Asan’ny Apostoly 9:1-43
9 Fe mbo nampitahotsy noho nita handripaky an’ny mpianatsin’ny Tompo rey avao Saoly. Nandeha amy mpisorobe any amy zay ie,
2 le nangataky taratasy mba hatoro amy synagoga a Damaskosy any. Amy zay ho azony rohiza mana a Jerosalema any ze olo hitany manaraky Ty Lala,* ndre lahilahy zay ndre ampela.
3 Lafa tan-dala eny amy zay ie, sady fa narìny an’i Damaskosy, le nisy hazavà tampoky baka an-danitsy any namirapiratsy nanodidy azy.
4 Le nilavo tamy tany eo ie, sady naharè feo nivola taminy hoe: “Saoly, Saoly, manino iha manenjiky ahy io?”
5 Le nanontany Saoly hoe: “Ia moa lahy iha io?” Le hoy ty asany: “Zaho Jesosy, azy enjehinao iny.
6 Mitsangàna, le mandehana an-tanà ao, le hovolany aminao ze raha tokony hataonao.”
7 Fa lahilahy niaraky taminy rey nitsanga teo avao sady tsy nahafivola. Naharè feo avao rozy, fe tsy nahita olo mihintsy.
8 Le niongaky baka amy tany eo Saoly. Fe tsy nisy raha nihitany mihintsy, ndre nivoha aza ty masony. Le nandesin-drozy an-tana ie, bakeo nandesin-drozy nana a Damaskosy any.
9 Le tsy nahita mihintsy ie tanatin’ny telo andro, sady tsy nihina na nino raha.
10 Nisy mpianatsy kaihy hoe Ananiasy zay ta Damaskosy ao. Le nivola taminy tamy fahità ao Tompo hoe: “Ananiasy!” Le hoy ty asany: “Toy aho Tompo!”
11 Le hoy ty asan’ny Tompo: “Mitsangàna le mandehana amy lala kaihy hoe Imahitsy iny any. Le ilao an-tranon’i Jodasy ao lahilahy mana anara Saoly, baka a Tarsosy any zay. Anatin’ny mivavaky mihintsy ie henanizao.
12 Nahita anao amy fahità ao ie Ananiasy, nilitsy iha le nametra-tana taminy, amy zay hahita ndraiky ty masony.”
13 Fe hoy ty asan’i Ananiasy taminy: “Tompo, maro biby ty olo nireko niresaky mikasiky an’ny lahilahy zay, noho ty raha raty iaby nataony tamy olonao masy ta Jerosalema any.
14 Eto ie henanizao, satria nahazo fahefà baka amy sefon’ny mpisoro mba hanambotsy* ani-ze olo iaby mikaiky ty anaranao.”
15 Fe hoy ty asan’ny Tompo taminy: “Mandehana, fa fitaova nifiliko lahilahy zay, mba handay ty anarako amy firenena hafa any noho amy mpanjaka any noho amy anan’Israely any.
16 Fa hatoroko azy soa hoe maro ty raha tsy maintsy hiaretany lafa manambara ty anarako.”
17 Nandeha amy zay Ananiasy le nilitsy tamy trano iny ao, bakeo nametra-tana taminy sady nivola hoe: “Saoly rahalahiko, naniraky ahy Jesosy Tompo, azy niseho taminao tamy lala nandehananao nana atoy iny, amy zay hahita ndraiky ty masonao sady ho feno fanahy masy iha.”
18 Avy le nisy raha manahaky kiram-pia rey nilatsaky baka amy masony eny, le nahita ndraiky ie. Bakeo nitsanga ie, le natao batisa.
19 Nihinan-kany amy zay ie, le nihanatanjaky.
Nijano niaraky tamy mpianatsy ta Damaskosy ao rey ie tanatin’ny andro vitsivitsy.
20 Avy le nitory mikasiky an’i Jesosy tamy synagoga any ie, ka nivola hoe anaki-Ndranahary Jesosy.
21 Fe nitseriky iaby ze olo naharè azy, ka nivola hoe: “Tsy io va lahilahy nampijalijaly ty olo nikaiky an’ny anara zay ta Jerosalema any iny? Sady tsy hanambotsy noho handay an’ny olo rey* amy sefon’ny mpisoro any va ty liany etoa?”
22 Fe vomaiky nahazo hery Saoly, ka nisahiran-tsay Jiosy nipetraky ta Damaskosy ao rey lafa nanome porofo azo antoky ie hoe Jesosy ro Kristy.
23 Andro maromaro tafara atoy, le niaraky nila hevitsy hamonoa azy Jiosy rey.
24 Fe nanjary nihain’i Saoly tetikin-drozy zay. Nambenan-drozy soa koa vavahadin’ny tanà rey ndre andro ndre haly, mba hahafahan-drozy hamono azy.
25 Farany nalan’ny mpianatsiny rey ie le nataon-drozy tanaty sobiky, bakeo najotson-drozy baka amy lafonety tamy lakoron’ny tanà iny eny tamy andro haly.
26 Lafa niavy ta Jerosalema any ie, le niezaky hiaraky tamy mpianatsy rey. Fe natahotsy azy rozy iaby, satria tsy nino hoe fa nanjary mpianatsy ie.
27 Farany nanampy azy Barnabasy, ka nanday azy tamy apostoly rey any. Le nitantaraniny tamin-drozy tamy an-tsipiriany ty nahitan’i Saoly an’ny Tompo tan-dala eny, noho ty niresahan’ny Tompo taminy, noho ty nahasakiany nitory tamy anaran’i Jesosy ta Damaskosy any.
28 Nijano niaraky amin-drozy amy zay Saoly, ka afaky nivezivezy* ta Jerosalema ao, sady nahasaky nitory tamy anaran’ny Tompo.
29 Niresaky noho nialy hevitsy tamy Jiosy manao safà grika rey koa ie, fe nita hamono azy rozy.
30 Lafa nihain’ny rahalahy rey raha zay, le nandesin-drozy nijotso a Kaisaria any ie, ka nalefan-drozy ta Tarsosy any.
31 Le nilamy ty fiangona iaby ta Jodia noho ta Galilia noho ta Samaria any satria tsy nisy nanohitsy, ka lasa nihanatanjaky. Natahotsy an’i Jehovah noho nampaherezin’ny fanahy masy koa ty fiangona, ka nitombo avao.
32 Nitety an’ny faritsy iny iaby Petera, ka nandeha nijotso tamy olo masy nipetraky ta Lyda ao rey koa.
33 Nahita lahilahy mana anara Enea zay ie tao. Fa valo tao lahilahy io ro nandry tam-pandreany eo satria nalemy.
34 Le hoy ty asan’i Petera: “Enea, mitaha anao Jesosy Kristy. Mitsangàna le areno ty fandreanao.” Le avy le nitsanga ie.
35 Lafa nahita azy ty olo iaby ta Lyda noho ta Sarona ao, le niova ka lasa naneky an’ny Tompo.
36 Nisy mpianatsy mana anara Tabita zay amy zay ta Jopa ao. Laha adika Tabita zay le hoe “Dorkasy.”* Nanao raha soa maro ie sady nanome raha maro mba hanampea ty mahantra.
37 Fe narary ie tamy fotoa zay ka nimaty. Nampiandroan-drozy amy zay ty fatiny le napetrakin-drozy tamy efitsy raiky anabo etazy ao.
38 Tanilan’i Jopa any ty nisy an’i Lyda, ka lafa niren’ny mpianatsy rey fa tamy tanà io ao Petera, le naniraky lahilahy roe ho aminy any rozy mba hangataky aminy hoe: “Miavia malaky aminay atoy lahy azafady!”
39 Le nandeha niaraky tamy lahilahy roe rey Petera. Lafa niavy tany ie, le nandesin-drozy tamy efitsy anabo etazy iny ao. Le niavy taminy eo iaby ty ampela maty valy. Nitany rozy sady natoron-drozy azy ty siky noho ty akanjo lava* maro nizairin’i Dorkasy tamy ie mbo nivelo.
40 Nampiboahin’i Petera iaby olo rey bakeon’iny, le nandohaliky ie ka nivavaky. Le nitoliky tamy faty iny any ie, sady nivola hoe: “Tabita, mifohaza!” Nivohan’i Tabita amy zay ty masony, le nipetraky ie laha vo nahita an’i Petera.
41 Namean’i Petera azy ty tanany ka natsangany ie. Bakeo nikaihiny olo masy noho ampela maty valy rey, le natorony an-drozy hoe velo ie.
42 Nanjary nihain’olo iaby ta Jopa ao raha zay, ka nimaro biby ty olo nino an’i Jesosy Tompo.
43 Le nijano andro vitsivitsy ta Jopa ao Petera, tamy mpanao angozy mana anara Simona zay ao.
Fanamariha ambany pejy
^ Abt: “hamehy.”
^ Abt: “handay an-drozy mirohy.”
^ Abt: “nilitsy miboaky.”
^ Anara grika ty hoe Dorkasy, le anara Aramianina ty hoe Tabita. Samby midika hoe “Gazela” anara reo.
^ Na: “siky ivelany.”
