Nisoratin’i Matio 22:1-46
22 Mbo nanao fanohara ndraiky Jesosy lafa nivola tamin-drozy hoe:
2 “Ty Fanjakàn’ny lanitsy, le azo ampitovizy amy mpanjaka raiky nanao fety be tamy fanambalean’ny anakilahiny.
3 Le nirahiny ty mpanompony hikaiky ani-ze olo nasàny tamy fety iny, fe tsy nahefa olo rey.
4 Naniraky mpanompo hafa ndraiky ie ka nivola hoe: ‘Volano olo nasàko rey hoe: “Fa parè ty hany midỳ, le fa nivonoako ty aombiko noho ty biby nivondrahiko, ka fa parè ty raha iaby. Avia hamonjy an’ny fety be toy.”’
5 Fe tsy nahoan’olo nasà rey raha zay, fa ty ilany nana am-baibò any, ty ilany nandeha namarotsy,
6 fa ty ambiny nanambotsy an’ny mpanompon’ny mpanjaka rey, ka nanjiva noho nampijaly an-drozy sady namono an-drozy.
7 “Le neloky mpanjaka iny, ka nandefa ty maramilany hamono an’ny mpamono olo rey noho hañoro ty tanàn-drozy.
8 Le hoy ty asany tamy mpanompony rey: ‘Fa parè fety toy, fe tsy maeva an’ny fanasà toy olo nasà rey.
9 Ka zao, ndany mana amy lala miboaky amy tanà toy, le asao ho amy fety toy iaby ze olo hitanareo.’
10 Le nandeha amy lala iny eny mpanompo rey, ka navorin-drozy iaby ze olo nihitan-drozy, ndre raty fanahy ndre soa fanahy. Le nifeno olo nihina* tamy trano nanaova fety iny tao.
11 “Lafa nilitsy mpanjaka iny mba hanenty an’ny olo nasà rey, le nahita lahilahy raiky tsy nanao siky fandesy amy mariazy.
12 Le hoy mpanjaka iny taminy: ‘Akory ty nahatafilitsy anao tato, kanefa iha tsy manao siky fandesy amy mariazy?’ Le tsy nahafivola lahilahy iny.
13 Le hoy mpanjaka iny tamy mpanompony rey: ‘Rohizo ty tanany noho ty tombony, le atoraho amy maìky amonto any ie. Any ie ro hitàny noho hangìtsy.’*
14 “Satria maro ty nasà, fe kelikely avao ty tinginy.”
15 Bakeo nandeha Fariseo rey ka niaraky nila hevitsy hamandriha an’i Jesosy tamy ty raha volaniny.
16 Farany nirahin-drozy ho amy Jesosy any ty mpianatsin-drozy, niaraky tamy mpanoha an’i Heroda rey mba hivola hoe: “Mpampianatsy e, hainay fa mivola ty marina avao iha, sady mampianatsy ty marina mikasiky a-Ndranahary. Tsy mila hatò amin’olo mihintsy iha satria tsy mitingy volon’olo.*
17 Ka mba ambarao anay ty hevitsinao: Azo atao sa tsy azo atao* ty mandoa hetra* amy Kaisara?”
18 Fe hain’i Jesosy fa raty say rozy ka hoy ty asany: “Mpiatsaravelatsihy nareo! Manino nareo ro mamandriky ahy?
19 Mba ameo drala vy fandoava hetra bakao aho.” Le nanandesan-drozy denaria raiky ie.
20 Le hoy ty asany tamin-drozy: “Sarin’ia io, le anaran’ia eo io?”
21 Le hoy ty asan-drozy: “Ahin’i Kaisara.” Le hoy ty asany tamin-drozy: “Aloavo amy Kaisara zany ze ahin’i Kaisara, le amy Ndranahary ze ahi-Ndranahary.”
22 Nitseriky rozy lafa naharè ani-zay, le nandeha niala teo.
23 Tamy andro iny avao, le namonjy an’i Jesosy, Sadoseo rey, azy mivola hoe tsy misy fameloma ty maty rey. Nanontanean-drozy ie hoe:
24 “Mpampianatsy e, nivola Mosesy hoe: ‘Laha misy lahilahy nimaty tsy niteraky, le tsy maintsy manambaly an’ny valiny iny ty rahalahiny ka hanome taranaky ho an’ny rahalahiny nimaty iny.’
25 Kanefa nisy fito mirahalahy taminay teto. Nanambaly talanolo iny, le nimaty. Fe tsy niteraky ie ka nanenga ty valiny ho ahi-ty rahalahiny.
26 Le ho zay koa azy faharoe noho fahatelo rey, zisiky tamy azy fahafito iny.
27 Nimaty koa ampela iny tamy farany.
28 Ka lafa hovelomy ty maty, ho valin’ia amin-drozy fito mirahalahy ampela iny? Satria samby fa nanambaly azy iaby rozy.”
29 Le hoy ty navalin’i Jesosy an-drozy: “Diso hevitsy nareo, satria samby tsy hainareo ndre ty Soratsy Masy ndre ty heri-Ndranahary.
30 Fa lafa hovelomy ty maty, le tsy hangata-baly na halàn’olo valy, fa hanahaky anjely an-danitsy any rey.
31 Fa namaky mikasiky fameloma ty maty nareo. Mbo tsy nivakìnareo va ty raha nivolani-Ndranahary taminareo? Hoasany hoe:
32 ‘Zaho ro Ndranaharin’i Abrahama, noho Ndranaharin’i Isaka, noho Ndranaharin’i Jakoba’? Tsy Ndranaharin’olo maty Ie, fa ahi-ty velo.”
33 Lafa naharè ani-zay ty vahoaky, le nitseriky tamy ty fampianarany.
34 Lafa niren’ny Fariseo rey hoe nataon’i Jesosy tsy nahafivola Sadoseo rey, le niaraky namonjy azy rozy.
35 Le namandriky azy ty raiky amin-drozy nahay Lalàna rey, ka nanontany hoe:
36 “Mpampianatsy e, ino ty didy farany bevata amy Lalàna ao?”
37 Le hoy Jesosy taminy: “‘Tiavo Jehovah Ndranaharinao amy ty fonao iaby noho ty vatanao iaby noho ty sainao iaby.’
38 Zay ty didy farany bevata sady voalohany.
39 Mbo manahaky ani-zay avao faharoe toy: ‘Tiavo ty namanao manahaky itiavanao ty vatanao.’
40 Didy roe reo ro fototsin’ny Lalàna iaby noho ty Mpaminany.”
41 Mbo teo iaby Fariseo rey, le nanontanean’i Jesosy hoe:
42 “Manao akory ty hevitsinareo mikasiky an’i Kristy? Anan’ia ie?” Le hoy ty asan-drozy: “Anan’i Davida.”
43 Le nanontaneany rozy hoe: “Ka nanino Davida ro nikaiky azy hoe Tompo, lafa nitarihin’ny fanahy masy, ka nivola hoe:
44 ‘Hoy Jehovah tamy Tompoko: “Mipetraha ankavanako etoa, zisiky hanaovako ty fahavalonao ho ambany tombonao eo”’?
45 Ka laha Davida aza nikaiky azy hoe Tompo, akory ty maha anany azy?”
46 Le tsy nisy olo nahavaly azy, sady tsy nisy nahasaky nanontany azy sasy nanomboky tamy andro iny.
Fanamariha ambany pejy
^ Na: “nandry nihorira tan-databo.”
^ Zany hoe hangìtsy satria ho meloky noho kivy tanteraky.
^ Na: “tsy manavakavaky.”
^ Na: “Mety sa tsy mety.”
^ Hetra takỳ amin’olo kiraidraiky resahy eto io.
