Asan’ny Apostoly 26:1-32
26 Hoy ty asan’i Agripa tamy Paoly: “Mahazo mivola iha mba hiarovanao ty vatanao.” Le naampatsin’i Paoly ty tanany, ka nivola ho zao ie lafa niaro ty vatany:
2 “Falifaly aho Agripa Mpanjaka, fa aminao eto ro ivolanako ty fiarovako ty vatako henanizao, mikasiky ty raha iaby asaran’ny Jiosy rey ahy.
3 Falifaly aho satria iha mahay soa ty fomba noho ty alihevitsy iaby amy Jiosy eo. Le mangataky anao aho mba haharitsy hijanjy ahy.
4 “Hain’ny Jiosy iaby ty fomba fiainako tamin’olo firenena raiky amiko* eo noho ta Jerosalema any, liany nahakely ahy.
5 Hain’ny Jiosy nahay soa ahy rey raha zay. Sady laha tean-drozy le afaky manamarina ani-zay rozy, fa Fariseo aho ka nanaraky an’ny sekta* farani-ze hentitsy tamy fivavahanay ao iny.
6 Fe zaho mitamà an’ny fampitamana natao-Ndranahary tamy razambentsika rey iny, le zay ty antony itsarà ahy henanizao.
7 Fampitamana zay koa ro tamanin’ny foko 12 amy firenenantsika eto rey. Mitamà hahita ty fahatanterahan’ny raha zay rozy, ka miezaky mafy manao fanompoa masy ho ahi-Ndranahary ndre andro ndre haly. Raha tamany zay mahavy an’ny Jiosy rey malay* ahy io Mpanjaka!
8 “Manino nareo ro mieritseritsy* fa tsy azo inoa hoe mamelo ty olo fa nimaty Ndranahary?
9 Nisy fotoa aho tena niresy lahatsy hoe tokony hanao ze raha iaby azoko atao mba hanohera ty anaran’i Jesosy baka a Nazareta any iny.
10 Le zay mihintsy ty nataoko ta Jerosalema any. Maro ty olo masy nigadrako, satria nahazo fahefà baka amy sefon’ny mpisoro aho. Lafa hovonoa koa rozy, le nanoha an’ny raha zay aho.
11 Niforosè an-drozy handà ty finoan-drozy aho, ka nanasazy an-drozy matetiky tamy synagoga iaby any. Niromotsy tamin-drozy aho, ka nivitako ty nanenjiky an-drozy ndre tamy tanà hafa any aza.
12 “Zay nandehanako ta Damaskosy any io, satria nahazo fahefà noho nahazo alala baka amy sefon’ny mpisoro aho.
13 Mbo tan-dala eny aho tamy andro midỳ, le nahita hazavà baka an-danitsy any namirapiratsy mandilatsy ty masoandro. Nanodidy ahy noho azy niaraky amiko rey raha iny.
14 Le nilavo tamy tany eo zahay iaby, sady naharè feo aho nivola tamiko tamy safà hebreo hoe: ‘Saoly, Saoly, manino iha manenjiky ahy io? Ho azon-draha amy ty raha ataonao iha laha tipahinao avao ty hazo fitsiboha!’*
15 Fe hoy ty asako: ‘Ia moa lahy iha io?’ Le nivola Tompo hoe: ‘Zaho Jesosy, azy enjehinao iny.
16 Fe miongaha, le mitsangàna! Miseho aminao aho satria hifily anao ho mpanompo, noho ho vavolombelo hanambara ty raha fa hitanao noho ty raha mbo hatoroko anao mikasiky ahy.
17 Le hanavotsy anao amy vahoaky toy noho amin’olo firenena hafa anirahako anao aho.
18 Hirahiko iha mba hanokatsy ty mason-drozy, ka hialan-drozy amy maìky ao mba ho amy mazava ao, le hialan-drozy amy fahefàn’i Satana eo mba ho amy fahefà-Ndranahary eo. Hahazo fanengà hadisoa rozy amy zay, le hamaly soa noho hanamasy an-drozy Ndranahary manahaky ty nataony tamin’olo hafa tsy nivaliky rey koa.’
19 “Le nanaraky ze raha nivolany amiko tamy fahità baka an-danitsy any iny aho Agripa Mpanjaka!
20 Le nandeha tamin’olo nipetraky ta Damaskosy any rey tse aho, bakeo nandeha tamin’olo nipetraky ta Jerosalema any noho mbamy faritsin’i Jodia any noho tamin’olo firenena hafa rey any. Ty hafatsy nambarako tamin-drozy le hoe tokony hibebaky noho himpoly amy Ndranahary rozy, ka hampiseho amy ty raha ataon-drozy hoe fa nibebaky rozy.
21 Zay ty antony nanamboran’ny Jiosy rey ahy tamy tempoly ao, ka fa ho namonoan-drozy ahy.
22 Fe nampea-Ndranahary aho, ka mbo mitory avao zisiky androany, ndre amy ty maliniky zay ndre amy ty bevata. Le ze raha nambaran’ny Mpaminany noho nambaran’i Mosesy hoe hiseho avao ro volaniko.
23 Tsy ino zay fa ty hoe tsy maintsy nijaly Kristy, le ho voalohany amy ze hovelomy ndraiky ie, ka hitory mikasiky ty hazavà amy vahoakin’Israely noho amin’olo firenena hafa.”
24 Amy Paoly mbo nivola an’ny raha rezay mba ho fiarovany ty vatany iny, le nivola marè Festosy hoe: “Mivalikay iha Paoly! Mahagegy anao fianara maro nataonao rey!”
25 Fe hoy Paoly: “Tsy mivalikay aho Festosy Governera,* fa marina ty raha volaniko sady misy dikany.
26 Mahay soa ani-zay ty mpanjaka ka sakiko ty miresaky aminy mikasiky an’ny raha rezay. Tsy zay fa azoko antoky hoe tsy misy tsy hainy raha iaby rezay, satria tsy nisy nivony ty nanaova azy.
27 Mino ty Mpaminany va iha Agripa Mpanjaka? Haiko fa mino iha.”
28 Fe hoy Agripa tamy Paoly: “Kely sisa le fa ho naharesy lahatsy ahy ho lasa Kristiana iha.”
29 Le nivola Paoly hoe: “Mangataky amy Ndranahary aho, ndre ho ela zay ndre halaky, mba tsy ho iha raiky avao ro ho lasa manahaky ahy, fa ze olo iaby maharè ahy androany koa. Fe tsy iriko hoe horohiza seny manahaky ty mahazo ahy henanizao nareo.”
30 Bakeo nitsanga mpanjaka iny, le nitsanga koa ty governera noho Berenika noho olo niaraky nipetraky tamin-drozy rey.
31 Fe lafa niala teo rozy le nifampiresaky hoe: “Tsy nanao raha tokony hamonoa azy na hanagadrà azy lahilahy io.”
32 Le hoy Agripa tamy Festosy: “Afaky nabototsy lahilahy io laha tsy nangataky hotsarà amy Kaisara any.”
Fanamariha ambany pejy
^ Na: “firenenako.”
^ Abt: “manasara raha.”
^ Abt: “mitsara.”
^ Hazo maranitsy fitsiboha biby mba handroaha azy.
^ Abt: “Festosy hajà.”
