Le Manatu o le Tusi Paia

Pe e Iai se Afāina o le Fiasili?

“PE E iai se afāina o le fia ta‘uta‘ua, fia mau‘oa, ma ia pule i mea e tele?” O se fesili lea na ta‘ua i se lipoti mai se faalapotopotoga faalelotu. O le ulutala o lea lipoti, “O To‘atugā Tau Amio.” Na ta‘ua i le lipoti le fetalaiga a le Atua iā Aperaamo i le Kenese 12:2 e faapea: “Ou te faia oe ma nuu tele, ou te faamanuia fo‘i iā te oe, ou te matuā faamamaluina lou igoa.”

Ua fai mai le lipoti “e lē tatau ona avea lo tatou faanaunauga fiasili ma tulaga e leaga ai isi.” Ae o loo ta‘ua ai se rapi po o se faife‘au Iutaia na lauiloa i le ulua‘i senituri lea na fai mai: “Pe afai ou te lē sa‘ilia so‘u lava manuia, o ai e na te faia lea tulaga mo a‘u?” Ona ia faapea mai lea: “A e lē nofo lava oe ma sa‘ili sou lava manuia, e leai se isi e faia lea mea mo oe.” Ae, mo i latou e manana‘o e fai le finagalo o le Atua, pe e lelei le iai o lea faanaunauga, pe leai? O ā mea e aofia ai i le sa‘ilia o lo tatou manuia? E iai se afāina o le faanaunauga fiasili? O le ā le manatu o le Tusi Paia?

Pe na Fiasili Aperaamo?

I le Tusi Paia, ua ta‘ua Aperaamo o se tagata e malosi tele lona faatuatua. (Eperu 11:8, 17) Ina ua folafola e le Atua iā Aperaamo o le a fai o ia ma nuu e tele ma o le a faamamaluina lona igoa, e lē faapea na ia uuna‘ia Aperaamo ia fiasili. Ae na ia faailoa atu iā Aperaamo lana fuafuaga, o le a manuia nuu uma ona ia, ma o lea fuafuaga e sili mamao atu lona tāua na i lo ni faanaunauga fia lauiloa o se tagata.—Kalatia 3:14.

O le faatuatua o Aperaamo i le Atua, na ia tuua ai se olaga sologa lelei ma mau‘oa i Uro. (Kenese 11:31) I se taimi mulimuli ane, ona o le tausiga o le filemu, e le‘i fiasili pe fia pule Aperaamo ae na tuu e pule Lota, le atalii o lona uso, i le laufanua e sili ona lelei e nofo ai. (Kenese 13:8, 9) E aunoa ma se tala i le Tusi Paia e ta‘u mai ai sa iai sea uiga iā Aperaamo. Ae na avea o ia o se “uō” pele a le Atua ona o lona faatuatua, usitai, ma lona loto maulalo.—Isaia 41:8.

Se Vaaiga Ese i le Tulaga Maualuga, Ta‘uta‘ua, ma le Pule

O le fiasili, o lona uiga o le mana‘o tele lea i le tulaga maualuga, lauiloa, ma le pule.  I aso anamua, na iai i le tupu o Solomona le tulaga maualuga, le ta‘uta‘ua, ma le pule, faapea ma ‘oa e tele. (Failauga 2:3-9) Ae o le mea e ao ona mātauina, e lē o lona faanaunauga lenā. Ina ua avea o ia ma tupu, na fetalai atu le Atua iā te ia e ole atu mo so o se mea e mana‘o i ai. Na ia talosaga atu ma le loto maulalo ina ia foa‘i mai le loto matala, ma le tomai e faamasino ai le nuu ua filifilia e le Atua. (1 Tupu 3:5-9) Mulimuli ane, na ia ta‘ua le tele o le ‘oa ma le pule na ia maua, ma na fai mai o ia, “o mea faatauvaa uma lava ia, ma le ‘ai i le matagi.”—Failauga 2:11.

Pe na iai se faamatalaga a Solomona e tusa ai i le mauaina o le taulau manuia o tagata? Ioe. Ina ua māe‘a ona iloilo e Solomona mea na tutupu i lona olaga, o lana faai‘uga e faapea: “Ia e mata‘u i le Atua, ma e anaana i ana poloa‘iga; auā o mea ia e tatau i tagata uma.” (Failauga 12:13) O le auala e manuia moni ai tagata, e lē i ni tulaga maualuluga, ‘oa, le lauiloa, po o le pule, ae i le faia lea o le finagalo o le Atua.

O le Faamaulalo e Faamaualugaina Ai

Ioe, e lē afāina pe afai e iai sina lagona mitamita o le tagata iā te ia lava. Ua poloa‘i mai le Tusi Paia, ia tatou alolofa i o tatou tuaoi e pei ona tatou alolofa iā i tatou lava. (Mataio 22:39) O le natura o le tagata le mana‘o ia sologa lelei ma fiafia lona olaga. Ae ua faalaeiau mai fo‘i le Tusi Paia ia galue mamafa, loto maulalo, ma agamalu. (Faataoto 15:33; Failauga 3:13; Mika 6:8) O tagata e faamaoni, faamoemoeina, ma galulue mamafa, e masani ona mātauina e isi, ma e latou te maua galuega lelei, ma e faaaloalogia e isi. Pe e lē sili ea le faia faapea na i lo le faaaogā o isi mo lo tatou lava lelei, po o le faatavā i isi mo se tulaga maualuga?

Na lapata‘i Iesu i ē na faalogologo atu iā te ia, e tusa o le filifili o nofoaga aloa‘ia pe a auai i ‘aiga o faaipoipoga. O lana fautuaga, ia nofo i se nofoa faatauvaa, ma tuu e faitalia lē pule i le ‘aiga pe valaaulia i se nofoaga aloa‘ia. Na faamatala manino e Iesu le ta‘iala ua aofia ai i lenei mea: “Auā so o sē faamaualuga e ia iā te ia, e faamaulaloina lea; a o lē faamaulalo e ia iā te ia, e faamaualugaina lea.”—Luka 14:7-11.

E Teena e Kerisiano Moni le Fiasili

O loo ta‘ua i le Tusi Paia le sootaga o le fiasili, ma le lē lelei atoatoa faaletagata. (Iakopo 4:5, 6) Sa i le aposetolo o Ioane lenā uiga. O le malosi tele o lea uiga iā te ia na māfua ai ona faamalosi lo la talosaga atu ma lona uso iā Iesu, ia maualuga o la tulaga i le Malo o le Atua. (Mareko 10:37) Na sui le uiga o Ioane mulimuli ane. Auā i lana tusi lona tolu, o loo ia matuā a‘oa‘ia ai lava Tioterifi, o lē na ia ta‘ua o sē e “fia sili.” (3 Ioane 9, 10) O Kerisiano i aso nei, ua latou ave i fale upu a Iesu ma faamaulalo i latou lava. Ua latou faata‘ita‘i fo‘i i le aposetolo matua o Ioane, o lē na teena ona faanaunauga o le fiasili.

O le mea moni lava ia, e lē faapea e avea le iai o taleni, poto, galuega lelei, ma galuega mamafa a se tasi, ma mea e aloa‘ia ai. O nisi taimi e tauia ai i latou e tagata, ae o nisi taimi e leai. (Faataoto 22:29; Failauga 10:7) I nisi taimi, e lē amana‘ia ai i latou e sili ona agavaa, ae avea i latou e itiiti so latou agavaa ma pule. I lenei lalolagi lē lelei atoatoa, e lē faapea e avea le agavaa o se tasi ma mea o le a pule pe tulaga maualuga ai.

I Kerisiano moni, ua lē avea lea uiga ma faafitauli iā i latou. Ua fesoasoani o latou loto fuatiaifo ua a‘oa‘oina i le Tusi Paia ina ia teena le uiga fiasili. Ae ua latou matuā taumafai ia fai le mea sili i so o se tulaga, auā le viiga o le Atua, ma tuu atu iā te ia e pule i le taunuuga e oo i ai. (1 Korinito 10:31) Ua taumafai Kerisiano ia latou manuia e ala i le mata‘u i le Atua ma tausi i ana poloa‘iga.

[Ata i le itulau 14]

Pe na uuna‘ia e le Atua Aperaamo ia fiasili?