“Ti sala si a hinga iri ti Jéhovah”

NA NDO lê sese mobimba, Tour ti Ba Ndo na Réveillez-vous! ayeke ambeti-sango so azo aye tënë ni mingi ngbanga ti atënë ti yingo so ayeke na yâ ni nga ngbanga ti anzoni ye so ala yeke fa. Ti fa na gigi tâ tënë so, ade ti ninga pëpe, mbeni wadikongo ambeti-sango so, so alango na kodoro ti France, asû mbeti so:

“Mbi yeke mbeni maseka-wali so a dü mbi na Afrika na mbi gue na da-mbeti ayo pëpe. A ninga mingi pëpe mbi to nda ti diko ambeti-sango ti ala. Teti so atënë ti yâ ni agboto lê ti mbi mingi, mbi bâ fadeso nene ti dikongo mbeti. Gi ngbanga ti ambeti-sango ti ala, mbi kono hingango ye ti mbi na mbi lingbi ti sû mbeti na afaute mingi pëpe na yâ ni.

“Bê ti mbi adö ti bâ so i yeke fa nda ti ye na ndo azo, na ndo sese nga na ndo Wasalango ye kue. Ambeti-sango so ayeke fa ye polele na asala si zo awara tâ nzara ti dikongo mbeti. A lingbi ti wara mara ti kode ti fango ye tongaso na mbeni ndo nde pëpe, kode ti fango ye so andu mara ti azo kue gi na yâ ti oko ngoi.

“Bê ti mbi adö nga ti bâ so, i sala ye so kue pëpe ti wara na nginza, me gi ti sala si a hinga iri ti Jéhovah. Mbi hinga so Nzapa ayeda na ye so i yeke sala. Singila na i mingi, na mbi wa i ti ngbâ ti wara ngangu so alondo na Wasalango ye kue ti tene i ngbâ ti fa lege na azo so ague kirikiri.”

A-Témoin ti Jéhovah amû tele ti ala ti manda Bible na azo na yâ ti akodoro 235. Na a yeke sigigi fadeso na Tour ti Ba Ndo na ayanga ti kodoro 148 nga Réveillez-vous! na ayanga ti kodoro 87. A sigigi na ambeti-sango so ti yä na iri ti mbeni zo pëpe. Awango ti Bible nga na afini sango so ayeke na yâ ni ayeke ti yekia na iri ti Wasalango ye kue, so atene: “Mbi yeke L’Eternel [“Jéhovah”, NW ] . . ., Lo so awa mo si mo ga nzoni.” (Esaïe 48:17). Zia mo wara aye ti nzoni na dikongo lakue Mbeti ti Nzapa legeoko na ambeti-sango so atënë ti yâ ni aluti na ndo ti Bible.