Faauuga Lona 124 a Kiliata

Ua Faatusaina Misionare i sē Akerise

I LE taʻiono masina, e fai ai se polokalame o le faauuga a le Aʻoga Faale-Tusi Paia a le Olomatamata o Kiliata, ma e valaaulia ai le aiga Peteli atoa i le Iunaite Setete. Iā Mati 8, 2008, na auai atu ai mālō mai le sili atu i le 30 atunuu e auai faatasi ma le aiga Peteli i le faauuga o le vasega e 124 o le Aʻoga o Kiliata. Sa olioli faatasi le aofia e 6,411 ma tagata aʻoʻoga i lo latou aso faapitoa.

Sa tatalaina le polokalame i le lauga a Stephen Lett o se sui o le Vaega Pule lea na taʻitaʻifono o le polokalame i lana lauga na faamatuaina, “Ia Agaʻi i Luma Faatasi ma Sē Akerise Faafaatusa a Ieova.” O loo faatusa e le Faaaliga 9:1-4 le vaega toaitiiti o Kerisiano faauuina o ē na manumalo mai le lē gaoioi faaleagaga i le 1919 i se vaega tele o sē akerise lea ua lolofi ane ma gaoioi loa. Sa toe faamanatu i tagata aʻoʻoga le avea o i latou ma vaega o “isi mamoe,” ua latou auaufaatasi ma lenei vaega tele o sē akerise faafaatusa.—Ioa. 10:16.

Na sosoo ai ma le lauga a Lon Schilling, o se sui o le Komiti o le Lālā i le Iunaite Setete, i lana lauga “Ia Avea Oe ma se Fesoasoani Malosi.” Sa faavaeina i se faaaʻoaʻoga mai le Tusi Paia iā Akula ma Pisila (po o Piseka), o se ulugalii Kerisiano faaipoipoina mai le uluaʻi senituri. (Roma 16:3, 4) E 28 ulugalii faaipoipoina sa iai i lea vasega i Kiliata. Sa toe faamanatu atu iā te i latou, a latou fia taulau o ni misionare, e manaʻomia ona faamalosia sootaga o le faaipoipoga. E leai ma se taimi na faasino atu ai le Tusi Paia iā Akula e aunoa ma le taʻua o lana avā, o Pisila. Sa vaai le aposetolo o Paulo ma le faapotopotoga iā i laʻua o se tino e tasi po o se ulugalii faaipoipo. O lea la, e tatau i ulugalii misionare i aso nei ona galulue faatasi, tapuaʻi faatasi, ma fesagaʻia faatasi luʻi o le auauna i atunuu ese, ma felagolagomaʻi o le tasi i le isi.—Kene. 2:18.

O le lauga na sosoo ai, “Ia Tali Atu i le Agalelei o Ieova” na tauaaoina e se sui o le Vaega Pule o Guy Pierce. Na faapea mai le uso o Pierce, e tele atu mea e aofia i le faia o mea lelei nai lo le ʻalofia o le faia o mea leaga. O se tagata e lelei e na te faia mea e aogā mo isi. E aupito i maualuga ma atoatoa le tulaga lelei o Ieova le Atua. (Saka. 9:16, 17) E mafai ona uunaʻia i tatou e fai mea lelei mo isi ona o le lelei ma le alofa o le Atua. I lona faamālō atu i le ʻau aʻoʻoga, na faaiʻu upu a le uso o Pierce i lona faapea atu: “Sa sologa lelei a outou taumafaiga. Matou te mautinoa o le a faaauau ona outou tali atu i le agalelei o le Atua, e ala i le faia o mea lelei i so o se tofiga e tuuina atu e Ieova le Atua i le lumanaʻi.”

Sa sosoo ai ma Michael Burnett, o lē na avea muamua ma misionare a o lea ua tofia nei o se faiaʻoga a Kiliata, sa ia tauaaoina le lauga na faamatuaina, “Ia Tuu Lenei Pale i le va o Ou Mata.” Ua pei ua latou faia se “pale” i le va o latou mata, e ao ona manatua e tagata Isaraelu le vavega lea na laveaʻia ai e Ieova i latou mai Aikupito.  (Eso. 13:16) Sa apoapoaʻiina tagata aʻoʻoga ina ia manatua le tele o aʻoaʻoga na maua i le Aʻoga i Kiliata, ua pei o loo tuuina se pale i le va o latou mata. Sa faamamafa e le uso o Burnett le manaʻomia ona agamalu ma lotomaulalo, ma faatatauina taʻiala o le Tusi Paia pe a soālaupule ni feeseeseaʻiga ma isi misionare faapea ma isi.—Mata. 5:23, 24.

Sa tauaaoina e Mark Noumair o sē ua leva ona faiaʻoga i Kiliata, le lauga ua faamatuaina “O le ā le Ituaiga Pese o le a Peseina mo Oe?” I aso anamua, o se tū masani le usuina o se pese e faailoa ai le manumalo i se taua. O se tasi o na pese na faaalia ai i lumamea le lē fia fesoasoani o ituaiga o Reupena, Tanu, ma Asera, a o le ituaiga o Sepulona na viiviia i latou mo lo latou agaga faataulagaina na faaalia. (Faama. 5:16-18) I le pei o upu o se pese, e iʻu ina faaalia i lumamea gaoioiga a se Kerisiano. O le maelega o se tagata i le galuega a le Atua, ma faamaoni  pea i faatonuga o loo aumaia i le faalapotopotoga a Ieova, o le a ia atiaʻe ai se igoa lelei ma Ieova, ma auauna o se faaaʻoaʻoga lelei i ona uso. A o faalogologo isi o le faapotopotoga i pese faafaatusa o loo tusia e a tatou gaoioiga, o le a uunaʻia i latou e faataʻitaʻi i na faaaʻoaʻoga lelei.

Sa faaalu e tagata aʻoʻoga o le vasega e 124 o Kiliata pe ā ma le 3,000 itula i le talaʻiga, auā o se tasi lea o vala o le toleniga. O le matua, “Mulimuli i le Taʻitaʻiga a le Agaga Paia,” sa faamatala atu ai e tagata aʻoʻoga iā Sam Roberson e mai le Matagaluega o Aʻoga Faatiokarate mea na tutupu i le talaʻiga, ma na faataʻitaʻi e isi ia nisi o mea na tutupu. Sa sosoo ai ma le faamatalaina o mea na tutupu e faalaeiau ai ma ni faatalatalanoaga, lea na tauaaoina e Patrick La Franca o le Komiti o le Lālā o le Iunaite Setete o Amerika, ma na aofia ai ma i latou na faauu mai Kiliata ma o loo auauna i atunuu eseese. Na talisapaia e le ʻau aʻoʻoga fautuaga aogā na latou mauaina mai nei uso.

Sa tauaaoina loa e Anthony Morris o le Vaega Pule le lauga faaiʻu, “Ia Manatua, e lē Tumau Mea o Loo Vaaia.” O loo timaʻi mai le Tusi Paia iā te i tatou ia uaʻi atu i faamanuiaga mo le lumanaʻi mai iā Ieova, nai lo le uaʻi atu i ni faafitauli lē tumau o loo tatou fesagaʻia i le taimi nei. (2 Kori. 4:16-18) O le mataʻutia o le mativa, faiga lē tonu, omiga, maʻi, ma le oti o mea moni uma na o loo tatou vaaia i aso nei. E ono fesagaʻi misionare ma nei tulaga mataʻutia. Ae o lo tatou manatua e lē tumau nei mea, o le a fesoasoani iā i tatou e faaauau ona faamuamua Ieova i o tatou olaga ma iloa atu pea le faamoemoe.

Na faaiʻu le polokalame i le ō uma i luga o le pulelaa o le ʻaufaauu ma faalogologo ai i upu faaiʻu a le uso o Lett. Sa ia faalaeiauina i latou e aua le faavaivai, ma ia faapea atu: “E lē mafai ona aveesea lo tatou faamaoni pe a iai Ieova i la tatou itu.” Na ia timaʻi atu i misionare fou ia pei i latou o sē akerise, i le faamalolosi i le auaunaga a Ieova ma tumau le maelega, faamaoni, ma usiusitaʻi e faavavau.

[Pusa i le itulau 30]

FAAMAUMAUGA O LE VASEGA

Aofaʻi o atunuu o loo auai o latou sui: 7

Aofaʻi o atunuu ua tofia i ai: 16

Aofaʻi o tagata aʻoga: 56

Faatatauga o tausaga: 33.8

Faatatauga o tausaga i le upu moni: 18.2

Faatatauga o tausaga i le auaunaga faataimi atoa: 13.8

[Ata i le itulau 31]

Vasega Faauu Lona 124 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taʻitasi.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Ata i le itulau 32]

E tū le Aʻoga o Kiliata i le Nofoaga mo Aʻoaʻoga a le Olomatamata