Aiseā ua Mou Mālie Atu ai le Alofa?

“E foliga mai e sili atu le faigofie ona ulufia i le alofa na i lo o le tumau ai i le alofa.”—DR. KAREN KAYSER.

ATONU e lē o se mea e faateʻia ai le faatuputupulaʻia o faaipoipoga ua lē o toe iai se alofa. O le faaipoipoga o se faiā faaletagata e lavelave, ma e toʻatele ua latou ulu atu i ai ae leʻi lava ni tapenapenaga. Ua taʻua e Dr. Dean S. Edell e faapea: “Pe a suʻe o tatou laisene avetaavale, e faatalitalia i tatou ina ia faataʻitaʻi atu se lelei ua oo i ai la tatou aveave, ae o laisene o faaipoipoga e mafai lava ona maua i le na o le saini.”

Ioe, e ui ina tele faaipoipoga o loo sologalelei ma fiafia moni, ae iai foʻi ni faaipoipoga ua oo i ai mafatiaga tugā o le tino po o le mafaufau. Atonu e tetele lava ni faamoemoega sa iai i se paaga po o paaga uma e toʻalua a o ulu atu i le faaipoipoga, peitaʻi sa lē ia i laʻua ni tomai e manaʻomia mo se faiā faaumiumi. Ua faamatala mai e Dr. Harry Reis faapea: “Pe a faatoʻā amata ona māfana ni tagata, e la te lagonaina se faalogona matagofie e peiseai ua mautinoa lelei e le tasi le isi.” E oo ia i laʻua lagona e peiseai o a latou paaga ua “na o le pau lava lea o se tagata i le lalolagi lenei e tutusa o la mafaufau i mea. O lena faalogona e iai nisi taimi e mou mālie atu ai, ma pe a tupu lena mea, e mafai ona matuā mamafa ona ooooga i le faaipoipoga.”

E fiafia lava, talu ai e tele faaipoipoga e lē o oo i lena tulaga. Peitaʻi, seʻi o tatou talanoa puupuu i ni nai vala atonu ua māfua ai i nisi taimi ona mou mālie atu le alofa.

Le Faagaulēmalie—“E Lē o le Mea Lenei sa Ou Faatalitalia”

Ua faapea mai Rosa: “Ina ua ma faaipoipo ma Simi, sa ou manatu lava o maʻua lea ua faaataina i lo matou nuu le tala ia Piuti Matamoe (Sleeping Beauty) ma Perenise Tauagafau (Prince Charming)—sa iai uma le alofa fetosinaaʻi faaleituaiga ma le faapelepele, ma le magafagafa o le tasi i le isi.” Peitaʻi, e leʻi umi, ae lē toe foliga tauagafau loa le “perenise” a Rosa. Fai mai a ia: “Na oo ina ou matuā ʻinoʻino lava ia te ia.”

E tele ata tifaga, o tusi, ma pese lauiloa o loo faamatala mai ai se ata lē moni o le alofa. A o faagasolo le faigauō, e ono oo i le alii ma le tamaʻitaʻi ni lagona e peiseai o lea ua tino mai se mea sa la moemiti i ai; ae pe a mavae atu ni nai tausaga talu ona faaipoipo, ona la toe iloa ane lea, o le mea moni lava, sa na ona la moemiti i ai! Pe afai na lē taulau ona faataunuuina i le faaipoipoga mea ia sa taʻu mai e se tusi o tala alofa i faigauō, e foliga mai la o le faaipoipoga lea na faapea e mafai ona taulau pe a faia ni taumafaiga, o se matuā lē taulau lava.

O le mea moni, o nisi mea o loo faatalitalia i le faaipoipoga e matuā talafeagai lava. Mo se faaaʻoaʻoga, e talafeagai le faatalitalia o le iai o le alofa, le uaʻi mai, ma le lagolagosua mai o le paaga a se tasi. Peitaʻi, e oo lava foʻi i nei moomooga e mafai ona lē faataunuuina. Ua faapea mai Mina, o se tamaʻitaʻi talavou Initia ua faaipoipo: “E toetoe lava oo ia te aʻu faalogona e pei ou te leʻi faaipoipo. Ou te lagona le tuua toʻatasi ma le tuulafoaʻia.”

Lē Fetaui Lelei—“E Augapiu se Mea Ma te Tutusa Ai”

Ua faapea mai se tasi fafine: “E toetoe lava o mea uma ma te matuā vā ai i sini ma laʻu tane. O aso uma  lava ou te matuā tigā ai i loʻu faanoanoa i laʻu filifiliga na fai o le faaipoipo atu ia te ia. O le matuā lē fetaui lava o maʻua.”

E masani lava ona lē umi se taimi ae iloa e se ulugalii le telē o lo la eseesega mai i le tulaga sa la manatu e la te tutusa ai a o faagasolo le faigauō. Ua tusi mai le tamaʻitaʻi o Dr. Nina S. Fields: “O le faaipoipoga e masani lava o iinā e faaalia ai uiga ia sa leʻi amanaʻia e paaga taʻitoʻatasi e uiga ia te ia lava a o nofofofua.”

O le iʻuga, pe a uma ona faaipoipo, e ono manatu ai nisi ulugalii faapea e matuā lē fetaui lelei lava i latou. Ua taʻua e Dr. Aaron T. Beck: “E ui ina talitutusa i mea e fiafia ai ma uiga totino, ae o le tele lava o tagata e ulu atu i le faaipoipoga ma ni eseesega tetele i auala e ola ai, o masaniga, ma uiga faaalia.” E tele ulugalii e lē iloa pe faapefea ona faaleleia na eseesega.

 O Feteenaʻiga—“E Ma te Tauaʻiupu Soo Lava”

A o toe mafaufau Sina i pōpōfou o lana faaipoipoga, ua ia faapea mai: “Sa ma maofa i lo ma misa soo—e oo lava ina ma feʻei, po o le sili atu ona leaga, le alu o ni aso o faimea ita lava e aunoa ma se fetautalaaʻi.”

E lē mafai ona ʻasa se faaipoipoga ma ni lē femalilieaʻi. Ae o faapefea ona taulimaina? Ua tusi mai Dr. Daniel Goleman: “I se faaipoipoga o loo sologa lelei, e i ai i le tane ma le avā le lagona saʻoloto e faaleo atu se mea e lē o malilie ai. Peitaʻi ua masani pea i taimi e matuā aasa ai le ita, e faaali atu ai faitioga i se uiga e matuā āfaina ai se tasi, e peiseaī o loo osofaʻi atu i uiga ma amioga o le paaga.”

Pe a tupu lenei mea, ona avea lea o le talanoaga e peiseaī o se vaipanoa o loo pā ai se taua, lea o loo matuā taumafai ai e puipuia manatu faaalia, ma ua faaaogā ai upu e pei o ni auupega na i lo o ni meafaigaluega e fesootaʻi ai. Ua faapea mai se vaega o ni tagata atamamai: “O se tasi o itu e sili ona leaga ai finauga e lē mafai ona pulea, o le mananaʻo lea o le tane ma le avā e fai ni a la faamatalaga e lamatia ai le mea e sili ona tāua o le la faaipoipoga.”

Ua Leai se Naunau—“Ua Ma Fiu”

“Ua ou fiu e taumafai se auala e faalelei ai le ma faaipoipoga,” o le taʻutinoga lea a se tasi fafine ina ua mavae le lima tausaga talu ona faaipoipo. “Ou te iloa e lē taitai toe mafai ona faaleleia i le taimi nei. E na o le pau lava la loʻu popolega lea e iai o le ma fanau.”

Ua taʻua faapea o le tuufaafeagai moni lava o le alofa, e lē o le ita ae o le leai o se naunau. O le mea moni, e tutusa lelei lava le faaleagaina o se faaipoipoga ona o le leai o se naunau e pei foʻi ona faaleagaina i le lotoa.

Ae o le itu e faanoanoa ai, o nisi paaga ua matuā masani lava i se faaipoipoga e lē o iai se alofa, ma ua matuā sisii ai lava lima i le toe faia o nisi suiga. Mo se faaaʻoaʻoga, na taʻua e se tasi tane e faapea o le faaipoipo mo le 23 tausaga e peiseaī o loo “e faigaluega i se galuega e te lē manaʻo ai.” Na ia toe faapea mai atili: “E te faia le mea e sili ona lelei e mafai ona fai i le tulaga o loo e iai.” E tali faapena foʻi le mea na oo i se avā e igoa ia Wendy, o lē na faapea lava ua lē o toe iai se avanoa e toe faaleleia ai le la faiā ma lana tane sa faaipoipo atu i ai mo le fitu tausaga. Ua faapea mai o ia: “E tele taimi sa ou taumafai ai, ae sa na o loʻu faanoanoa ai lava ona o lona lē talisapaia o aʻu taumafaiga. Na ou iʻu ai i faalogona mafatia. Ou te lē toe fia oo i lena mea. Pe afai ou te toe taumafai e faaleleia le tulaga o mea, o le a na o loʻu tigāina ai. E sili ai le aua ou te faatalitalia se mea—o le a ou lē maua ai se fiafiaga tele, ae o le mea sili o le a ou lē lagona mafatia ai.”

O le faagaulēmalie, le lē fetaui lelei, o feteenaʻiga, ma le leai o se naunau ua na o nisi na o vala e ono māfua ai se faaipoipoga ua lē o toe iai se alofa. E manino mai, e iai ma nisi vala—o nisi o na vala o loo taʻua i le pusa i le itulau e 5. E tusa lava po o le ā le pogai, ae pe o iai ea se faamoemoe mo paaga o ē e foliga mai ua saisaitia i se faaipoipoga ua lē o toe iai le alofa?

[Pusa/Ata i le itulau 5]

FAAIPOIPOGA UA LĒ O TOE IAI LE ALOFA—O NISI VALA

• Tupe: “E ono mafaufau se tasi faapea, o le faasoasoaina lelei o tupe o le a fesoasoani e autasia ai se ulugalii e ala i le matuā manaʻomia ona galulue felagolagomaʻi, a o fefaasoaaʻi a la alagaʻoa mo mea autū e manaʻomia mo le olaga, ma a o olioli i iʻuga o a la galuega. Ae i lenei foʻi itu, e oo lava i se mea e mafai ona autasia ai se ulugalii e masani foʻi ona faapogaia ai le faateteʻaina o i laʻua.”—Dr. Aaron T. Beck.

• Tulaga Faamātua: “Ua matou iloa e 67 pasene o le aofaʻiga o mātua ua faafuaseʻi lava ona fai ifo le faamalieina tau faaipoipoga pe a uma ona fanau mai le la ulumatua, ae faavalu taimi e sili atu ai ona misa soo. O se tasi o māfuaaga, talu ai ua lē lavavā mātua ma ua leai se taimi e faifaimea ai na o laʻua.”—Dr. John Gottman.

• Taufaaʻoleʻole: “O le lē faamaoni i le faaipoipoga e aofia ai le taufaaʻoleʻole, ma pe a faafaigofie lava le uiga o le taufaaʻoleʻole, o le ʻolegia lea o le faatuatuaga sa iai. Pe afai e faamatalaina le faatuatuaga faapea o se vala e sili ona tāua i faaipoipoga uma e umi ona taulau manuia, pe o se mea ea la e ofo ai le mafai e le taufaaʻoleʻole ona faaleagaina ai se faiā tau faaipoipoga?”—Dr. Nina S. Fields.

• Feusuaʻiga: “E oo ane i le taimi ua faatino ai e tagata se talaga faaipoipoga, ua matuā masani lava le tele o tausaga ua mavae o leʻi toe faia ni feusuaʻiga. I nisi faaipoipoga, sa leʻi iai lava ni faiā tau feusuaʻiga na faavaeina lelei, ae o isi, sa avea feusuaʻiga o se mea e tau ina fai e aunoa ma ni faalogona alofa, e na o se mea e faamalie ai manaʻoga faaletino o le paaga a se tasi.”—Judith S. Wallerstein, se fomaʻi e gafa ma suʻesuʻega i tulaga tau le mafaufau ma amioga a tagata.

[Pusa/Ata i le itulau 6]

UA FAAPEFEA ONA AAFIA AI LE FANAU?

Faamata e mafai e le tulaga o iai lau faaipoipoga ona aafia ai lau fanau? E tusa ai o se manatu o le alii o Dr. John Gottman, o lē e pe tusa ma le 20 tausaga o fai ni ana suʻesuʻega i tulaga o ulugalii, o le tali i ai o le ioe. Fai mai a ia: “I a matou suʻesuʻega e lua sa faia mo le taʻi sefulu tausaga i le suʻesuʻega, na matou iloa ai, o pepe e fananau mai i mātua e lē o fiafia, e saoasaoa lava le tātā o o latou fatu i taimi e fai ai ni a latou taaloga ma e lē mafai ona latou faatoʻafilemuina i latou lava. A o faagasolo taimi, e mafai e feteenaʻiga tau le faaipoipoga ona oo ai ina maualalo mea latou te ausia i aʻoga, e tusa lava po o le ā le atamai o le tomai sa ola mai ma na tamaiti.” Ae o se faaeseesega, e tusa ai o le faamatalaga a Dr. Gottman, o fanau a ulugalii o loo lelei ona fetuutuunaʻi o latou olaga, “e lelei o latou tulaga tau aʻoaʻoga ma le olaga masani, talu ai o loo faaalia e o latou mātua ia i latou le auala e feutagaʻi ai i le faaaloalo ma isi tagata, ma le auala e taulimaina ai faalogona lē fiafia.”