A SALA angu saki use tongaso awe, a dü mbeni molenge. Molenge ni so ayeke nde mingi na atanga ni; lo kono lo ga koli so ahon tanga ti azo kue. Na lâ ni kâ, oto wala avion ayeke dä pëpe. Aye tongana télévizion, téléphone, na radio ayeke nga lani dä pëpe.

Iri so a mû na lo ayeke Jésus. Lo ga zo so ahinga ye mingi nga so afa ye nzoni mingi ahon azo kue na ndo ti sese. Aye so azo amä yâ ni pëpe, lo yeke zi nda ni si ala mä yâ ni hio.

Jésus afa ye na azo na ndo kue so lo wara ala dä. Lo fa ye na ala na ayanga ti ngu nga na yâ ti angö. Lo fa ye na ala na yâ ti ada, nga tongana lo yeke gue na mbeni ndo. Jésus ayeke lani na oto pëpe, lo gue nga na ambeni ndo na kar pëpe. Lo tambela na ando nde nde ti fa ye na azo.

E yeke manda aye mingi na mbage ti azo. Me e lingbi ti manda aye so ayeke kota mingi ahon tanga ti aye kue na mbage ti Kota Wafango ye, Jésus. A yeke na yâ Bible si e yeke wara atënë ti lo ni. Tongana e mä atënë ni, mo bâ mo tene tâ gi Jésus la ayeke sala tënë na e.

Ngbanga ti nyen Jésus ayeke lani tâ Kota Wafango ye? A yeke ngbanga ti so a fa ye na lo. Jésus ahinga nga so ti mä ndo nzoni ayeke kota ye mingi. Me lo mä lani zo wa? Zo wa si afa ye na lo?— A yeke Nzapa, so ayeke Babâ ti lo.

Kozoni si lo ga na sese tongana zo, Jésus ayeke lani na yayu kâ na tele ti Nzapa. Tongaso, Jésus ayeke nde mingi na tanga ti azo  kue, ngbanga ti so lâ oko pëpe mbeni zo nde aduti na yayu kâ kozoni si a dü lo na sese ge. Na yayu kâ, Jésus ayeke lani mbeni Molenge so ayeke mä Babâ ti lo. Nda ni la si lo lingbi lani ti fa na azo ye so lo manda na mbage ti Nzapa. Mo lingbi ti sala ye tongana Jésus na mango babâ na mama ti mo.

Mbeni ye nde so asala si Jésus ayeke lani Kota Wafango ye ayeke so lo ye azo. Lo ye lani ti mû maboko na ala ti hinga ye na ndo Nzapa. Jésus aye lani akota zo, me lo ye nga akete molenge. Amolenge aye ândö ti duti na tele ti Jésus ndali ti so lo yeke sala tënë na ala nga lo yeke mä ala.

Mbeni lâ, ambeni babâ na mama aga na amolenge ti ala na Jésus. Me akamarade ti lo abâ lani atene Kota Wafango ye ayeke na aye mingi ti sala, si ngoi ti tene lo sala tënë na akete molenge ayeke dä pëpe. Tongaso, ala tënë na amolenge ni ti hon. Me Jésus atene lani nyen?— Lo tene: ‘I zia akete molenge aga na Mbi, i kanga lege na ala pëpe.’ Biani,  Jésus aye si akete molenge aga na tele ti lo. Atâa so Jésus ahinga lani ye mingi na lo yeke kota zo mingi, lo mû ngoi ti fa ye na akete molenge.​—Marc 10:13, 14.

Mo hinga ngbanga ti nyen Jésus afa lani ye na amolenge nga lo mä ala? A yeke ngbanga ti so lo ye si ala duti na ngia. Ni la lo fa na ala aye na ndo Nzapa, Babâ ti lo ti yayu. Mo lingbi ti sala nyen ti tene azo aduti na ngia?— Na fango na ala aye so mo manda na ndo Nzapa.

Mbeni lâ, Jésus amû mbeni kete molenge ti fa na akamarade ti Lo mbeni nene ye. Lo zia molenge ni na popo ti adisciple ti Lo. Na pekoni, na akota koli so, Jésus atene so a lingbi ala changé salango ye ti tele ti ala na ala ga tongana kete molenge so.

Jésus aye lani ti tene nyen la? Mo hinga tongana nyen mbeni kota koli, wala même mbeni kota molenge, alingbi ti ga tongana mbeni kete molenge?— Kete molenge ahinga ye mingi pëpe tongana kota zo, na lo ye ti manda ye mingi. Tongaso, Jésus atene na adisciple ti lo ti gi ti sala baba pëpe. Biani, e kue e lingbi ti manda ye mingi na mbage ti azo. A yeke nga nzoni ti hinga so afango ye ti Jésus ayeke kota mingi ahon atënë so e mveni e yeke tene.​—Matthieu 18:1-5.

Mbeni ye nde so asala si Jésus ayeke lani tâ Kota Wafango ye ayeke so lo hinga tongana nyen ti sala si aye anzere na azo. Lo fa lani ye polele si azo agbu  nda ni. Lo sala tënë na ndo ti andeke, afleur, nga na ambeni ye nde ti mû maboko na azo ti hinga Nzapa nzoni.

Mbeni lâ, Jésus ayeke na ndo ti mbeni hoto, na azo mingi aga na tele ti lo. Lo duti na lo mû na ala mbeni diskur, tongana ti so mo yeke bâ ge. A hiri ni Diskur na ndo ti Hoto. Lo tene: ‘I bâ andeke ti nduzu. Ala lu le-kobe pëpe. Ala yeke bata kobe na mbeni ndo pëpe. Me Nzapa so ayeke na yayu amû kobe na ala. I yeke kota mingi ahon ala pëpe?’

Jésus atene nga: ‘I bâ afleur ti ngonda, i bâ lege so ala yeke kono. Ala yeke sala kua pëpe. Me i bâ, ala yeke pendere mingi! Même Gbia Salomon, so ândö ayeke na nginza mingi, ayü bongo pendere tongana afleur ti ngonda so pëpe. Tongaso, tongana Nzapa ayeke bâ lege ti afleur so ayeke kono so, fade lo yeke bâ nga lege ti i pëpe?’​—Matthieu 6:25-33.

 Mo mä yâ ti ye so Jésus afa so?— Lo ye pëpe si e gi bê ti e na ndo tënë ti kobe wala bongo. Nzapa ahinga so a lingbi e wara aye so kue. Jésus ake pëpe ti tene e sala kua si e wara nginza ti vo na kobe wala bongo. Me lo tene so a lingbi e zia Nzapa na kozo ndo. Tongana e sala ni, Nzapa ayeke sala kue ti tene e wara kobe ti te nga na bongo ti yü. Mo mä na bê na tënë so?—

Tongana Jésus ahunzi tënë ti lo awe, azo atene ti ala lani nyen?— Bible atene so li ti ala kue akpe ndali ti ye so lo fa. A yeke  tâ lani nzoni mingi ti mä lo. Ye so lo tene amû maboko na azo ti sala ye so ayeke na lege ni.​—Matthieu 7:28.

Tongaso, a yeke kota ye mingi ti tene e mä Jésus. Mo hinga tongana nyen e lingbi ti sala ni?— E yeke na atënë ti lo na yâ mbeni mbeti. Mbeti ni so ayeke nyen?— A yeke Bible. So ti tene, e lingbi ti mä Jésus na dengingo mê nzoni na aye so e yeke diko na yâ Bible. Biani, Bible ayeke na mbeni pendere mbaï so afa tongana nyen Nzapa mveni atene na e ti mä Jésus. Zia e bâ ye so asi.

Mbeni lâ, Jésus amû akamarade ti lo ota, ala gue na ndo ti mbeni hoto. Iri ti ala ayeke Jacques, Jean, na Pierre. E yeke manda ande ye mingi na ndo akoli so, teti ala ota kue ayeke akota kamarade ti Jésus. Me na ngoi ni so, lê ti Jésus ato nda ti za ngangu. Abongo ti lo ato nda ti za tongana lumière, tongana ti so mo yeke bâ ge.

Na pekoni, mbeni go alondo na yayu asala tënë. Jésus na akamarade ti lo amä ni. Go ni atene: “So ayeke Molenge ti Mbi so Mbi ndoye Lo, Lo mû ngia na Mbi mingi. I mä Lo.” (Matthieu 17:1-5). Go ti zo wa la?— A yeke go ti Nzapa! Tâ tënë, a yeke Nzapa si atene na ala ti mä Molenge ti lo.

Ka ti e laso? Fade e yeke mä yanga ti Nzapa na e yeke mä Molenge ti lo, so ayeke Kota Wafango ye?— A lingbi e kue e sala tongaso. Mo dabe mo tongana nyen e lingbi ti mä ala?—

E lingbi ti mä Molenge ti Nzapa na dikongo ambaï ti Bible so asala tënë na ndo fini ti lo. Apendere tënë ayeke mingi so Kota Wafango ye aye ti tene na e. A yeke nzere ande na mo mingi ti manda aye so ayeke na yâ Bible. Na tongana mo fa na akamarade ti mo apendere ye so mo manda, mo yeke duti ande na ngia mingi.