PO O oe o se tasi e faaalia le lototalisapaia, po o le lotofaafetai? E manaʻomia e i tatou uma lava ona mafaufau i lenei fesili. Ua valoia i le Tusi Paia o le toʻatele i o tatou aso, “e lē lotofaafetai.” (2 Timo. 3:2) Atonu na e feiloaʻi i ni tagata e latou te faatalitalia isi e faia mea e mananaʻo i ai. E latou te manatu ai, e lē manaʻomia ona lotofaafetai i mea ua latou maua. O lea, e lē lelei le faifaimea faatasi ma nei ituaiga o tagata.

Peitaʻi, ua fautuaina auauna a Ieova: ʻIa faaalia lo outou loto faafetai.’ E tatau ona tatou “faafetai i mea uma lava.” (Kolo. 3:15; 1 Tesa. 5:18) O le mea moni, o le atiaʻe o le lotofaafetai e lelei mo i tatou. E iai māfuaaga e lelei ai.

O se tasi o māfuaaga tāua e atiaʻe ai le lototalisapaia, ona e saosaolaumea i le mauaina o se vaaiga saʻo iā i tatou lava. Pe a faafetai atu se tasi mo se mea ua ia maua, atonu e na te lagona le fiafia, ma e fiafia foʻi lē na faafetai atu i ai. Aiseā e lagona ai e i laʻua uma le fiafia? Ia mātau le faaaʻoaʻoga lenei: Pe a e iloa o loo mananaʻo nisi e fai se mea lelei mo oe, pe e lē taʻu mai ai e tāua oe iā i latou? E latou te manatu mamafa iā te oe. Pe a e iloa lo latou manatu mamafa, o le a faateleina ai foʻi lou mautinoa iā te oe lava. Seʻi manatu i faalogona faapena na oo iā Ruta. Na faaalia e Poasa le agalelei iā Ruta. E mautinoa na matuā fiafia Ruta i lona iloa, o loo iai se tasi o manatu mamafa atu iā te ia.​—Ruta 2:10-13.

E sili atu ona talafeagai le faaalia o le lotofaafetai i le Atua. E mautinoa, e iai taimi e te mafaufau ai i le tele o meaalofa faaleagaga, ma meaalofa faaletino na ia saunia ma o loo faaauau ona ia faia faapea. (Teu. 8:17, 18; Galu. 14:17) Ae nai lo o le tau ina mafaufau i le lelei o le Atua, ia faaalu se taimi e manatunatu loloto ai i le tele o faamanuiaga o loo sasaa mai e Ieova iā te oe, ma ē e pele iā te oe. O le mafaufau loloto i le agalelei o Lē na foafoaina mea, o le a faamalosia ai lou talisapaia o ia, ma faatumau ai lou lagonaina o le tele o lona alofa, ma lona talisapaia o oe.​—1 Ioa. 4:9.

Ia sili atu mea e te faia nai lo o le mafaufau i le agalelei o Ieova, ma manatunatu i ana faamanuiaga. Ia faafetai atu foʻi iā te ia i lona lelei. (Sala. 100:4, 5) Ua faamatalaina e faapea, o le “faaalia o le lotofaafetai o se auala tāua e saosaolaumea ai i le fiafia o tagata.”

O le isi māfuaaga e lelei ai mo oe le lotofaafetai, ona e faamalosia ai faauōga. E tatou te mananaʻo uma e talisapaia i tatou e isi. Pe a e faafetai atu mai i le loto i se tasi ona o ana gaoioiga agalelei, o le a māfana la le lua faiā ma lenā tagata. (Roma 16:3, 4) E lē gata i lea, o tagata e lotofaafetai o ni tagata e lotofesoasoani. E latou te iloa le agalelei e faaalia atu e isi iā i latou, ma o le a uunaʻia ai foʻi i latou e faaali atu le agalelei. Ioe, o le fesoasoani i isi e maua ai le fiafia. E pei ona taʻua e Iesu: “E sili le fiafia e maua i le foaʻi atu i lo o le talia mai.”​—Galu. 20:35.

Na faapea mai Robert Emmons, o se tasi o faatonu o le suʻesuʻega e faatatau i le lotofaafetai, i le Iunivesite a Kalifonia: “O le faaalia o le lotofaafetai e tatau ona tatou malamalama, e manaʻomia e le tasi le fesoasoani a le isi, lea e avea ai i tatou ma ni ē e foaʻi atu i nisi taimi, ae o nisi taimi e tatou te talia  ai foaʻi a isi.” O le mea moni, e tele auala ua tausia ai o tatou manaʻoga ma lagolagoina ai i tatou e isi. O se faaaʻoaʻoga, atonu e latou te fesoasoani mai i meaʻai po o se tausiga faafomaʻi. (1 Kori. 12:21) O le tagata lotofaafetai, e na te faaalia le talisapaia o mea o loo fai atu e isi iā te ia. O lea, po o fai ma au masani le faaali atu i isi o le lotofaafetai, ona o mea o loo latou faia mo oe?

O le isi māfuaaga e tāua ai le atiaʻe o le lotofaafetai, ona e fesoasoani iā te oe ia uaʻi atu ai i mea lelei, nai i lo o mea e lē lelei. O lona uiga, o le a gaoioi lou mafaufau e pei o se faamamā. O lea, o le a mafai ai ona e taulaʻi atu i mea lelei o loo siʻomia ai oe, ae ʻalofia le taulaʻi atu i mea e lē lelei. Pe a e uaʻi atu i mea lelei, o le a e lē soona uaʻi la i faafitauli. O le tele e te faaalia ai le lotofaafetai, o le tele foʻi lenā o lou mātauina o mea lelei, ma o le a matuā faateleina ai lou lotofaafetai. O le iai o se lotofaafetai i le olaga, o le a fesoasoani lea iā i tatou e fai le mea na taʻua e le aposetolo o Paulo: “Ia olioli e lē aunoa i le Alii.”​—Fili. 4:4.

O le lotofaafetai, o le a fesoasoani iā te oe e taofia ai le mafaufau i mea e lē lelei. Pe e faigofie i se tagata ona faaalia le lotofaafetai, ae e lotoleaga, faanoanoa pe ita foʻi? O tagata e lotofaafetai, e masani ona lē mananaʻo tele. E latou te talisapaia mea ua maua, ma e lē taulaʻi atu foʻi i le mauaina o ni mea se tele.​—Fili. 4:12.

Ona o oe o se Kerisiano, ua e iloa la e manaʻo Satani ia e lagona le lē aogā ma le lotovaivai, ona o faigatā o loo e fesagaʻia i nei aso e gata ai. E fiafia tele Satani pe a iā te oe se vaaiga lē saʻo, ma se uiga faitio. O na uiga, o le a faigatā ai ona avea oe ma se tagata maelega i le talaʻiga. O le mea moni, o le lotofaafetai e ō faatasi ma le fua o le agaga o le Atua, e aofia ai le olioli i mea lelei ua foaʻi mai e le Atua, ma le faatuatua i ana folafolaga uma.​—Kala. 5:22, 23.

Ona ua avea oe ma tagata o Ieova, atonu e te ioe i mea o loo taʻua i lenei mataupu e faatatau i le lotofaafetai. Peitaʻi ua e iloa, e lē otometi ona e lotofaafetai ma maua se vaaiga saʻo. Ia aua lava neʻi e lotovaivai ai. E mafai ona e atiaʻe ma faatumauina pea le iai o le lotofaafetai. E faapefea? Ia faaalu se taimi i aso taʻitasi e te mafaufau ai, i vala o lou olaga e te lotofaafetai ai. O le tele e te faia ai faapea, o le faigofie foʻi lenā ona e maua le agaga lotofaafetai. O lea, o le a matuā sili atu ona e fiafia, nai lo o i latou e taulaʻi atu i faigatā o le olaga. Ia mafaufau i mea lelei ua faia e le Atua ma isi, e faalaeiau ai oe ma e maua ai le fiafia. Atonu o le a amata ona e faia ni au faamaumauga. I au faamaumauga, o le a mafai ona e tusia ai ni mea se lua pe tolu na e lotofaafetai ai i lenā aso.

Ua faapea mai nisi na suʻesuʻeina lenei mataupu, “o le faaalia pea o le lotofaafetai, o le a sui ai le auala e gaoioi ai o tatou mafaufau, ina ia faigofie ai ona tatou maua le fiafia i le olaga.” O se tagata e lotofaafetai, o ia foʻi o se tagata e fiafia. O lea, ia mafaufau i faamanuiaga ua e maua, ia fiafia i mea lelei na tutupu i lou olaga, ma ia faaalia pea le lotofaafetai. Nai lo o le manatu māmā i mea lelei ua maua, ʻia faafetai atu iā Ieova, auā e lelei o ia.’ Ioe, “ia faafetai i mea uma lava.”​—1 No. 16:34; 1 Tesa. 5:18.