Saʻiliga a Tagata e Faafiafia le Atua

“E LEAI lava se atunuu e leʻi faia ai se vaega a le Atua i le puleaina ma le foafoaina. E faapena foʻi i atunuu e feteenaʻi faiga faalotu ma faiga faapolotiki.” O lea, ua faapea mai ai ia John Bowker i lana tusi, God—A Brief History. I se isi itu, ua tele tausaga o faaauau pea ona saʻili tagata ina ia iloa le Atua ma lona finagalo malie. I le lalolagi aoao, e toʻatele ua faanaunau moni lava ina ia faafiafia le Atua. Ae e eseese lava auala ua latou taumafai e faia ai lenei mea e tusa ma o latou talitonuga.

Ua talitonu nisi, e na o le pau lava le auala e maua ai le finagalo malie o le Atua, o le ola lea i se olaga amio lelei. Ua lagona e nisi, e mafai ona latou maua le finagalo malie o le Atua pe a faia ni galuega agalelei mo tagata matitiva. E lē gata i lea, ua faatāua ai e le faitau miliona o tagata ia sauniga ma faiga faalelotu.

I le isi itu, e iai foʻi tagata e talitonu, ua mamao tele le Atua, e lē mafai ona latou oo atu i ai, po ua pisi naʻuā i isi mataupu ua lē manatu mai ai i tagata faatauvaa. Ua taʻua mai le talitonu o Epikuro le fai filosofia Eleni anamua e faapea, ‘e mamao tele ia atua, e lē mafai ona latou faia se mea lelei po o se leaga i le fanau a tagata.’ Ae peitaʻi, o manatu na o le toʻatele o tagata mapo lotu. Ua oo lava ina faia e nisi ia taulaga ma sauniga faalotu ona o le manatu e faamalilie ai o latou tuaā ua maliliu.

O le ā sou manatu? Po o silafia moni e le Atua a tatou taumafaiga ina ia maua lona finagalo malie? Pe e mafai ona aafia le finagalo o le Atua i a tatou gaoioiga ma faafiafia ai o ia?

 [Faamatalaga i Ata i le itulau 2]

FAAVAA: Courtesy of ROE/Anglo-Australian Observatory, photograph by David Malin