Qullaawa Maxaafa nabbawa ceeꞌmishannohenso, baxisannohe? Baxisannohe woy ceeꞌmishannohe gede assannohu nabbawatto garaati. Hanni Qullaawa Maxaafa nabbawate hasatto lexxitannohe gedenna hagiirsiissannohe gede kaaꞌlannore laꞌno.

Addaxxinannitanna huwatate qarrissannokki tiro doodhi. Nabbawatto maxaafi huwatate qarrissannoti biꞌree qaalla woꞌmitinoha ikkiro, nabbawa baxisannohekkiti egennantinote. Konni daafira, huwatate qarrissannokkitanna rosu wodanikkira coanno gede kaaꞌlitannota Qullaawu Maxaafi tiro hasiꞌri. Qoleno doodhatto tiro hedo lendikki woy xeinsikki qorophine tirroonnita ikka hasiissannose. a

Yannate uduunnicho horoonsiꞌri. Xaa yannara Qullaawa Maxaafa attammoonniha calla ikkikkinni, elekitirooniksete uduunnichinnino afiꞌra dandiinanni. Mite Qullaawu Maxaafi tiro interneetete aana nabbawa woy kompiyuterete, taabileetete woy mobayilete aana dirrisiꞌne nabbawa dandiinanni. Mite Qullaawu Maxaafi tiro, nabbabbanni nootto haja ledo xaado afidhinota wole Qullaawu Maxaafi qummeeshshuwa, wole agurina wole haammata Qullaawu Maxaafi tiro laꞌꞌa dandaatto gede assine qixxeessinoonnite. Qullaawa Maxaafa nabbawantenni qaddaꞌnoonniha macciishsha hasiꞌrittoro, mitu afiinni qixxeessinoonnita macciishsha dandaatto. Batinyu manni doogo haꞌranno wote, uduunne hayishshiꞌranno wote, woy macciishsha hoolannokkire wolere assanno wote qaddaꞌnoonnire macciishsha baxanno. Kuri giddo atera injiitannohe hayyo horoonsiꞌra dandaatto.

 Qullaawa Maxaafa xiinxallate kaaꞌlanno uduunne horoonsiꞌri. Togoo uduunni niwaawekkinni roore horo afiꞌratto gede kaaꞌlannohe. Qullaawu Maxaafi giddo kulloonni gobbuwa leellishshanno kaartuwa no; togoo kaartuwa nabbabbanni nootto gafira qummi assinoonni bayichi noowa afatenna nabbabbanni noottore roore huwatate kaaꞌlitannohe. Tenne metseeterano ikko jw.org yinanni webisayitenke aana fultanno birxichuwa, addi addihu Qullaawu Maxaafi gafi afiꞌrino tiro huwatatto gede kaaꞌlitannohe.

Addi addi hayyo horoonsiꞌri. Qullaawa Maxaafa qaccetenni qaccete geeshsha nabbawa ceeꞌmishshannota labbuhero, hasattokki lexxitanno gede roore nabbawa baxisannohe gafinni hanafa dandaatto. Qullaawu Maxaafi giddo kulloonnihu egennamino mannire afa hasiꞌrittoro, insare kulanno gafa badde nabbawa dandaatto. “ Qullaawu Maxaafi Giddo Kulloonni Mannire Xiinxalli” yitanno saaxinera Qullaawa Maxaafa xiinxalla dandiinanni doogga kulloonni. Woy mitte hajore kulanno gafa nabbawa woy mitte ikkito woꞌmitinote yannate aante garinni nabbawa dandaatto. Kuri doogga giddo mitte woꞌnaalte mayira dilaꞌꞌatto?