Jaakinna Maarliini 1988nni hanafe woꞌma yanna soqqansho soqqamanni no. Insa haaro qooxeessa rahe rosate dandoo noonsareeti; qoleno, Firenchi Giyaanahonna Guwadeloppe yinanniwa addi addi qooxeessa sonkoonninsa. Kuni lamunku qooxeessi xaa yannara Faransayete sinu biiro hunda no. Hanni, Jaakinna Maarliini mite xaꞌmo xaꞌmino.

Woꞌma yanna soqqansho hanaffinanni gede kakkayisinoꞌneri maati?

Maarliini: Lophoommahu Guwadeloppi yinanniwaati; anje noomma yannara duucha woyite amaꞌya ledo barra woꞌma sabbakeemma; ise diinaggaabbe soqqantannote. Manna baxeemma daafira 1985 roso gudanni heeꞌrenni suwisaancho ikke soqqama hanafumma.

Jaaki: Anje noommo yannara soqqansho baxxannori woꞌma yanna soqqamaano ledo hoseemmo. Rosu cufamanno woyite kaaꞌlaancho suwisaancho ikke soqqameemmo. Qoleno, mito woyite Qidaamenna Sambatu barra otobisetenni haꞌne suwisaano noowa marre ledonsa soqqammeemmo. Barra woꞌma sabbankanni honseemmo; hakkiinni hawarro baaru qacce haꞌneemmo. Hatti lowo geeshsha hagiirsiissanno yannaati!

Maarliini ledo 1988nni adhammummohunni shiima yanna gedensaanni ‘xa ninke qarrisinonkeri dino, hakko daafira mayira albinni roore disoqqammeemmo’ yee hedummo. Hakkiinni anino Maarliini ledo suwisaancho ikke soqqama hanafummo. Mittu diri gedensaanni suwisaanote rosi mine ronsummo; hakkiinni baxxitino suwisaano assine shoomminke. Guwadeloppe addi addi qooxeessira soqqammummohu gedensaanni Firenchi Giyaana sonkinke.

Lowo diro addi addi qooxeessira soqqantinara sonkoonniꞌne. Ikkina, haaro qooxeessa rossinanni gede kaaꞌlinoꞌneri maati?

Maarliini: Firenchi Giyaanu Beeteelera soqqantanno roduuwi Isayaasi 6:8 banxeemmo qummeeshsha ikkinota affino. Insa duucha woyite silke bilbiltannonke woyite haarintinohu gede assite “Baxxinanni qummeeshsha qaagginanni?” yitannonke. Insa hatto yitannonke woyite wolewa sonkankera hendoonnita anfeemmo. Hakko daafira “Haꞌneemmona sokkenke!” yineemmo.

 Albi soqqanshonke xaate ledo diheewisiinseemmo; hatto assinummoro, xa soqqammeemmo soqqansho naandeemmokki gede assitankera dandiitanno. Qoleno, roduuwunniwa shinqe insa ledo egennamate sharrammeemmo.

Jaaki: Alba soqqammeemmowa heeꞌrannohu mitu roduuwi insawa keeshshinammora hasidhino daafira haꞌneemmota hoolate woꞌnaaltino. Kayinni Guwadeloppe yinanniwiinni haꞌnanni heeꞌneenna mittu rodii Yesuusi Maatewoosi 13:38te “Gatu tenne alameeti” yee coyiꞌrino qaale qaagiissinonke. Hakko daafira wolewa sonkeenanke haꞌneemmo woyite heeꞌnummowanno heeꞌnummoro soqqammeemmohu mitto gate ikkinota qaangeemmo. Qoleno, ninke injonni roore qoqqowonkenna hakko heeꞌranno manna illachinsheemmo.

Haaro qoqqowonke marreemmo woyite hakko heeꞌranno manni hagiirraamma ikke heeꞌra dandiinota laꞌneemmo. Ninkeno, hakko heeꞌranno manni gede ikkine heeꞌrate woꞌnaalleemmo. Intanni sagale baxxitara dandiitanno; ikkirono, fayyimmankera qorophinanni insa itture inteemmo, aggure angeemmo. Baalante soqqammeemmo soqqansho daafira danchare coyiꞌrate sharrammeemmo.

Maarliini: Hakko heedhanno roduuwiwiinnino lowore ronsoommo. Firenchi Giyaanaho soqqammanna ikkinore horo dihaweemma. Mitto barra biite xeena gananni noo daafira birreenna fulle soqqammeemmo yine hendoommo. Kayinni mitte rodoo “Haꞌnummoro woyya ikka?” yitue. Hakkiinni dhagge assiꞌre, “Xeenu dishaannonke” yuumma. Ise “xilakki adhi biskilliitetenni haꞌneemmona” yitue. Xila amaxxine biskilliite kandanni gara rosoommahu hakka woyiteeti. Hatti rodoo kula hooggoommero xeeni yannara sabbaka dandiinanni gara horo diroseemma.

Mite 15 hinge addi addi qooxeessa sonkoonniꞌne. Ikkina, wolewa haꞌrate daafira wolootaho kaaꞌlitanno yitinanni amaale nooꞌne?

Maarliini: Wolewa haꞌnanni woyite qarra ikkannori dihooganno. Soqqanshonniwiinni hinganni woyite fooliishshiꞌnanni mine afiꞌra hasiissanno.

Jaaki: Duucha woyite mine soorriꞌneemmo yannara mininkera giddooyidira qalame buureemmo. Sinu biirora soqqantanno roduuwi mittu qooxeessira lowo yanna keeshshineemmokkita affuro “Jaaki tenne yannara mineho qalame buudhitooti” yitannoe.

Maarliini haꞌnanni woyite uduunne biddi biddi assinanni gara rossinote. Baalanka uduunne kaartoonete giddo worte aanaho “biso hayishshiꞌnani  mine” “gonxanni minenna” “sagale qishiꞌnanni mine” yite borreessitanno. Hakko daafira haaro minenke iillineemmo woyite kaartoonna wodhineemmoha injiino bayicho afiꞌneemmo. Ise kaartoonete giddo mayi mayi nooro borreessite aanaho gantanno daafira hasiꞌnoommore qarrammummokkinni afiꞌneemmo.

Maarliini: Baalankare balanxe biddi biddi assiꞌra ronsoommo daafira, maarranni heeꞌnenni soqqansho hananfeemmo.

‘Soqqanshoꞌne baala wonshate’ pirogiraameꞌne biddi assidhinannihu hiittoonniiti?— 2 Xim. 4:5.

Maarliini: Sanyo sanyo fooliishshiꞌneemmo; hattono, gambooshshuwate qixxaambeemmo. Maakisanyotenni kayise soqqansho fulleemmo.

Jaaki: Aganu giddo qola hasiissannonke saate nooha ikkirono, saate wonshiꞌrate diyaandeemmo. Heeshshonke giddo soqqansho balaxisiinseemmo. Soqqanshote mininni fullummo yannanni kayinse wirro minira hingammo geeshsha xaandeemmo manna baala hasaawisate woꞌnaalleemmo.

Maarliini: Boohaarrammora haꞌneemmo yannara duucha woyite tiraaktuwa adhe haꞌreemma. Mitu manni Yihowa Farciꞌraasine ikkinoommota kullummonsakki nafa ninkewa daye borro xaꞌmiꞌranno. Korkaatuno, uddiꞌneemmo garino ikko akatinke kawajjaamoho. Mannu tenne wodanchanno.

Jaaki: Qoleno mannaho dancha olliicho ikkine insa Yihowa daafira rossanno gede kaaꞌlineemmo. Lawishshaho, mininke qooxeessira uulla tuttungoonni woraqqatanna ishine xinqe gamba asse huneemmo. Tenne huwatinohu qooxeessinke manni mito woyite “Qullaawa Maxaafa diaattonke?” yee xaꞌmiꞌranno.

Duucha yannara xeertote qooxeessira soqqantinoonni. Ikkina, hadhinoonnihu baalunku qooxeessi giddo baxxino garinni qaagginannihu no?

Jaaki: Giyaanaho mitu qooxeessi noohu lowo geeshsha xeertoteeti. Duucha woyite lamalate giddo injiitannokki doogo 600 k.m. haꞌneemmo. Amazooni dubbi giddo noohuwa Senti Eeli yinanniwa soqqammummo yanna horo dihambeemmo. Hakkira iillate injiitannokki doogo makeenunninna yowolotenni lowo saate haꞌnoommo. Hakko heeꞌrannohu rooru manni culka uꞌmannoho. Mitu manni isinni borronke naadino daafira shiima culka uyinonke! Hawarro dirijjitenke viidiyubba giddonni mitte leellinsheemmonsa. Hakko qoqqowira heeꞌrannohu batinyu manni daye laino.

Maarliini: Muli yannara, Jaaki Kamopi yinanniwa Qaagooshshu Ayyaanira lallawo shiqishara xaꞌminoonnisi. Hakkira iillate yowolotenni Oyapoki yinanni lagi aana shoole saate haꞌnoommo. Hattee yannara lowo geeshsha hagiidhinoommo.

Jaaki: Lagu giddo kinna noo bayicho dambalu batiꞌranno; hakko daafira wayi haꞌranno gari lowo geeshsha waajjishannoho. Wayi haꞌranno gari dhagge ikkanno. Yowolo laaqanno manchi worba ikka hasiissannosi. Ikkirono hagiirsiissanno yannaati. Hakko qooxeessira nooti Yihowa Farciꞌraasine lee calla ikkiturono Qaagooshshu Ayyaana ayirrisate 50 meddi yaanno manni dayino; kuri giddo mitu Ameeriku hindeeti.

Maarliini: Yihowara albinni roore soqqama hasidhanno wedelli togoo atoote afidhanno. Hatto assineemmoha ikkiro, Yihowa addaxxineemmo hattono ammananke kaajjitanno. Qoleno, duucha woyite Yihowa kaaꞌlannonke gara laꞌneemmo.

Addi addi qaale rossinoonni. Ikkina wole qaale rosate baxxitino dandoo nooꞌneni?

Jaaki: Dinonke. Addi addi qaale rosoommohu sabbakatenna songo kaaꞌlate yeeti. Qullaawu Maxaafi niwaawe shiqishammora albaanni Siranantongo a afiinni Agarooshshu Shae xiinxallo massaga hasiissinoe. Hakkiinni mitto rodoo massagoommo gari hiittooti yee xaꞌmummo. Isi “mitu yoottori leellinonkekkiha ikkirono massagootto gari danchaho” yiie. Qaaqquullu lowo geeshsha kaaꞌlitinoe. Soꞌreemmo woyite jajjabu kultannokkire kultannoe. Insawiinni lowore rosoommo.

Maarliini: Mittu qoqqowira Faransayete, Porchugaaletenna Siranantongo Afiinni Qullaawa Maxaafa xiinxalliseemma manni no. Mitte rodoo xiinxallisa gari geeshsha dandeemmakki afiinni hanafe lowo geeshsha dandeemma afiinni jeefisammara amaaltinoe. Rodoo amaaltinoe amaale kaaꞌlitinoe.

 Mitto barra balaxe mitte Qullaawu Maxaafi rosaancho Siranantongo Afiinni xiinxallise, wole kayinni gedensoonni Porchugaalete Afiinni xiinxallisoomma. Layinki rosaancho xiinxallisanna rodoo “Maarliini manchote yaattari dileellinose!”yitue. Hakkiinni ani Biraazilete mancho Porchugaalete Afiinni xiinxallisa agure Siranantongo afiinni xiinxallisanni noommata huwatoomma.

Soqqantinoonni qooxeessira noo roduuwi lubbora baxxannoꞌne. Roduuwu ledo togo lubbora jaalooꞌmitinani gede kaaꞌlinoꞌneri maati?

Jaaki: Lawishsha 11:25 “Elannohu durooꞌmanno” yitanno. Woloota kaaꞌlate badhera dihingeemmo. Gambooshshu Addaraashe gatamarranni woyite mitu roduuwi, “Konne looso halashshaano loossona aguri” yitannoe. Hakkiinni “Anino halashshaanchoho. Loonsanniri heeꞌriro anino loosa hasiissannoe” yeemmonsa. Mito woyite ninke baalunkura uminke dilgo assiꞌneemmo yanna hasiissannonkeha ikkirono, tini wolootaho danchare assineemmota hooltankera diwodhineemmo.

Maarliini: Mitto mittonka roduuwa kaaꞌlate sharrammeemmo. Konnira mitu roduuwira qaaqquullensa towaatannohunna rosu mininni mare abbannohu hasiisannonsa yanna mamooteetiro anfeemmo. Hakkiinni insa kaaꞌlate pirogiraamenke biddi assiꞌneemmo. Roduuwinkera kaaꞌlo hasiissannonsa woyite donde marre kaaꞌlineemmonsa daafira insa ledo lubbora jaalooꞌminoommo.

Sabbakkannori roore hasiissannowa soqqamaꞌnenni mayi atoote afidhinoonni?

Jaaki: Woꞌma yanna soqqansho heeshshonke hagiirru woꞌminota assitino. Duucha woyite Yihowa kalaqinoha addi addi kalaqama laꞌꞌate tunceenyi noonke. Qarra ikkanno coyi heeꞌrirono, ayewano heeꞌnummoro Maganu manni kaaꞌlannonketa anfoommo daafira giddooyidi keere afiꞌnoommo.

Wedellichu noommo yannara poletiku hajora anga wodha giwoommo daafira Firenchi Giyaanaho usuramoommo. Misiyoone ikke hakkira higeemmotanna usuru mine noore mare Qullaawa Maxaafa xiinxallisate qoosso afiꞌreemmo yee horo hede diegennoommo. Addaho, Yihowa lowo geeshsha maassiꞌrinonke!

Maarliini: Woloota kaaꞌlaꞌyanni lowo hagiirre afiꞌroomma. Yihowara soqqamankenni lowo atoote afiꞌnoommo. Qoleno, tini minaanniꞌya ledo lubbora baxammeemmo gede assitinonke. Mito woyite Jaaki jawaante hasiissannonsa minaannanna minaama sagale koyinso yaannoe. Duucha woyite “anino hedanni noomma” yeemma. Roore woyite hedonke mittu garite.

Jaaki: Muli yannara hakimootu kaanserete dhibbi amadinoeta kultue. Maarliini tenne macciishsha baxxannokkiha ikkirono, mitte hige togo yoommose: “Bullaꞌya mulenni reyummoro ‘geedhe’ reyanni noommoha ikka hoogiro nafa, heeshshoꞌya danchare assatenna Yihowara soqqamate horoonsiꞌroommo daafira hagiirraamoho.”—Kal. 25:8.

Maarliini: Yihowa hendoommokkita soqqanshote qoosso oyeenke loonseemmo yine hende egenninoommokki looso loonsammora fajjinonke. Heeshshonke hagiirru woꞌminote. Woꞌmunni woꞌma Magano addaxxineemmo daafira dirijjitesi sokkunkewa baalawa haꞌneemmo.