Aiseā ua Feoti ai Tagata?
Tali a le Tusi Paia
O se tulaga masani le tuufesili pe aiseā ua feoti ai tagata, aemaise pe a maliu se tasi e pele iā i tatou. Ua faapea mai le Tusi Paia: “O le tui e iʻu i le oti o le agasala lea.”—1 Korinito 15:56.
Aiseā ua agasala ma feoti ai tagata uma?
Na feoti uluaʻi tagata o Atamu ma Eva, ona sa la agasala i le Atua. (Kenese 3:17-19) E pau le iʻuga na oo i ai ona o lo la fouvale i le Atua o le oti, talu ai o ia o “le puna o le ola.”—Salamo 36:9; Kenese 2:17.
Na tuufaasolo atu e Atamu āuga o le agasala iā i latou uma na tupuga mai iā te ia. Ua faapea mai le Tusi Paia: ‘Ua oo mai le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.’ (Roma 5:12) Ua feoti tagata uma talu ai ua latou agasala uma lava.—Roma 3:23.
Le auala o le a soloiesea ai le oti
Ua folafola mai e le Atua le taimi ‘o le a ia faaumatia ai le oti e faavavau.’ (Isaia 25:8) Ina ia aveesea le oti, e tatau ona ia soloiesea le pogai autū, o le agasala lea. O le a faia faapea e le Atua e ala iā Iesu Keriso, “o lē e na te aveeseina le agasala a le lalolagi.”—Ioane 1:29; 1 Ioane 1:7.