Le Manatu o le Tusi Paia

O le ā le Uiga Moni o le Tulaga Ulu i le Faaipoipoga?

I LE tele o atunuu, o tū masani i se faaipoipoga e aofia ai le faia o ni taʻutinoga lea e tautō ai le tamaʻitaʻi faaipoipo e usiusitai i le tane. E ui i lea, e toʻatele fafine e lē fiafia i le manatu o le avea o le tane ma ulu i le faaipoipoga. Seʻi mātau le aʻoaʻoga a le Tusi Paia i lenei mataupu. O le a e iloa ai e talafeagai ma e aogā aʻoaʻoga a le Tusi Paia.

Le Tulaga Ulu i le Faatulagaga a le Atua

O le auala o loo faamatala ai le tulaga ulu o loo maua i le Efeso 5:22-24: “O avā, ia gauaʻi atu i a latou lava tane e pei ona gauaʻi atu i le Alii, auā o le tane o le ulu lea o le avā, e pei foʻi o Keriso o le ulu ia o le faapotopotoga . . . O le mea moni, e pei ona gauaʻi le  faapotopotoga iā Keriso, ia faapena foʻi ona gauaʻi avā i a latou tane i mea uma lava.” I le avea ma ‘ulu o le avā,’ e avea le tane ma ulu o le aiga, ma e mulimuli le avā i lana taʻitaʻiga ma faaaloalo i lona tulaga ulu.—Efeso 5:33.

E gata foʻi le pule a le tane auā e usiusitai o ia i le Atua ma Keriso. E leai sana pule e faatonuina ai lana avā e lē usiusitai i tulafono a le Atua, po o le faia o se mea e leaga ai lona lotofuatiaifo lea ua aʻoaʻoina i le Tusi Paia. Peitaʻi, ua tofia e le Atua le tane e fai ma ana tiute tauave le faia o faaiʻuga tāua mo le aiga.—Roma 7:2; 1 Korinito 11:3.

O loo faatonuina e le Tusi Paia le tane ia faaalia lona tulaga ulu i se auala e lē manatu faapito, e ala i le faamuamua o le lelei o lana avā nai lo ia lava. O loo faapea mai le Efeso 5:25: “O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi atu lona ola mo le faapotopotoga.” O se tane e mulimuli i le faaaʻoaʻoga mataʻina a Keriso o le alofa, e na te teena le faaalia o lona tulaga ulu mo lona lava lelei.

E lē gata i lea, o loo faatonuina e le Tusi Paia le tane ina ia feagai ma lana avā “e tusa ma le malamalama.” (1 Peteru 3:7) E tele atu mea e aofia ai nai lo le tau ina malamalama i le eseesega o tino ma faalogona o tamāloloa ma fafine. E tatau ona ia malamalama i manaʻoga o lana avā.

O Ia o Lau Paaga

Pe tatau ona gauaʻi atu le avā i mea uma? Manatu foʻi iā Sara, lea o loo taʻua i le Tusi Paia lana faaaʻoaʻoga i le gauaʻi atu i lana tane, o Aperaamo. (1 Peteru 3:5, 6) Sa ia gauaʻi atu iā te ia i mea laiti ma mea tetele, i le tuua o se fale matagofie ae ola i se olaga maumausolo i faleʻie, ma le saunia faatopetope o se meaʻai. (Kenese 12:5-9; 18:6) E tusa ai ma se mataupu tāua, na faaalia pea e Sara se manatu e feteenaʻi ma le manatu o Aperaamo. Na tupu lenei mea ina ua ia manaʻo e tuliesea le isi avā a Aperaamo, o Akara, ma lona atalii ulumatua, o Isamaeli mai lo latou aiga. Nai lo le aʻoaʻia o Sara, na faatonu e le Atua ia Aperaamo “e usiusitai i ai i lana upu.” Ae na faaauau pea ona gauaʻi atu Sara iā Aperaamo ma faatalitali seʻia gaoioi o ia, nai lo lona taumafai e tuliesea Akara ma Isamaeli.—Kenese 21:8-14.

O le faaaʻoaʻoga a Sara ua faaalia ai, nai lo le tau ina lolo atu i lana tane, e avea le avā ma paaga po o lē o loo “lua māfuta” ma e ao ona faaaloalogia lona tulaga. (Malaki 2:14) I le avea o ia ma paaga a le tane, e tāua tele lana vaega e tusa ma le faia o filifiliga a le aiga, ma e iai foʻi sina pule iā te ia i totonu o le aiga, ma o nisi taimi e na te vaavaaia ai tupe ma isi mea a le aiga. I le avea o le tane ma ulu o le aiga, o lana matafaioi o le faia lea o faaiʻuga mo le aiga.—Faataoto 31:10-31; 1 Timoteo 5:14.

Faaaloalo i Lē na Amataina Faaipoipoga

Na faia e Ieova le Atua le tamāloa ma le fafine, ma na ia amataina faaipoipoga o se faatasiga paia. (Kenese 2:18-24) Na ia faia foʻi ni tiute tauave e patino i le tane ma le avā, lea la te maua ai le fiafiaga sili.—Teuteronome 24:5; Faataoto 5:18.

Ona o Ieova na amataina le faaipoipoga, ua na o ia e iai le aiā ma le tomai e faavaeina ai tapulaa mo lenei faatulagaga. O paaga faaipoipo e fai a latou matafaioi ma mulimuli i le faatulagaga o le tulaga ulu a le Atua, e lē tau ina faapea e aogā, ae ona o le faaaloalo i le pule a le Atua, o le a maua ai lona finagalo malie ma lana lagolagosua.

PO O E TAUMĀNATU EA I NISI TAIMI?

▪ O ai na faataatiaina le faaaʻoaʻoga sili mo le tulaga ulu?—Efeso 5:25.

▪ Pe e iai se mea e faagata ai e le Atua le pule a le tane?—1 Korinito 11:3.

▪ O le ā le fuafuaga o le faaipoipoga ma le faatulagaga o le tulaga ulu?—Faataoto 5:18.

[Ata i le itulau 10]

O le tulaga ulu e faaalia e tusa ma le faaaʻoaʻoga a Keriso, o le a iʻu i le fiafia ma le faamalieina mo paaga uma e lua