MO HINGA ambeni molenge ti koli wala ti wali so ayeke gi ti sala ye na ngangu mingi?— Mo ye ti duti na popo ti ala? Wala mo ye ti duti gi na zo so ayeke nzoni na so aye siriri?— Kota Wafango ye atene: ‘Ngia ayeke na ala so aye siriri, teti a yeke hiri ala ande “amolenge ti Nzapa.” ’​—Matthieu 5:9.

Me ngoi na ngoi ambeni zo ayeke sala ambeni ye so ayeke so bê ti e. Tâ tënë?— Tongaso e ye peut-être ti kiri sioni ni na ala nga. Ye so asi mbeni lâ na adisciple ti Jésus tongana ala yeke gue na Jérusalem. Bâ ye so asi.

Tongana ala hon yongoro kete awe, Jésus atokua ambeni disciple ti lo na kodoro ti Samarie ti wara mbeni ndo ti tene ala hu tele dä. Me azo ni ake ti tene ala ngbâ kâ, teti vorongo ti azo ti Samarie ayeke ti lo nde. Ala ye nga pëpe tënë ti azo kue so ayeke gue na Jérusalem ti voro Nzapa.

 Tongana a yeke na mo si ye so asi, mo yeke sala nyen? Ngonzo ayeke sala mo? Mo ye nga ti sala na ala tongaso?— A yeke ye so disciple Jacques na Jean aye lani ti sala la. Ala tene na Jésus: ‘Mo ye e tene na wâ ti londo na yayu ti tï na sese, si agbi ala?’ A yeke ye ti dongo bê pëpe so Jésus ahiri ala Amolenge ti Bekpa! Me Jésus atene na ala so a yeke na lege ni pëpe ti sala ye tongaso na azo.​—Luc 9:51-56; Marc 3:17.

Tâ tënë, azo alingbi ti so bê ti e ngoi na ngoi. Ambeni molenge aye peut-être si e sala ngia na ala pëpe. Ala lingbi même ti tene: “Hon kâ!” Tongana mara ti ye tongaso asi, vundu alingbi ti sala e, ni la ape? E ye peut-être ti kiri mara ni na ala. Me a yeke nzoni e sala tongaso?—

Zi Bible ti mo na aProverbe chapitre 24, versê 29. A tene: “Mo tene pëpe, Fade mbi sala na lo alingbi na ye so lo sala na mbi; fade mbi futa lo alingbi na kusala ti lo.”

Versê so aye ti tene nyen na mo?— A ye ti tene so ye so zo ni asala na e, a yeke nzoni e kiri ni na lo pëpe. Tongana lo sala sioni na e, a yeke nzoni e sala sioni na lo pëpe. Ka tongana mbeni zo ayeke gi yanga ti mo? Lo yeke gi peut-être yanga ti mo na tenengo atënë ti mbana na mo. Peut-être lo yeke he mo na lo tene so mo sala mbito ti lo. Ka tongana lo tene mo yeke buba zo. A yeke nzoni mo sala nyen? Mo yeke tiri na lo?—

Zia e kiri e bâ ye so Bible atene. Gue na Matthieu chapitre 5, versê 39. Na yâ ni Jésus atene: ‘Zo so asala sioni na mo, mo ke lo pëpe; me tongana mbeni zo apika ngbangba ti mo ti mbage ti koli, yôro na lo mbeni mbage ni nga.’ Jésus aye ti tene nyen la? Lo ye ti tene so tongana mbeni zo apika mbeni mbage ti ngbangba ti mo, a lingbi mo zia lo pika mbeni mbage ni nde, ni la?—

 A yeke ye so Jésus aye lani ti tene la pëpe. Pikango mê ti zo ayeke nde na gungo zo na maboko. A yeke tongana gingo yanga. Mbeni zo alingbi ti pika mê ti e ti tene e tiri. Lo ye si e sala ngonzo. Na tongana e sala ngonzo, si e kiri sioni ni na lo, ye nyen ayeke si?— Peut-être e yeke tiri.

Me Jésus aye si adisciple ti lo atiri pëpe. Ni la, lo tene so tongana mbeni zo apika mê ti e, a yeke nzoni e kiri na ni na lo pëpe. Zia e kpe ngonzo si e tiri pëpe. Tongana e tiri, e yeke fa so e yeke nde pëpe na zo so agbu e na tiri ni.

Tongana wuluwulu alondo, nzoni ye wa a lingbi mo sala?— A yeke ti hon yongoro. Zo ni so alingbi lakue ti gi mo teti mbeni ngoi. Me lo yeke bâ gbä lo zia lege ni. Tongana mo hon yongoro, a  ye ti tene pëpe so mo yeke na ngangu pëpe. Me a ye ti tene so mo luti ngangu ndali ti ye so ayeke nzoni.

Ka tongana mo yeda ti tiri na mo pika lo, nyen la alingbi ti si na pekoni?— Zo so mo pika lo so alingbi ti ga na ambeni kamarade ti lo. Ala lingbi ti pika mo na kota keke, wala ti kpo mo na zeme. Mo bâ fadeso awe ngbanga ti nyen Jésus aye pëpe ti tene e tiri?—

Tongana e bâ ambeni zo ayeke tiri, a yeke nzoni e sala nyen? A yeke nzoni e mû mbage ti mbeni zo ni?— Bible afa na e ye so a yeke nzoni ti sala. Zi Bible ti mo na aProverbe chapitre 26, versê 17. A tene: “Zo ti lege so alï na yâ ti tiri so ayeke ti lo pëpe, lo yeke tongana zo so agbu mbo na mê ti lo.”

Nyen la ayeke si tongana mo gbu mê ti mbeni mbo? A yeke so lo, na lo yeke gi ti te mo, ni la ape? Na ngoi so lo yeke gi ti zi tele ti lo na mo, mo yeke kiri ti gbu mê ti lo ni ngangu. Ngonzo ayeke gbu mbo ni mingi ahon ti kozo. Tongana mo zi maboko ti mo na tele ti lo, lo yeke te tâ mo ngangu. Me maboko ti mo ayeke ngbâ ande gi na mê ti mbo ni tongaso lakue lakue?—

Bâ, a yeke legeoko tongaso tongana e yôro yanga ti e na yâ ti mbeni tiri so abâ e pëpe. Peut-être e hinga pëpe zo so agi tënë kozo, wala ngbanga ti nyen ala tiri. A pika peut-être mbeni zo ngbanga ti so lo nzi ye ti mba ti lo ni. Tongana e mû maboko na  lo, e yeke mû maboko na mbeni zo ti nzi. A yeke duti ande nzoni?

Tongaso, tongana mo bâ azo ayeke tiri, a yeke nzoni mo sala nyen?— Tongana a yeke na ekole, mo lingbi ti kpe hio ti sala tënë ni na mbeni wafango mbeti. Me tongana a yeke na ekole pëpe, mo lingbi ti gue ti sala tënë ni na babâ na mama ti mo wala na mbeni zo ti lapolice. Même tongana ambeni zo aye ti tiri, a yeke nzoni e gi ti sala siriri.

Atâ disciple ti Jésus ayeke sala kue ti tiri pëpe. Na lege so e yeke fa so e yeke luti ngangu ndali ti ye so ayeke nzoni. Bible atene so a lingbi adisciple ti Jésus ‘atiri pëpe, me a lingbi ala sala nzoni na azo kue’.​—2 Timothée 2:24.