 Pete. 3:17.
4 Na iloa e Peteru i aso e gata ai, e tatau i Kerisiano o ē ua “muaʻi iloa” mea, ona leoleoina faapitoa i latou ina ia tausia lo latou faamaoni. Mulimuli ane, na faamatala manino mai e le aposetolo o Ioane le māfuaaga. Na ia vaaia Satani ua lafo ifo mai le lagi ma ua “lotoa tele” faasaga i “ē o loo tausi i poloaʻiga a le Atua, ma faia le galuega o le molimau atu e uiga iā Iesu.” (Faaa. 12:9, 12, 17) O le a manumalo auauna faauuina faamaoni a le Atua ma a latou aumea o “isi mamoe.” (Ioa. 10:16) Ae faapefea i tatou taʻitoʻatasi? Po o le a tumau ea lo tatou faamaoni? E mafai ona tatou tumau pe afai e tatou te matuā tauivi e (1) atiaʻe uiga faale-Atua, (2) tumau ona leai se ila ma ia lē ponā i amio ma le faaleagaga, ma (3) ia iai se vaaiga saʻo i puapuaga. Seʻi o tatou iloiloina la nei manatu.
Atiaʻe Uiga Faale-Atua
5, 6. O ā uiga e ao ona tatou tauivi e atiaʻe, ma aiseā e manaʻomia ai ni “taumafaiga filigā”?
5 I le amataga o lana tusi lona lua, na tusi Peteru: “Ona o lo outou faia o taumafaiga filigā e tali atu ai, o le mea lea ia outou faaopoopo ai i lo outou faatuatua le amiolelei, ia faaopoopo i la outou amiolelei le poto, ia faaopoopo i lo outou poto le amio pulea, ia faaopoopo i la outou amio pulea le tumau, ia faaopoopo i lo outou tumau le faamaoni i le Atua, ia faaopoopo i lo outou faamaoni i le Atua le alofa i le ʻauuso, ia faaopoopo i lo outou alofa i le ʻauuso le alofa. Auā afai e iai nei mea iā te outou ma ua tele foʻi, e taofia ai outou ina neʻi outou paiē ma lē fua mai, e tusa ai ma le poto saʻo i lo tatou Alii o Iesu Keriso.”—2 Pete. 1:5-8.
6 E moni, e manaʻomia “taumafaiga filigā” ina ia faia se sao i galuega e fesoasoani iā i tatou e atiaʻe ai uiga faale-Atua. O se faataʻitaʻiga, e manaʻomia taumafaiga ina ia auai i sauniga uma faa-Kerisiano, faitauina o le Tusi Paia i aso taʻitasi, ma le faatumauina pea o se masaniga lelei i le faia o suʻesuʻega a le tagata lava ia. Ma e ono manaʻomia foʻi ona galulue mamafa faatasi ai ma se faasologa lelei, i le faia e lē aunoa o le Tapuaʻiga a le Aiga i le afiafi ina ia fiafia ma uigā ai. E avea loa ma a tatou masaniga lelei lenā mea, o le a lē toe avea ma faafitauli lenā tulaga—aemaise lava pe a tatou tofo i ona aogā.
7, 8. (a) O ā faamatalaga a nisi e uiga i le Tapuaʻiga a le Aiga i le afiafi? (e) E faapefea ona e maua aogā mai le tapuaʻiga a le aiga?
7 Na tusi se tuafafine e tusa ai ma le faatulagaga o le tapuaʻiga a le aiga: “Ua mafai ai ona matou aʻoaʻoina le tele o mataupu.” Na faapea mai le isi: “Ou te taʻutino atu, ou te leʻi manaʻo e faamuta le suʻesuʻega tautusi. E ese ma loʻu fiafia i ai. Ae ona o lea ua iai le Tapuaʻiga a le Aiga i le afiafi, ua ou manatu ai o loo silafia lava e Ieova o tatou manaʻoga ma le taimi e manaʻomia ai.” Sa taʻua e le ulu o se aiga: “Ua telē se fesoasoani a le tapuaʻiga a le aiga iā i maʻua. E ese le manaia o le iai o se suʻesuʻega e fetuunaʻi i o ma manaʻoga o se ulugalii! Ua ma lagona le iai o ni faaleleiga i le faaalia o le fua o le agaga paia, ma ua sili atu lo ma fiafia i le faiva i lo le taimi muamua.” O le tala lenei a se tasi ulu: “E fai lava e le fanau a latou saʻiliʻiliga ma aʻoaʻoina ai le tele o mea, ma e latou te fiafia tele i ai. O lenei faatulagaga ua sili atu ai ona matou mautinoa o loo silafia e Ieova mea o loo matou popole ai, ma tali mai i a matou tatalo.” Po o faapena ou lagona e faatatau i lenei sauniuniga matagofie faaleagaga?
8 Aua le faatagaina ni nai mea laiti e faalavelavea ai le tapuaʻiga a le aiga. Na faapea mai se ulugalii faaipoipo, “O aso tofi uma lava i vaiaso e fā ua tuanaʻi, na iai se mea na tupu i lo ma aiga na toetoe lava a lē faia ai le suʻesuʻega, ae na ma maumauaʻi lava e fai.” E moni, e iai taimi e ono fetuunaʻi ai lau faasologa. Ae ia maumauaʻi pea e aua neʻi iai se vaiaso e misia ai le Tapuaʻiga a le Aiga i le afiafi!
9. Na faapefea ona tausia e Ieova Ieremia, ma o le ā e tatou te aʻoaʻoina mai i lana faaaʻoaʻoga?
9 Ua avea le perofeta o Ieremia ma faaaʻoaʻoga lelei mo i tatou. Sa ia manaʻomia le tausiga faaleagaga mai iā Ieova ma sa ia matuā talisapaia. O lenā tausiga na mafai ai ona ia talaʻi ma le onosaʻi i tagata e leʻi tali lelei mai. Na ia faapea mai, “Ua avea le afioga a Ieova . . . ua pei o se afi e mumū o loo punitia i totonu o oʻu ivi.” (Iere. 20:8, 9) Sa fesoasoani foʻi iā te ia e onosaia ai taimi faigatā lea na faaiʻuina i le faaumatiaga o Ierusalema. I aso nei, o lea ua tatou mauaina le Tusi Paia atoa. Pe afai e tatou te suʻesuʻe ma le filigā ma vaai i mea e pei ona silasila i ai le Atua, o le a pei foʻi i tatou o Ieremia, e mafai ona onosaʻi ma olioli i le faiva, tumau ma le faamaoni i puapuaga, ma tausia pea le mamā tau amio ma le faaleagaga.—Iako. 5:10.
Tumau Ona ‘Leai se Ila ma ia Lē Ponā’
10, 11. Aiseā e tatau ai ona tatou finafinau e tumau ia ‘leai se ila, ma ia lē ponā,’ ma o le ā e manaʻomia mai iā i tatou?
10 Ona o i tatou o Kerisiano, ua tatou iloa lelei ua tatou ola i le taimi o le iʻuga. O le mea lea, e lē faateʻia ai i tatou i tulaga leaga ua iai le lalolagi i mea e inosia e Ieova e pei o le matapeʻapeʻa, feusuaʻiga lē talafeagai, ma sauāga. E mafai ona taaofaʻi faufauga a Satani i upu nei: ‘Afai e lē mafai ona faamataʻuina auauna a le Atua, atonu e mafai ona faaleagaina a latou amio.’ (Faaa. 2:13, 14) O lea la, e tatau ai ona teulotoina faalaeiauga alofa a Peteru: “Ia outou finafinau ai ina ia maua mai outou e [le Atua] e leai so outou ila, e lē ponā, ma e filemu.”—2 Pete. 3:14.
11 O le faaupuga “ia outou finafinau” e talitutusa ma le faalaeiauga muamua a Peteru e manaʻomia “taumafaiga filigā.” O le mea moni, o Ieova sa faagaeeina Peteru e faailoa mai na faamatalaga—e silafia e ia e manaʻomia ona tatou taumafai malosi e tumau ina ia ‘leai so tatou ila, ma lē ponā,’ ia lē faaleagaina i mea leaga o le lalolagi a Satani. O le taumafai malosi, e aofia ai le leoleoina o o tatou loto mai le maileia i faanaunauga sesē. (Faitau le Faataoto 4:23; Iakopo 1:14, 15.) E aofia ai foʻi le tūmausalī faasaga iā i latou e faateʻia ona o le auala faa-Kerisiano o loo tatou ola ai ma “faia tala leaga e uiga iā te [i tatou].”—1 Pete. 4:4.
12. O le ā le faamautinoaga ua tatou maua i le Luka 11:13?
12 Ona o lo tatou tino agasala, e lē faigofie ai ona faia le mea saʻo. (Roma 7:21-25) E pau lo tatou faamoemoega e taulau manuia ai, o le liliu atu lea iā Ieova o lē foaʻi mai ma le agalelei le agaga paia i ē o loo talosaga moni atu i ai. (Luka 11:13) O lenā agaga, e faatupuina iā i tatou uiga lea e maua ai le faamaoniga a le Atua, ma fesoasoani e feagai ai e lē gata i tofotofoga o le olaga, ae faapea foʻi ma puapuaga lea e mafai ona faatupulaʻia a o lalata mai le aso o Ieova.
Ia Faamalosia Ona o Puapuaga
13. O le ā e fesoasoani iā i tatou e tumau ai, pe a tutupu puapuaga o le olaga?
13 O le umi lava e tatou te ola ai i lenei faiga tuai o mea, o lo tatou feagai foʻi lenā ma puapuaga eseese. Ae nai lo le lotovaivai ai, ia vaai i puapuaga o se avanoa e faamautinoa atu ai lou alofa mo le Atua, ma faamalosia ai lou faatuatua iā te ia ma lana Afioga. Na tusi le soo o Iakopo: “Oʻu uso e, ia outou manatu o se mea e olioli tele ai, pe a outou fesagaʻi ma tofotofoga eseese. Ua outou iloa, o le tofotofoina o lo outou faatuatua, e iʻu ina outou tumau ai.” (Iako. 1:2-4) Ia manatua, “e silafia e Ieova le auala e laveaʻi ai tagata e faamaoni iā te ia mai i o latou puapuaga.”—2 Pete. 2:9.
14. E faapefea i le faaaʻoaʻoga a Iosefa ona faalaeiauina ai oe?
14 Seʻi manatu i le faaaʻoaʻoga a Iosefa le atalii o Iakopo, o lē sa faatauina atu e ona lava uso e fai ma pologa. (Kene. 37:23-28; 42:21) Pe na mou atu le faatuatua o Iosefa ona o le agaleagaina o ia? Pe na ita ai i le Atua ona o lenā tulaga leaga na oo iā te ia? E manino le tali o loo i le Tusi Paia, e leai! E leʻi muta ai i inā puapuaga o Iosefa. Mulimuli ane, sa faafalepuipui ona o se moliaga lē saʻo faapea na taumafai e fai se faigāaiga fai faamalosi. Peitaʻi, na tumau pea lona faamaoni i le Atua. (Kene. 39:9-21) Sa avea puapuaga ma mea e faamalosia ai o ia, ma iʻu ai ina tauia o ia i faamanuiaga.
15. O le ā e tatou te aʻoaʻoina mai i le faaaʻoaʻoga a Naomi?
15 O le mea moni, e tatou te faanoanoa ma mafatia pe a tutupu puapuaga. Atonu o faalogona na o Iosefa sa iai i nisi taimi. Sa faapena foʻi isi auauna faamaoni a le Atua. Ia manatu foʻi iā Naomi, lea na maliliu uma lana tane ma lana fanau tama e toʻalua. Sa ia faapea mai. “Aua neʻi taʻua aʻu o Naomi. Ia taʻua aʻu o Mara, [o lona uiga, o le “Oona”], auā ua matuā oona mea ua faia e Lē e ona le malosi uma lava iā te aʻu.” (Ruta 1:20, 21) E malamalama lava la le uiga o le tala a Naomi, o faalogona masani na faaletagata. Sa pei o ia o Iosefa, e leʻi mou atu lona faatuatua ma lona faamaoni. Na tauia e Ieova lenā tinā pele. (Ruta 4:13-17, 22) E lē gata i lea, i le lalolagi parataiso o loo fotuaʻi mai, o le a ia aveesea mea leaga uma na faapogaia e Satani ma lana lalolagi amioleaga. “E lē toe manatua mea sa iai muamua, e lē toe alu aʻe foʻi i le loto.”—Isa. 65:17.
16. O le ā lo tatou uiga e faatatau i le tatalo, ma aiseā?
16 E tusa lava po o ā faafitauli e oo iā i tatou, ae o le alofa o le Atua e tatou te tumau ai. (Faitau le Roma 8:35-39.) O le a lē taofia e Satani lona taumafai e faavaivaia i tatou, ae o le a ia lē taulau pe afai e tumau ona tatou “mafaufau lelei” ma “mataala i le faia o tatalo.” (1 Pete. 4:7) Na fetalai Iesu: “O lea la, ia mataala pea, ma ia faatoga atu i taimi uma, ina ia outou sao mai i nei mea uma o le a oo mai, ma ia tutū i luma o le Atalii o le tagata.” (Luka 21:36) Mātau mai, sa faaaogā e Iesu le upu, “faatoga” o se ituaiga tatalo e faia faatauanau. O le faalaeiauina o i tatou i le faia o faatoga, sa faamamafa ai e Iesu faapea, e lē o se taimi lenei e faatalalē ai i la tatou faiā ma ia ma lona Tamā. E na o i latou lava ua iai i se tulaga faamaonia o le a faamoemoe e faasaoina i le aso o Ieova.
Ia Maelega i le Auaunaga iā Ieova
17. Pe afai o avea le talaʻiga i lau oganuu ma luʻitau, e faapefea ona e maua aogā mai i faaaʻoaʻoga lelei a perofeta i aso anamua?
17 O le faia o se sao i gaoioiga faaleagaga e faafouina ai i tatou. E manatua ai upu a Peteru faapea: “E faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua!” (2 Pete. 3:11) O le talaʻia o le tala lelei o le galuega aupito sili lea ona tāua. (Mata. 24:14) E avea o se luʻitau le talaʻia o le tala lelei i nisi o oganuu, atonu ona o le lē ano mai po o le tetee, ia pe ona ua pisi naʻuā tagata i mea masani o le olaga. Sa feagai foʻi auauna a Ieova i aso anamua ma uiga faapena. E ui i lea, e leʻi solomuli ai mai le faaauau ona latou ō atu “pea lava pea” ma le feʻau mai le Atua. (Faitau le 2 Nofoaiga a Tupu 36:15, 16; Iere. 7:24-26) O le ā sa fesoasoani ina ia latou tumau ai? Sa latou vaai i lo latou tofiga e pei ona silasila i ai Ieova, ae lē o le vaaiga faaletagata. E lē gata i lea, sa latou manatu o se faaeaga mamalu le molimau i le suafa o Ieova.—Iere. 15:16.
18 O le ā se aafiaga o le galuega talaʻi o le Malo i le faamamaluina o le suafa o le Atua i le lumanaʻi?
18 Ua tatou maua foʻi le faaeaga o le faalauiloaina o le suafa o Ieova ma lona finagalo. Seʻi mafaufau i le mea lenei: O la tatou galuega talaʻi, o le a lē mafai ai e fili o le Atua ona faapea atu, e leʻi faalogo iā te Ia ma ana fuafuaga pe a Ia aumaia lona aso tele ma le mataʻutia. I le pei o Farao anamua, o le a latou iloa o Ieova lea o loo faasagatau atu iā i latou. (Eso. 8:1, 20; 14:25) I le taimi lava e tasi, o le a faamamaluina e Ieova ana auauna faamaoni, e ala i le matuā faamautinoa atu o i latou moni lava o ona sui.—Faitau le Esekielu 2:5; 33:33.
19. E faapefea ona faaalia e tatou te mananaʻo e faaaogā tatau le onosaʻi o Ieova?
19 I le faaiʻuiʻuga o lana tusi lona lua, sa tusi atu ai Peteru i ona uso talitonu: “Ia manatunatu foʻi o le onosaʻi o lo tatou Alii ua maua ai le faaolataga.” (2 Pete. 3:15) O lea, seʻi o tatou faaauau pea ona faaaogā tatau le onosaʻi o Ieova. E faapefea? E ala i le atiaʻe o uiga e fiafia i ai o ia, ia tumau ona “leai se ila ma ia lē pona,” ia iai se vaaiga saʻo i puapuaga, ma ia pisi pea i le auaunaga o le Malo. O le faia faapea, e mafai ai ona tatou maua faamanuiaga e fesootaʻi atu i le “lagi fou ma le lalolagi fou.”—2 Pete. 3:13.
E te Manatua?
• E faapefea ona tatou atiaʻe uiga faale-Atua?
• E faapefea ona tatou tumau ia “leai se ila ma ia lē ponā”?
• O le ā e mafai ona tatou aʻoaʻoina mai iā Iosefa ma Naomi?
• Aiseā e avea ai o se faaeaga sili le faia o se sao i le galuega talaʻi?
[Fesili mo le Suʻesuʻega]
[Ata i le itulau 9]
O le ā e fesoasoani iā te outou tane ma o outou aiga i le atiina aʻe o uiga faale-Atua?
[Ata i le itulau 10]
O le ā tatou te aʻoaʻoina mai le auala na feagai ai Iosefa ma puapuaga?