MO TALAVOU
9: Ituaiga Tagata e Iai Oe
LE UIGA O LE ITUAIGA TAGATA E IAI OE
E lē na o lou igoa po o ou foliga vaaia e iloa ai le ituaiga tagata e iai oe ae e aofia ai au tapulaa, talitonuga ma ou uiga. O lea la, o le ituaiga tagata e iai oe e aofia ai le tagata i fafo faapea ma le tagata i totonu.
LE TĀUA O LE ITUAIGA O TAGATA E IAI OE
Pe a e iloa lelei lou tulaga, o le a e tumau pea i ou manatu nai lo o le faatagaina o au uō e pulea oe.
“O le toʻatele o tagata e tai pei o se faatagata o loo tū i se fale ofu. E latou te lē filifilia o latou ofu, ae e filifili e isi.”—Adrian.
“Na ou aʻoaʻoina le auala e tausisi ai e fai le mea saʻo e ui lava e faigatā. E mafai ona iloa aʻu uō moni i le auala e latou te gaoioi ai ma le auala ou te gaoioi ai pe a matou faatasitasi.”—Courtney.
MATAUPU SILISILI FAALE-TUSI PAIA: “Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau.”—Roma 12:2.
MEA E MAFAI ONA E FAIA
Ia iloa po o le ā lou tulaga i le taimi lenei ma le ituaiga tagata e te manaʻo e avea ai oe, e ala i le iloilo o mea e te lelei ai, o ou vaivaiga ma ou talitonuga. O le auala sili e faia ai faapea o le taliina lea o fesili o loo mulimuli mai.
Mea e te lelei ai: O ā oʻu taleni ma tomai o loo iai? O ā itu ou te lelei ai? (Mo se faataʻitaʻiga: Po o aʻu o se tagata e tausi taimi? pulea totino? galue mamafa? ma limafoaʻi?) O ā mea lelei ou te faia?
FESOASOANI: Po o faigatā iā te oe ona mafaufau i ni mea lelei sa e faia? Ia fesili atu i mātua po o se uō maufaatuatuaina po o ā ni mea lelei na ia mātauina ma aiseā.
MATAUPU SILISILI FAALE-TUSI PAIA: “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.”—Kalatia 6:4.
Ou vaivaiga: O ā oʻu uiga e manaʻomia ona faaleleia? O le ā le taimi e faaosoosoina ai aʻu e faia se mea sesē? O ā nisi vala e manaʻomia ai ona ou faaalia le pulea totino?
MATAUPU SILISILI FAALE-TUSI PAIA: “Afai tatou te faapea atu: ʻE leai sa tatou agasala,’ ua faasesēina ai i tatou lava.”—1 Ioane 1:8.
Ou talitonuga: O ā tapulaa o loo oʻu mulimuli iai, ma aiseā? Po ou te talitonu e iai se Atua? O ā faamaoniga e faamautinoa ai o loo soifua o ia? O ā gaoioiga ou te vaai i ai e lē tonu, ma aiseā? O le ā o le a tupu i le lumanaʻi?
MATAUPU SILISILI FAALE-TUSI PAIA: “E leoleoina oe e le mafaufau lelei, e malupuipuia foʻi oe i le faautaga loloto.”—Faataoto 2:11.
E te Ono Fiafia Foʻi
TALI I FESILI E 10 A TALAVOU
O le ā le Ituaiga o Tagata e Iai Aʻu?
O lou iloaina o mea e te talitonu i ai, itu e te lelei ai, ou vaivaiga ma ou sini, o le a fesoasoani iā te oe e faia ni filifiliga atamai pe a feagai ma luʻi.
UA FESILI MAI TALAVOU
O le ā le Tele e Maufaatuatuaina ai Aʻu?
E tele atu le saʻolotoga e maua e isi talavou nai lo isi. Aiseā e eseese ai?
