Gail, so e sara fade tënë ti lo na yâ ti mbeni mbage so ahon, ahinga ape wala lo yeke wara ande ngangu ti hon ndo ti vundu ti kuâ ti koli ti lo. Me, lo yeke ku kungo ti kiri ti bâ ande koli ti lo ni na yâ ti fini dunia so Nzapa amû zendo ni so. Lo tene: “Versê so mbi ye tënë ni mingi, a yeke Apocalypse 21:3, 4.” A tene: “Nzapa wani ayeke duti ande na ala. Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”

Gail atene: “Tënë ni kue la ayeke na yâ ti zendo so. Me a sara mbi mawa ti bâ so, azo so agirisa mbeni zo so ala ye lo mingi ahinga pëpe so lege ayeke dä ti kiri ti bâ afami ti ala so akui.” Gail asara ye alingbi na ye so lo mä na bê na ni, na sarango kua ti fango tënë ti Nzapa teti al’heure mingi, si lo peut ti fa na azo zendo ti Nzapa so atene fade “kuâ ayeke duti ande dä mbeni pëpe.”

Peut-être mo tene: ‘Mbi croire na tënë ni ape!’ Me, bâ tapande ti mbeni koli so iri ti lo ayeke Job. Lo yeke lani na mbeni ngangu kobela na tere ti lo (Job 2:7). Atâa so Job aye ti tene lo kui, lo yeke na mabe so Nzapa ayeke zingo ande lo na kuâ na ndo ti sese. Lo tene: “A yeke nzoni Mo honde mbi na yâ ndo-ti-awakinda [wala dû ti kuâ] . . . Fade Mo iri ndo, na mbi kiri tënë na Mo; bê ti Mo aye kusala ti tïtî Mo.” (Job 14:13, 15). Job ahinga biani so Nzapa ti lo ayeke girisa lo ape nga lo yeke ku kungo ti kiri na lo na fini.

Na yâ ti ngoi kete, Nzapa ayeke zingo ande Job nga na ambeni zo mingi na kuâ, na ngoi so sese kue ayeke ga ande paradis (Luc 23:42, 43). Bible atene na Kusala 24:15, atene: ‘A yeke zingo ande akuâ.’ Jésus adë bê ti e, lo tene: “Zia bê ti ala adö pëpe ndali ti tënë so, teti ngbonga ni ayeke ga so ala kue so ayeke na yâ ti [adû ti kuâ] ayeke mä ande go ti lo na ala yeke sigigi.” (Jean 5:28, 29). Job ayeke bâ ande tongana nyen la zendo ni so aga tâ tënë. Lo yeke kiri ande “na lâ ti pendere ti lo,” na tere ti lo ayeke ga “nzoni ahon mitele ti molenge”. (Job 33:24, 25). A yeke sara ande nga mara ti ye ni so na azo kue so akiri singila ndali ti nzoni bê so Nzapa afa na mbage ti e, na lege so lo yeke zingo ande na ndo ti sese azo so akui.

Tongana vundu asara mo ndali ti so mbeni zo so mo ye lo mingi akui, peut-être aye so e londo ti sara tënë ni ge azi vundu ti kuâ ti zo ni so kue ape. Me, tongana mo gbu li na ndo ti azendo ti Nzapa so ayeke na yâ ti Bible, mo lingbi ti wara tâ beku nga mo yeke wara ngangu ti hon ndo ni.—1 aThessalonicien 4:13.

Mo ye ti hinga ye mingi na ndo ti ye so mo peut ti sara ti hon ndo ti vundu ti kuâ ti mbeni zo? Wala mo yeke hunda tere ti mo, na tapande, “Ngbanga ti nyen la Nzapa azia lege na aye ti sioni nga na pasi?” Gue na ndo ti site internet ti e, jw.org, ti bâ tongana nyen la Bible amû akiringo tënë so adë bê.