Asan’ny Apostoly 28:1-31
28 Lafa niavy soa tan-tety eny zahay vo nahay hoe Malta ty anaran’ny nosy iny.
2 Hafa ty fivolanan’olo tao, sady tena nisoa fanahy* taminay rozy. Nandrehitsy afo rozy le nirambesin-drozy soa zahay iaby, satria niavy ty ora sady nanintsy ty andro.
3 Fe lafa namory katà noho nanasoro an’ny raha zay tamy afo eo Paoly, le nisy bibilava misy poizy niboaky bakao tratsin’ny hafanà iny, ka nipitiky amy tanany eo.
4 Laha vo nahita an’ny bibilava niraviravy tamy tanany eo iny olo rey, le nifampiresaky hoe: “Tena mpamono olo mihintsy lahilahy io, satria ndre fa niavotsy baka an-driaky eny aza ie, le tsy nanenga azy ho velo ty Rariny.”*
5 Fe nahifikin’i Paoly tanaty afo ao bibilava iny, sady tsy nisy raha nahazo azy.
6 Fa olo rey niambiamby hoe hivontovonto ie na hiravoky le ho maty tampoky. Fe lafa nandiny ela rozy sady nahita hoe tsy nanahy ie, le niova hevitsy rozy ka nivola hoe ndranahary Paoly.
7 Nana tany maromaro tamy manodidy an’ny pilasy iny eo ty manam-pahefà tamy nosy iny. Poplio ty anarany, le nandramby soa anay ie ka napetrakiny tan-tranony ao tanatin’ny telo andro zahay.
8 Nandry am-pandrea eo baban’i Poplio satria nisiloky sady nangery lio. Le nandeha taminy ao Paoly sady nivavaky noho nametra-tana taminy ka nanafaky ty aretiny.
9 Niavy tamy Paoly eo koa ty marary hafa tamy nosy iny ao tafarani-zay, ka nafahiny ty aretin-drozy.
10 Nanome voninahitsy anay koa rozy ka nanome fanomeza maro biby. Le lafa handeha sambo hiondrananay iny, le nataon-drozy tanaty sambo ao ze raha iaby nilànay.
11 Telo vola tafara atoy, niondra sambo zahay. Nisy mariky hoe “Anakilahin’i Zeosy” tamy lohan’ny sambo iny eo. Baka a Aleksandria any sambo iny le nijano tamy nosy iny ao tamy fotoan’ny asotry.
12 Niavy tamy pôron’i Syrakosa ao zahay le nijano telo andro tao.
13 Bakeo nandeha zahay le niavy ta Regioma ao. Le narerè ty tsioky baka antimo any hamarain’iny, ka afakamarain’iny zahay le fa niavy ta Potioly ao.
14 Nahita rahalahy zahay tao, le nangataky anay rozy mba hijano fito andro tamin-drozy eo. Bakeo nandeha ta Roma any zahay.
15 Lafa naharè mikasiky anay ty rahalahy tany, le nitsena anay zisiky amy Bazarin’i Apio noho Tranombahiny Telo any. Laha vo nahita an-drozy Paoly le nisaotsy a-Ndranahary sady nahazo hery.
16 Nilitsy ta Roma ao avao zahay tamy farany. Nengà hana trano manoka Paoly, le nisy maramila raiky nampiambeny azy.
17 Fe telo andro tafarani-zay, nampikaiky an’ny manam-pahefà tamy Jiosy eo rey ie. Lafa vory raiky rozy, le hoy ty asany: “Rahalahy, gadra baka a Jerosalema any aho le namea ho an-tanan’ny Romanina eo, kanefa tsy nanao raha tsy mety tamin’olo na nanao raha nifanohitsy tamy fomban’ny razambentsika.
18 Tean’ny Romanina rey habototsy aho lafa baka nataon-drozy ankety, satria tsy nisy antony tokony hamonoa ahy.
19 Fe tsy naneky ani-zay mihintsy Jiosy rey, ka tsy maintsy nampiakatsy an’ny raha iny amy Kaisara any aho, fa tsy hoe misy raha tsy mety asarako ty firenenako.
20 Ka zay nahavy ahy hangataky hifankahita noho hiresaky aminareo io, satria ty raha tamanin’ny Israely ro mahavy ahy hirohy amy seny toy.”
21 Le hoy ty asan-drozy taminy: “Tsy nahazo taratasy baka a Jodia any mikasiky anao zahay, sady tsy nisy rahalahy bakany nitantara na nivola raha raty mikasiky anao.
22 Fe teanay ho re ty hevitsinao, satria laha ty mikasiky an’ny sekta* io, le hainay fa haratiratin’olo mbaombao.”
23 Nanao fotoa tamy Paoly amy zay rozy, le vomaiky nimaromaro ty niavy tan-tranony ao. Le nihazavanin’i Paoly tamin-drozy soa* nanomboky tamy maray zisiky hariva ty mikasiky ty Fanjakà-Ndranahary. Tsy zay fa ta handresy lahatsy an-drozy mikasiky an’i Jesosy ie, ka nampiasa ty Lalànan’i Mosesy noho ze raha niresahin’ny Mpaminany.
24 Le nino ze raha nivolaniny ty olo sisany, fa ty ilany tsy nino.
25 Le tsy nitovy hevitsy rozy ka niala tsikelikely, fa Paoly nivola an’ny raha raiky toy hoe:
“Tena marina ty raha nivolanin’ny fanahy masy tamy razambenareo tamy alalan’i Isaia mpaminany,
26 hoe: “Mandehana amy vahoaky toy any ka mivolana ho zao: “Haharè vatany nareo fe tsy ho azonareo mihintsy ty dikany, le hanenty nareo fe tsy hahita mihintsy.
27 Satria lasa mihily ty fon’ny vahoaky toy. Fa naharè ty sofin-drozy fe tsy taitsy rozy, sady fa napìn-drozy ty mason-drozy, amy zay tsy hahita mihintsy ty mason-drozy, le tsy haharè mihintsy ty sofin-drozy. Amy zay koa ty fon-drozy tsy hahay ty dikan’ny raha zay, le tsy himpoly amiko rozy ka tsy hafahiko ty aretin-drozy.”’
28 Ka tokony ho hainareo fa hambara amin’olo firenena hafa any fanavota baka amy Ndranahary zay. Azo antoky fa hijanjy ty fitoria mikasiky an’ny raha zay rozy.”
29 ——
30 Le nipetraky roe tao* tamy trano nihofàny iny ao Paoly, sady nandramby soa ani-ze olo iaby niavy taminy ao.
31 Nitory ty Fanjakà-Ndranahary tamin-drozy ie sady nampianatsy mikasiky an’i Jesosy Kristy Tompo. Tena nahasaky ie lafa nanao an’ny raha zay sady tsy nisy raha nisaka azy mihintsy.
Fanamariha ambany pejy
^ Na: “sady tea olo ka nisoa fanahy.”
^ Grika: Dike, mety ho azy ndranaharivavin’ny rariny mpamaly ty raha raty natao iny, na ivolana ty rariny amy ankapobeny.
^ Na: “nitorin’i Paoly tamy fomba feno tamin-drozy.”
^ Abt: “roe tao zista.”
