GUWUURSHA
Bohamino Manchi Ledo Hiittoo Xaadi Heeꞌrankera Hasiisanno?
Maasterbeeshiine Maganu effire giwanno gadeeti; qolteno tini gade mittu manchi isonooto calla hagiirsiisate aana illachchishanno gedenna maaeela coye assaawanno gede assitanno. a Togoore assanno manchi wole manna siimu xaadi hasatto fulate kaaꞌlanno uduunnichchi gede asse laꞌꞌa jammaranno. Kuni manchi siimu xaado lamu manni mimmitoho baxille leellishate assannore ikkinohu gede ikkikkinni, yannate geeshshi hagiirre afiꞌratenna siimu xaadi yorto qiissiꞌrate assinanniri gede asse laꞌꞌanno. Siimu xaadi yorto konni garinni qiissiꞌra kayinni yannate geeshshalla kaaꞌlitanno. Halaale coyiꞌniro, maasterbeeshiine ‘foorre, battenna busha yorto’ labbinota maalu yorto shaantenni roore kakkayissanno.—Qolasiyaasi 3:5.
Hawaariya Phaawuloosi togo yee borreessino: “Jaallaꞌya, . . . Maganu waajjanni coꞌo keeraanchimma assinanni, mannimmanna [ayyaana] batteessannori duuchchunni umonke keereensiꞌno.” (2 Qorontoosi 7:1) Tenne amaale loosu aana hosiisa kabbaade ikkitinoheha ikkiro, hexxo mudhitooti. Yihowa ayeewoteno ‘gatona yaatenna [kaaꞌlate] qixxaawinoho.’ (Faarso 86:5; Luqaasi 11:9-13) Wodanikki ateneeto bushiishasinna mito wote qeelamittorono tenne gade agurate sharramakki danchu wodani nooheta leellishshanno. Hakkiinni saeno, “Maganu wodaninkenni roore ikkinotanna woꞌmanka egenninota” habbooti. (1 Yohaannisi 3:20) Maganu cubbonke calla ikkikkinni ninkeneeto gudise laꞌꞌanno. Ninke seekke egenninonke daafira, maaro afiꞌrate giddonkenni huucciꞌneemmo huuccatto macciishshanno. Mittu qaaqqi qarramiro annisiwa xooqannonte gede, atino umokki heeshshi assite giddokkita Maganoho huuccattotenni kuꞌla horonta waajjitooti. Yihowa keeraancho tiia aannohe. (Faarso 51:1-12, 17; Isayyaasi 1:18) Huuccattokki ledo sumuu yaannore assa hasiissannoheti dihuluullissannote. Lawishshaho, teeda baꞌino misilla laꞌꞌatewiinni, hattono bushu jaaloomiwiinni xeertiꞌra hasiissannohe. b
Maasterbeeshiinete gade qeeꞌlate qarrissuheronna keeshshituhero, ammanino annikkira woyi amakkira, woyi ayyaanaamittetenni gikki yiinohura, muli jaalikkira qarrakki hasaaphphi. c—Lawishsha 1:8, 9; 1 Teselonqe 5:14; Titoosi 2:3-5.
a Maasterbeeshiinete yaa siimu xaadi hasatto qiissiꞌrate yine meessiha sirote biso amammaxxate.
b Batinynye maate kompiyuterensa maatete miilla eꞌanninna fultanni laꞌannowa woransanni, kompiyutere doogimale horoonsidhannokki gede kaaꞌlitannonsa qaafo adhitino. Qoleno, mite maate gariweelo coye fixxite gatissanno pirogiraame kompiyuterensa giddora eessidhino. Ikkeennano gariweelo coye woꞌmunni woꞌma fixxite gatissanno pirogiraame dino.
c Maasterbeeshinete gade qeeꞌlate assa hasiissannohere afate, Bocaasa 2006 Baqqi Yiiyye! yinanni metsiheetera, “Wedellu Xaꞌmo . . . Tenne Gade Qeeꞌla Dandeemmohu Hiittoonniiti?” yaanno birxichchonna Wedellu Xaꞌmanno Xaꞌmonna Mala Ikkitanno Dawaro yinanni maxaafa (Amaaru afoo) Xiraaze 1, qoola 205-211 lai.
