Asan’ny Apostoly 15:1-41
-
Alihevitsy ta Antiokia any mikasiky savatsy (1, 2)
-
Nandesy ta Jerosalema any alihevitsy iny (3-5)
-
Nivory ty anti-panahy noho ty apostoly (6-21)
-
Taratasy baka amy filan-kevi-pitantana (22-29)
-
Mifaly lio (28, 29)
-
-
Nampahery an’ny fiangona rey taratasy iny (30-35)
-
Nisaraky lala Paoly noho Barnabasy (36-41)
15 Le nisy olo nijotso baka a Jodia any rezay nampianatsy an’ny rahalahy rey hoe: “Tsy ho avotsy nareo laha tsy savary araky ty Lalànan’i Mosesy.”
2 Le nifamaly noho nialy hevitsy tamin-drozy Paoly noho Barnabasy. Farany nifanaraky rozy hoe hiakatsy ho amy apostoly noho anti-panahy a Jerosalema any rey Paoly noho Barnabasy noho ty sisany tamin-drozy, mba handay an’ny alihevitsy* iny.
3 Naterin’ny fiangona tan-tenantenan-dala eny amy zay lahilahy rey, bakeo nanohy ty lian-drozy mba Fenisia noho mba Samaria any, sady nitantara tamy an-tsipiriany hoe nisy olo firenena hafa lasa nanompo a-Ndranahary, le tena nahafalifaly an’ny rahalahy rey raha zay.
4 Lafa niavy ta Jerosalema any rozy, le nandramby soa an-drozy ty fiangona noho ty apostoly noho ty anti-panahy. Le nitantaranin-drozy ty raha maro natao-Ndranahary tamy alalan-drozy.
5 Fe nitsanga ty mpino sisany azy fa tamy sektan’ny Fariseo tao taloha rey, le nivola hoe: “Tokony hosavary ty olo firenena hafa le hampanorihy ty Lalànan’i Mosesy.”
6 Farany nivory apostoly noho anti-panahy rey mba handiniky an’ny raha iny.
7 Le nialy hevitsy marè rozy, ka lafa nivita raha zay, le nitsanga Petera ka nivola hoe: “Rahalahy, hainareo soa fa baka am-boalohany any Ndranahary ro nifily ahy taminareo eo, mba ho amy alalako ro haharezan’olo firenena hafa ty vaovao soa, noho hahavy an-drozy hino.
8 Le Ndranahary, azy mahay ty raha am-po ao iny ro nanome porofo hoe ekeny rozy lafa nameany fanahy masy, manahaky ty nataony tamintsika koa.
9 Le nitovy avao ty nandaisany antsika noho olo reo, ka nidioviny koa ty fon-drozy satria rozy nampiseho finoa.
10 Ka manino nareo henanizao ro mitsapa toetsy a-Ndranahary, le forosevanareo hasia bao* ty vozon’ny mpianatsy, kanefa samby tsy nahazaka an’ny raha zay ndre tsika ndre ty razambentsika?
11 Fa tsika mino hoe ty hasoam-panahy miavaky nasehon’i Jesosy Tompo ro anavota antsika, manahaky ty anavota an-drozy koa.”
12 Le tsy nivola rozy lafa naharè an’ny raha zay, ka nijanjy an’i Barnabasy noho Paoly nitantara mikasiky famantara noho fahagagà* maro natao-Ndranahary tamy alalan-drozy, tamin’olo firenena hafa rey teo.
13 Lafa nitampitsy ty resakin-drozy, le hoy Jakoba: “Rahalahy, janjino aho.
14 Nitantara tamy an-tsipiriany Simeona* teo hoe vo sambany zay Ndranahary ro naneky* an’ny olo firenena hafa reo, mba hangalany olo baka amin-drozy handay ty anarany.
15 Mifanaraky amy raha zay ty safàn’ny Mpaminany, araky ty voasoratsy hoe:
16 ‘Afarani-zay, le himpoly aho ka hatsangako ndraiky ty tranolain’i* Davida azy fa nikopaky iny. Hamboariko ndraiky ze sisa tsy nirava taminy ka hampoliko amy pilasiny.
17 Amy zay hazoto hila an’i Jehovah ty olo sisa tavela, miaraky amin’olo baka amy firenena iaby any, zany hoe olo kaihy amy anarako, hoy Jehovah, azy hanao an’ny raha zay iny.
18 Fa nihay liany fa ela raha zay.
19 Ka zao ty hevitsiko: Aleo tsy sahiràny olo firenena hafa manompo a-Ndranahary reo,
20 fa ndao tsika hanoratsy ho an-drozy mba hifalean-drozy ty raha voaloton’ny sampy, noho hifalean-drozy ty fijangajangà* noho ty biby nifeozy* noho ty lio.
21 Tsy zay fa liany fa ela Mosesy ro nana olo nitory mikasiky azy saky tanà, le nivakỳ marè amy synagoga ao saky sabata ze raha nisoratiny.
22 Le nanapa-kevitsy ty apostoly noho ty anti-panahy noho ty fiangona iaby fa hifily olo baka amin-drozy eo, le haniraky an-drozy hiaraky amy Paoly noho Barnabasy handeha a Antiokia any. Le Jodasy, azy kaihy hoe Barsabasy iny, noho Silasy ro nirahin-drozy. Samby nana andraikitsy bevata tamy rahalahy reo teo rozy roe lahy.
23 Ho zao ty raha nisoratin-drozy tamy taratasy nampandesin-drozy an’ny olo reo:
“Ho an’ny rahalahy firenena hafa a Antiokia noho a Syria noho a Kilikia any. Miarahaba anareo zahay rahalahinareo, zany hoe ty apostoly noho ty anti-panahy!
24 Nirenay fa nisy taminay niavy tany, le nivola raha nampiasa loha anareo, ka nanao ze hampihozonkozo ty finoanareo. Fe tsy nampanovinay an-drozy raha zay.
25 Le nifanaraky zahay iaby hoe hifily olo hirahy ho aminareo any hiaraky amy rahalahy teanay rey, tsy ia zay fa Barnabasy noho Paoly.
26 Samby fa nahafoy ty ain-drozy ho an’ny anaran’i Jesosy Kristy Tompontsika rozy.
27 Le maniraky an’i Jodasy noho Silasy zahay mba hiresaky mivanta an’ny raha zay aminareo koa.
28 Satria tean’ny fanahy masy noho teanay ty tsy hampanday enta mavesatsy anareo, laha tsy raha tsy maintsy tandrema retoa avao:
29 Ty mifaly ty raha natao soro ho an’ny sampy, noho ty lio, noho ty biby nifeozy,* noho ty fijangajangà.* Hahasoa anareo ty fanoriha an’ny raha reo avao. Soasoava* nareo!”
30 Le nalefa lahilahy rey ka nijotso ta Antiokia any. Navorin-drozy amy zay ty mpianatsy iaby, le namean-drozy an’ny taratasy iny.
31 Lafa baka namaky an’ny taratasy iny mpianatsy rey, le nifalifaly satria nampahery an-drozy raha iny.
32 Nanao lahateny maro koa Jodasy noho Silasy mba hampahereza noho hanatanjaha an-drozy, satria mpaminany koa rozy roe lahy.
33 Nijano kelikely tao tse rozy, le bakeo nalefan’ny rahalahy rey himpoly soa amy azy naniraky an-drozy rey any.
34 ——
35 Fe Paoly noho Barnabasy nijano ta Antiokia any, le nampianatsy sady nitory ty vaovao soa mikasiky ty safàn’i Jehovah niaraky tamin’olo maro hafa.
36 Andro vitsivitsy tafara atoy, le hoy Paoly tamy Barnabasy: “Ndao amy zay* tsika himpoly hitsidiky an’ny rahalahy amy tanà kiraidraiky nitoriantsika ty safàn’i Jehovah rey, mba hahitantsika hoe manao akory rozy rezay any.
37 Nitapa-kevitsy handay an’i Jaona, azy kaihy hoe Marka iny Barnabasy.
38 Fe tsy nazoto handay an’i Marka niaraky tamin-drozy Paoly, satria nanenga an-drozy ie tamy rozy ta Pamfylia any, ka tsy nandeha niaraky amin-drozy nanao an’ny asa iny.
39 Le nifamaly biby rozy roe lahy sady samby neloky, ka nisaraky. Nandesin’i Barnabasy Marka, le nandeha sambo nana a Sipra any rozy.
40 Fa Paoly nifily an’i Silasy bakeo nandeha, lafa baka nangataky tamy Jehovah rahalahy rey mba hampiseho hasoam-panahy miavaky tamy Paoly.
41 Le nandeha mba Syria noho mba Kilikia any ie, ka nanatanjaky an’ny fiangona tany rey.
Fanamariha ambany pejy
^ Na: “problemo.”
^ Na: “joko.”
^ Na: “fambara.”
^ Zany hoe Petera.
^ Na: “nidary.”
^ Na: “trano rantsakazon’i; tranon’i.”
^ Na: “nivonoa fe tsy nalatsa-dio.”
^ Na: “nivonoa fe tsy nalatsa-dio.”
^ Na: “Veloma.”
^ Na mety hoe “tse.”
