Asan’ny Apostoly 14:1-28
14 Le nilitsy tamy synagogan’ny Jiosy ta Ikonioma any rozy roe lahy. Tena nahay nandaha-teny rozy ka maro biby ty olo lasa mpino, ndre Jiosy zay ndre Grika.
2 Fe Jiosy tsy nino rey nampirisiky noho nitao ty olo firenena hafa mba hanohitsy an’ny rahalahy rey.
3 Le nitory elaela tao rozy roe lahy, sady tena nahasaky lafa nanao an’ny raha zay satria nahazo fahefà baka amy Jehovah. Nataony nahavita famantara noho fahagagà* rozy, mba hanaporofoany fa tena marina ty safà nitorỳ mikasiky ty hasoam-panahiny miavaky.
4 Fe tsy nitovy hevitsy ty ankamaroan’olo tan-tanà ao, fa ty sisany niaraky tamy Jiosy rey, le ty ilany niaraky tamy apostoly rey.
5 Le nila aly sady ta ho nitoraky vato an-drozy roe lahy ty olo firenena hafa noho ty Jiosy noho ty mpitariky tamy Jiosy eo.
6 Fe nambara an-drozy roe lahy raha zay, ka nilay mbamy tanà a Lykaonia any rey rozy, zany hoe ta Lystra noho ta Derbe, noho tamy faritsy manodidy an’ny tanà reo any.
7 Nanohy nitory ty vaovao soa avao rozy lafa tany.
8 Le nisy lahilahy kombo zay ty ta Lystra ao. Nalemy tomboky baka an-tron-dreniny* any ie, ka mbo tsy nandeha mihintsy. Le nipetraky
9 nijanjy an’i Paoly nandaha-teny ie. Nanenty soa azy Paoly le nihitany fa azo tahà ie satria nanam-pinoa.
10 Nivola marè taminy amy zay Paoly hoe: “Mitsangàna soa!” Avy le nitsanga lahilahy iny ka nanomboky nandeha.
11 Lafa nahita an’ny raha nataon’i Paoly zay vahoaky rey, le nikorakoraky tamy safà lykaonianina hoe: “Lasa mitovy amin’olombelo ndranahary rey, le nijotso amintsika etoy!”
12 Le nikaihin-drozy hoe Zeosy* Barnabasy, fa Paoly nikaihin-drozy hoe Hermesy* satria ie avao ro matetiky mivola.
13 Le nanday aomby noho fehiloha folera nana amy vavahady eny ty mpisoron’i Zeosy. Tamy filira amy tanà iny eo ty nisy an’ny tempolin’i Zeosy io. Le ta hanao soro niaraky tamy vahoaky rey mpisoro iny.
14 Fe lafa naharè an’ny raha zay apostoly Barnabasy noho apostoly Paoly, le nandriatsy ty sikin-drozy sady nilailay nana amy vahoaky rey eny ka nivola marè hoe:
15 “Nao rolahy, manino nareo manao ho toy io? Olombelo manahaky anareo avao lahy zahay! Le mitory ty vaovao soa aminareo zahay mba hialanareo amy raha tsy misy dikany manahaky an’io, ka hamonjeanareo ani-azy Ndranahary velo iny. Ie ro nanao ty lanitsy noho ty tany noho ty riaky noho ty raha iaby amy raha reo ao.
16 Nengany hanao ze teateany avao ty firenena iaby taloha,
17 fe ty raha soa natao-Ndranahary ro vavolombelo manaporofo ty maha ie azy. Nanao raha soa vatany ie, ka nandatsaky ora ho anareo baka an-danitsy any noho nanome anareo vokatsy maro biby amy fotoany. Le nataony vintsy hany nareo sady nifenoany hafalea ty fonareo.”
18 Fe ndre nivola ani-zay rozy roe lahy, le fa tsy ho nahatanjaky an’ny vahoaky rey tsy hanao soro ho an-drozy.
19 Fe nisy Jiosy niavy baka a Antiokia noho Ikonioma any, ka nandresy lahatsy an’ny vahoaky rey. Le nitoraky vato an’i Paoly rozy sady nitaritariky azy ho ambalikin’ny tanà iny any, satria nieritseritsy rozy hoe fa maty ie.
20 Fe lafa nivorivory tamy Paoly teo mpianatsy rey, le nitsanga ie sady nilitsy tan-tanà ao. Le niala tao rozy amy Barnabasy hamarain’iny, ka nandeha a Derbe any.
21 Nitory ty vaovao soa tamy tanà io ao rozy, sady nanampy olo maro biby ho lasa mpianatsy. Bakeo rozy nimpoly ta Lystra noho ta Ikonioma noho ta Antiokia any.
22 Le nampahery an’ny mpianatsy tany rey rozy sady nampirisiky an’ny mpianatsy rey tsy hiala amy finoa, ka nivola hoe: “Tsy maintsy miatriky fijalea maro tsika vo ho tafilitsy amy Fanjakà-Ndranahary ao.”
23 Nanendry anti-panahy tamy fiangona kiraidraiky eo koa rozy roe lahy, sady nivavaky noho nifaly hany, le nametraky an-drozy tamy Jehovah, satria nino azy rozy.
24 Le nandalo mba Pisidia any rozy roe lahy ka niavy ta Pamfylia any.
25 Le lafa baka nanambara ty safà-Ndranahary ta Perga ao rozy, le nandeha nijotso nana a Atalia any.
26 Lafa baka ao amy zay rozy le nandeha sambo nana a Antiokia any. Tao rahalahy rey ro nangataky tamy Ndranahary mba hampiseho hasoam-panahy miavaky tamin-drozy roe lahy, tamy rozy hanomboky an’ny asa iny. Fa nivitan-drozy tanteraky asa iny henanizao.
27 Lafa niavy tao rozy, le navorin-drozy ty fiangona. Le nitantaranin-drozy roe lahy tamin’olo rey ty raha maro natao-Ndranahary tamy alalan-drozy mirahalahy, noho ze raha natao-Ndranahary mba hahafahan’olo firenena hafa mampiseho finoa.*
28 Le nijano elaela niaraky tamy mpianatsy rey rozy.
Fanamariha ambany pejy
^ Na: “fambara.”
^ Na: “an-kibon-dreniny.”
^ Na: “Jopitera.”
^ Na: “Merkory.”
^ Abt: “mba hanokafa ty varavaran’ny finoa ho an’ny olo firenena hafa.”
