Good News for People of All Nations

O LE ulutala lenā o le tamaʻitusi na tatalaina i Tauaofiaga Itumalo o Molimau a Ieova “Savavali ma le Atua” i le 2004/2005. O nisi o nei tamaʻitusi, e 96 itulau ma o loo iai se feʻau puupuu i le tele o gagana eseese e tusa ma le 92. Ua lomia lenei tusi e fesoasoani i le faasalalauina o le tala lelei o le Malo i le toʻatele o tagata e mafai ai. (Mataio 24:14) Ua faaalia i tala o loo mulimuli mai mea na tutupu i le faaaogāina o le tamaʻitusi.

• Ina ua maua le tamaʻitusi mai le tauaofiaga, na asiasi atu ai se aiga i ni paka se tolu i lo latou atunuu. Na latou feiloaʻi ai i tagata mai Initia, Filipaina, Pakisitana ma Holani. Na taʻua e le tane: “E ui e feoloolo la latou tautatala i le gagana faa-Peretania, ae na faagaeetia i latou ina ua faaali atu i ai le feʻau i la latou lava gagana, auā sa mamao tele i latou mai i o latou atunuu. Sa latou malamalama i le tulaga o la tatou galuega i le lalolagi aoao aemaise lo tatou autasi.”

• Na faaali e se tasi o Molimau le tamaʻitusi i sē la te faigaluega faatasi mai Initia. Na matuā fiafia o ia i gagana eseese ua iai ma na ia faitauina le feʻau i lana lava gagana. Na mafai ai ona la faia nisi talanoaga i le Tusi Paia. Na matuā maofa se tagata mai Filipaina na faigaluega ma se Molimau, ina ua iloa o loo maua ai lana lava gagana i le tamaʻitusi. Na fiafia o ia e aʻoaʻo atili e uiga i Molimau a Ieova.

• I Kanata, na malie ai se tamaʻitaʻi mai Nepale e suʻesuʻe le Tusi Paia ma se Molimau i le telefoni ae e leʻi manaʻo o ia e alu atu le tuafafine i lona fale. Peitaʻi, ina ua taʻu atu e le Molimau e uiga i le tamaʻitusi o loo iai se feʻau i le gagana Nepale, na fiafia o ia ma valaaulia le tuafafine e alu atu i lona fale. Na ia faitau i le feʻau i lana lava gagana! Talu mai lenā taimi, o loo faia pea se suʻesuʻega faale-Tusi Paia i le fale o lenei tamaʻitaʻi.