Nisoratin’i Matio 14:1-36
14 Naharè mikasiky an’i Jesosy, Heroda* mpanjaka tamy fotoa zay,
2 le nivola tamy ty mpanompony hoe: “Jaona Mpanao Batisa zay! Nivelo ndraiky ie, le zay ahavitany manao an’ny fahagagà rezao io.”
3 Fa nisamborin’i Heroda, Jaona, le nirohizany noho nigadrany, mba hahafalifaly an’i Herodiasy. Herodiasy io valin’i Filipo rahalahin’i Heroda,
4 ka fa nivolanin’i Jaona, Heroda hoe: “Tsy azonao atao ty manambaly azy.”
5 Nitean’i Heroda hovonoa Jaona, fe natahotsy an’ny vahoaky rey ie, satria vahoaky rey nieritseritsy hoe mpaminany Jaona.
6 Lafa nankalazà ty aniverseran’i Heroda, le nitsinjaky tamy fety iny tao anakampelan’i Herodiasy iny. Nifalifaly biby Heroda,
7 le nifanta ie fa hameany an’ny ajà ampela iny iaby ze raha angatahiny.
8 Fe nampirisihin’ny reniny ajà ampela iny ka nivola hoe: “Andeso anabo finga amiko etoa ty lohan’i Jaona Mpanao Batisa.”
9 Le nalahelo mpanjaka iny, fe nampanoviny avao raha zay satria ie fa nifanta, sady fa niren’olo niaraky nihina taminy* teo rey koa ty safàny.
10 Farany naniraky olo ie hanampaky ty lohan’i Jaona tan-gadra ao.
11 Le nandesy tanabo finga ty lohan’i Jaona ka nameany an’ny ajà ampela iny, bakeo nandesin’ajà ampela iny tamy reniny any.
12 Tafarani-zay, niavy ty mpianatsin’i Jaona le nangalaky ty fatiny noho nandevy azy. Bakeo nandeha nitantara tamy Jesosy rozy.
13 Lafa naharè ani-zay Jesosy, le niala teo ie ka nandeha laka nana amy pilasy mitoka satria ta hitoka. Fe niren’ny vahoaky rey raha zay, le niala tan-tanà tao rozy ka nandeha tomboky nanoriky azy.
14 Lafa niala baka anaty laka ao Jesosy, le nahita vahoaky maro. Niferinesany rozy, le nafahiny ty aretini-ze narary.
15 Fe lafa nihariva ty andro, le namonjy azy mpianatsiny rey ka nivola hoe: “Mitoka pilasy toy sady fa hariva ty andro. Ampandehano moly vahoaky reo soa hivily hany an-tanà any.”
16 Fe hoy Jesosy tamin-drozy: “Tsy voatery handeha rozy, fa ameo raha hohanin-drozy.”
17 Le nivola rozy hoe: “Ka zahay tsy mana fa mofo limy noho fia roe avao ty atoy!”
18 Le hoy ty asany: “Tsy manahy fa andeso bakao avao.”
19 Le nivolaniny vahoaky rey hamonjy pilasy mbamy akata mitiry mbeny. Bakeo nalany mofo limy noho fia roe rey, ka niandra nana an-danitsy any ie, le nivavaky. Bakeo nitampahiny mofo rey le nameany an’ny mpianatsy rey, le mpianatsy rey nizara azy tamy vahoaky.
20 Le nihina iaby rozy ka nivintsy. Bakeo navorin-drozy ze sisa tsy nilany, ka nahafeno paniè 12.
21 Lahilahy 5 000 teo ho eo ty nihina, ankoatsin’ny ampela noho ty ajà.
22 Avy le nampiondraniny laka mpianatsiny rey bakeon’iny, le nampandehaniny aloha soa ho tratsiny ampita eny, fa ie mbo nandefa an’ny vahoaky rey noly.
23 Lafa lasa vahoaky rey, le nandeha raiky tam-bohitsy tany ie mba hivavaky. Ie raiky avao ty tany lafa naìky ty andro.
24 Tena fa nilasa lavitsy* laka iny tamy zay, le mpianatsy rey koa nialy ay amy lozoky rey satria baka alohan-drozy ao tsioky iny.
25 Fe tamy fotoa fiambena fahaefatsy tamy haliky iny* le nandeha tanabo riaky eny ie, mba ho amy mpianatsiny rey eny.
26 Lafa nahita azy nandeha tanabo riaky teny mpianatsy rey, le natahotsy ka nivola hoe: “Roy misy raha hafahafa!”* Le nikorakoraky rozy.
27 Fe avy le nivola tamin-drozy Jesosy hoe: “Ka matahotsy fa zaho avao toy!”
28 Le hoy Petera taminy: “Tompo, laha iha vatany io, le volano aho hamonjy anao anabo rano eny.”
29 Le hoy ty asany: “Avia moa!” Le nijotso baka anaty laka ao Petera, ka nandeha tanabo rano teny le namonjy an’i Jesosy.
30 Fe lasa natahotsy ie lafa nanenty an’ny tsioky be iny. Le nanomboky nilentiky ie, ka nikoaikoaiky hoe: “Tompo, vonjeo aho!”
31 Avy le nalefan’i Jesosy* ty tanany, ka nitanjahiny Petera sady nivola ie hoe: “Kely finoa iha zao! Nanino iha nisalasala io?”
32 Lafa nitafilitsy tanaty laka ao rozy, le nijano tsioky be iny.
33 Le niondriky* taminy eo iaby ze tanaty laka ao, sady nivola hoe: “Anaki-Ndranahary vatany iha.”
34 Nitafitsaky rozy, le niavy an-tety ta Genesareta.
35 Laha vo nahay azy ty olo tamy tanà iny tao, le nanambara tamy faritsy iaby manodidy mbeny. Le nandesin’olo taminy teo iaby ze narary.
36 Le nangataky azy olo rey mba hengany hitsapa azy, ndre atao hoe ty ramborambony amy sikiny* avao aza. Le niafaky iaby ty aretini-ze nanao ani-zay.
Fanamariha ambany pejy
^ Na: “niaraky aminy nandry nihorira tan-databo.”
^ Na: “Fa nilisatsy stadio maromaro.” 1 stadio = 185 m.
^ Zany hoe tamy 3 maray teo ho eo, zisiky niboahan’ny masoandro tamy 6 teo ho eo.
^ Na: “Fahità toy!”
^ Na: “naampatsin’i Jesosy.”
^ Na: “niankohoky.”
^ Abt: “sikiny ivelany.”
