Miezaky manaraky ty fivavaha Kristiana naorini-Jesosy noho narahini-apostoliny rey zahay Vavolombeloni-Jehovah. Hiresadresaky mikasiky ty raha inoanay lahatsoratsy toy.

1. Ndranahary. Mivavaky amy Ndranahary marina iny zahay. Ie ro Farani-ze Mahery sady Mpamoro ty kila raha iaby. Jehovah ty anarany. (Salamo 83:18; Apokalypsy 4:11) Ie ro Ndranaharini-Abrahama, Mosesy, noho Jesosy.—Eksodosy 3:6; 32:11; Jaona 20:17.

2. Baiboly. Mino zahay hoe Safà-Ndranahary ty Baiboly sady nameany ho ahin’olombelo. (Jaona 17:17; 2 Timoty 3:16) Baka amy boky 66 amy Baiboly ao rey ty raha iaby inoanay, zany hoe baka amy “Testamenta Taloha” noho “Testamenta Vaovao.” Nivola ho zao mikasiky anay ty mpampianatsy mikasiky fivavaha raiky kaihy hoe Jason BeDuhn: “Tsy ze hevitsy fa nieritseretin-drozy ro tamanin-drozy ho hita amy Baiboly ao, fa ty Baiboly mihintsy ro iorenani-raha inoan-drozy noho ataon-drozy.” *

   Marina hoe mino ty raha iaby volanini-Baiboly zahay, fe tsy rambesinay ara-bakiteny iaby ze raha voasoratsy ao. Ekenay hoe misy safà an’ohatsy ty ao. Miresaky mikasiky bibinala mana loha fito, ohatsy, ty Baiboly. Fe raha tsy misy mihintsy zay.

3. Jesosy. Manaraky ty fampianarani-Jesosy Kristy noho ty modely nameany zahay. Manaja azy zahay satria Mpanavotsy ie sady Anaki-Ndranahary. (Matio 20:28; Asan’ny Apostoly 5:31) Midika zay hoe Kristiana zahay. (Asan’ny Apostoly 11:26) Fe nianaranay tamy Baiboly ao hoe tsy Jesosy ro Ndranahary Farani-ze Mahery, le tsy marina ty fampianara hoe telo miharo raiky Ndranahary.—Jaona 14:28.

4. Ty Fanjakà-Ndranahary. Fanjakà tena misy an-danitsy any raha io, fa tsy raha anaty foni-Kristiana ao. Io ro hisolo ty fanjakàn’olombelo sady hanatanteraky ty raha tea-Ndranahary hatao amy tany toy. (Daniela 2:44; Matio 6:9, 10) Sisa kely le ho tanteraky raha zay, satria fa miay amy “andro farany” tsika henanizao araky ty faminaniani-Baiboly.—2 Timoty 3:1-5; Matio 24:3-14.

   Jesosy ro Mpanjakani-Fanjakà-Ndranahary io. Fa nanomboky nanjaka ie tamy tao 1914.—Apokalypsy 11:15.

5. Fanavota. Nanao soro ty ainy Jesosy soa ho afaky amy ota noho fahafatesa tsika. (Matio 20:28; Asan’ny Apostoly 4:12) Laha ta handramby soa baka amy soro io ty olo raiky, le tsy maintsy atorony hoe mino ani-Jesosy ie. Tsy maintsy manova ty fiainany koa ie le atao batisa. (Matio 28:19, 20; Jaona 3:16; Asan’ny Apostoly 3:19, 20) Ty raha ataon’olo raiky ro ahaiza hoe manam-pinoa vatany va ie. (Jakoba 2:24, 26) Fe tsy karama amea azy amy raha soa nataony fanavota io. “Ty hasoam-panahi-Ndranahary tsy misy manahaky azy” ro mahavy azy hahazo an’io.—Galatianina 2:16, 21.

6. Lanitsy. Mipetraky an-danitsy any Jehovah Ndranahary noho Jesosy Kristy voho ty anjely tsy mivaliky. * (Salamo 103:19-21; Asan’ny Apostoly 7:55) Hisy olo vitsivitsy, zany hoe 144 000, hovelomy ho an-danitsy any mba hiaraky manjaka amy Jesosy.—Daniela 7:27; 2 Timoty 2:12; Apokalypsy 5:9, 10; 14:1, 3.

7. Tany. Namboatsy tany toy Ndranahary mba hipetrahan’olombelo zisiky farany. (Salamo 104:5; 115:16; Mpitoriteny 1:4) Hovany ho paradisa ty tany, le hapetrakiny ao ze olo manoriky ty safàny. Ho salama soa noho ho lavorary sady tsy ho maty sasy rozy.—Salamo 37:11, 34.

8. Raha raty noho fijalea. Nanomboky nisy ty raha raty noho ty fijalea lafa nivaliky tamy Ndranahary ty raiky tamy anjeliny rey. (Jaona 8:44) Nitariky ani-mpivaly voalohany rey hivaliky koa anjely io, ka nahavy loza ho an’olombelo raha zay. Nikaihy hoe “Satana” noho “Devoly” anjely io tafara atoy. (Genesisy 3:1-6; Romanina 5:12) Nahavy ty olo hisalasala Satana. Zay mahavy Ndranahary mbo manenga ty raha raty noho ty fijalea hisy henanizao, fe tsy hengany hitohy zisiky farany raha reo.

9. Fahafatesa. Tsy misy sasy ty olo raiky lafa maty. (Salamo 146:4; Mpitoriteny 9:5, 10) Tsy mijalijaly amy afobe any koa ie.

   Maro biby ty olo hovelomi-Ndranahary ndraiky, an’arivony tapitrisa mihintsy aza. (Asan’ny Apostoly 24:15) Hampianary mikasiky Ndranahary rozy afarani-zay. Haripaky ze tsy maneky hanao raha zay, sady tsy hovelomy sasy.—Apokalypsy 20:14, 15.

10. Olo trano raiky. Manoriky ani-lalàna-Ndranahary mikasiky fanambalea baka am-boalohany any iny zahay. Lahilahy raiky noho ampela raiky ro natao-Ndranahary mpivaly. Tsy mahazo misaraky rozy laha tsy hoe nandranto ty raiky amin-drozy. (Matio 19:4-9) Resy lahatsy zahay hoe sambatsy ty olo trano raiky lafa manoriky ty torolalani-Baiboly.—Efesianina 5:22–6:1.

11. Ty fivavahanay. Tsy mankamasy lakroa na sary zahay sady tsy mivavaky amy raha rey. (Deoteronomia 4:15-19; 1 Jaona 5:21) Retoa iaby ty raha ataonay amy fivavahanay ao:

    • Mivavaky amy Ndranahary.—Filipianina 4:6.

    • Mamaky noho mianatsy Baiboly.—Salamo 1:1-3.

    • Mametsivetsy ze raha nianaranay tamy Baiboly ao.—Salamo 77:12.

    • Miaraky mivory mba hivavaky, hianatsy Baiboly, hihira, hiresaky ty raha inoanay, hampahery mpiaraky mivavaky aminay reo noho ty olo hafa.—Kolosianina 3:16; Hebreo 10:23-25.

    • Mitory ty “vaovao soani-Fanjakà iny.”—Matio 24:14.

    • Manampy ty olo hafa.—Jakoba 2:14-17.

    • Mamboatsy noho mikarakara Efitrano Fanjakà na ze trano hafa ampiasà amy fampianara Baiboly ataonay amy tany toy iaby.—Salamo 127:1.

    • Manampy ze tra-boina.—Asan’ny Apostoly 11:27-30.

12. Ty fikambananay. Mizara ho fiangona maromaro zahay. Misy lahilahy vitsivitsy kaihy hoe anti-panahy miandraikitsy ani-fiangona reo kiraidraiky. Fe tsy mpitariky fivavaha rozy sady tsy karamà. (Matio 10:8; 23:8) Tsy mitaky ampahafolon-karena koa zahay sady tsy mitanty rakitsy. (2 Korintianina 9:7) Fanomeza baka amin’olo tsy manono anara ro anohana ty asa iaby ataonay.

    Kristiana matotsy vitsivitsy amy foibenay a Etazonỳ any ro manome tari-dala ho ani-Vavolombeloni-Jehovah amy tany toy iaby. Kaihy hoe Filan-kevi-pitantana rozy.—Matio 24:45.

13. Miharo raiky zahay. Mitovy iaby ty raha inoani-Vavolombeloni-Jehovah amy tany toy iaby. (1 Korintianina 1:10). Miezaky marè koa zahay mba tsy hifanavakavaky karaza, na foko, na tany niavia. (Asan’ny Apostoly 10:34, 35; Jakoba 2:4) Fe afaky mitingy ze raha teanay zahay ndre miharo raiky aza. Afaky manao ze teany ty Vavolombeloni-Jehovah raiky laha mbo mety amy ty eritseritsiny raha teany hatao zay, sady mifanaraky amy torolalani-Baiboly.—Romanina 14:1-4; Hebreo 5:14.

14. Ty fomba fiainanay. Miezaky tsy ho tea tena zahay le atoronay amy ty raha iaby ataonay hoe tea olo zahay. (Jaona 13:34, 35) Tsy manao raha tsy tea-Ndranahary zahay, anatini-zay ty fampilira lio. (Asan’ny Apostoly 15:28, 29; Galatianina 5:19-21) Tea filongoa zahay ka tsy mandramby anjara amy aly. (Matio 5:9; Isaia 2:4) Manaja fanjakà zahay ka manoriky ze lalàna apetrakiny laha mbo tsy mifanohitsy amy ty lalàna-Ndranahary.—Matio 22:21; Asan’ny Apostoly 5:29.

15. Ty fifandrambesanay amin’olo hafa. Nandidy ty mpianatsiny Jesosy hoe: “Tiavo ty namanao manahaky ty vatanao.” Nivola koa ie fa “tsy miharo amy zao tontolo zao” ty Kristiana. (Matio 22:39; Jaona 17:16) Zay mahavy anay ‘manao raha soa amin’olo iaby’ io. Tsy manao politiky mihintsy koa zahay sady tsy mifandramby amy fivavaha hafa. (Galatianina 6:10; 2 Korintianina 6:14) Fe manaja ty safidy ataon’olo amy raha reo zahay.—Romanina 14:12.

Laha mana fanontanea mikasiky ty raha inoanay Vavolombeloni-Jehovah iha, le afaky manoratsy aminay atoy, na manatreha fivoria amy ze Efitrano Fanjakà marìny anao, na miresaha amy ze Vavolombeloni-Jehovah mbaminareo mbeny. Afaky mahita fanazavà maromaro mikasiky anay koa iha amy tranonkalanay ato.