Jézabel ayeke na mbeni molenge-wali so iri ti lo ayeke Athalie, lo yeke tâ gï sioni tongana mama ti lo ni. Athalie asara mariage na gbia ti Juda. Na ngoi so koli ti lo akui, molenge ti lo ti koli la akomanse ti komande. Na ngoi so molenge ni akui, Athalie asara si lo wani lo ga gbia ti Juda. Na pekoni, lo gi ti futi ahale ti gbia kue, na lege so lo fâ azo kue so alingbi ti ga gbia na place ti lo, même a-âta ti lo wani ti koli. Mbeto ti lo asara azo kue.

Kota prêtre Jéhoïada na wali ti lo Jéhoshéba ahinga so ye so Athalie ayeke sara so ayeke sioni mingi. Ala zia fini ti ala na lê ti kuâ ala honde mbeni âta ti Athalie ni so ayeke bébé, iri ti lo ayeke Joas. Ala bata lo na temple.

Na ngoi so Joas awara ngu mbasambala, Jéhoïada abungbi amokonzi nga na azo ti mara ti Lévi na lo tene na ala, lo tene: ‘Ala bata yanga ti temple nzoni, ala zia zo oko alï ape.’ Na pekoni, Jéhoïada asara si Joas aga gbia ti Juda na lo zia couronne na li ti lo. Azo ti Juda adekongo, atene: ‘Gbia na nduzu!’

Gbia-wali Athalie amä bruit ti azo ni na lo gue na temple. Na ngoi so lo bâ fini gbia ni, lo dekongo, lo tene: “Aï, azo ti fango mbi! Aï, azo ti fango mbi!” Amokonzi agbu sioni gbia-wali ni, ala sigi na lo, na a fâ lo. Me ka so sioni sarango ye ti lo apusu mara ni ti sara aye so ayeke na lege ni ape so, a yeke sara na ni tongana nyen?

Jéhoïada amû maboko na mara ni ti te mbeni mbele na Jéhovah so na yâ ni ala mû zendo ti voro gï Lo oko awe. Jéhoïada ahunda na ala ti kungbi temple ti Baal na sese nga ti fâ yâ ti ayanda ni kete kete. Lo zia aprêtre nga na azo ti mara ti Lévi ti sara kua na yâ  ti temple tongaso si azo ni alingbi ti kiri ti voro Nzapa kâ encore. Lo zia ambeni zo ti bata yanga ti temple ni tongaso si mbeni zo so aga sioni alingbi ti lï kâ ape. Na pekoni, Jéhoïada nga na ambeni mokonzi amû Joas ague na lo na yangbo ti gbia, na ala zia lo na ndö ti trône. Terê ti azo ti Juda anzere. Ala lingbi fadeso ti voro Jéhovah, so sioni wali Athalie nga na tënë ti vorongo Baal ayeke dä encore ape so. Mo bâ tongana nyen la so Jéhoïada asara ye na mbeto ape so aga na ye ti nzoni na gbâ ti azo?