NZAPA azia lani Adam na Eve na yaka ti Eden. Atâa so ala ke yanga na ala kui, Nzapa asala si amolenge ti ala nga na e laso ayeke wara ande lege ti duti na yâ Paradis teti lakue lakue. Bible amû zendo so: “Sese ni aga ye ti héritier ti azo ti mbilimbili, na fade ala duti dä lakue.”​—Psaume 37:29.

Bible asala tënë ti mbeni ‘fini yayu’ na ‘fini sese’. (Esaïe 65:17; 2 Pierre 3:13). “Yayu” ti fadeso ayeke angorogbia ti azo laso, me Jésus Christ na azo so ayeke komande legeoko na lo na yayu ayeke ga ande ‘fini yayu’ ni. Aye ayeke duti ande nzoni mingi tongana fini yayu, wala mbilimbili ngorogbia ti siriri ti Nzapa, akomande na ndo sese kue!

Ka ‘fini sese’ ayeke nyen?— Fini sese ayeke duti ande anzoni zo so aye Jéhovah. Mo bâ, tongana Bible asala tënë ti “sese”, mingi ni, lo ye ti sala tënë ti azo so aduti na ndo ti sese, me pëpe sese so e yeke dö ndo ni so (Genèse 11:1; Psaume 66:4; 96:1). Tongaso, azo so ayeke ga fini sese ni ayeke duti tâ gi na ndo ti sese ge.

Sese ti asioni zo ti ngoi ti e ayeke duti ande dä mbeni pëpe. Girisa pëpe, Moa ti ngoi ti Noé alungula lani mbeni bungbi ti asioni zo. Nga, tongana ti so e manda awe, a yeke futi ande sioni sese ti fadeso na Harmaguédon. Fadeso zia e bâ tongana nyen aye ayeke duti ande na yâ fini sese ti Nzapa na peko ti Harmaguédon.

 Mo ye ti duti lakue lakue na yâ Paradis wala fini sese ti Nzapa so siriri ayeke duti dä?— Mbeni docteur so alingbi ti bata e na fini lakue lakue ayeke pëpe. Yorö oko so alingbi ti kanga lege na kuâ ayeke nga dä pëpe. Oko lege so e lingbi ti ngbâ na fini lakue lakue ayeke gi ti ga ndulu na Nzapa. Kota Wafango ye afa na e tongana nyen ti sala ni.

Zia e zi Bible ti e na Jean chapitre 17, versê 3. E mä atënë so Kota Wafango ye atene: “So ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.”

Tongaso, ti duti na fini ti lakue lakue, Jésus atene a lingbi e sala nyen?— Kozoni kue, a lingbi e manda ti hinga Babâ ti e ti yayu Jéhovah nga na Molenge ti lo, lo so amû fini ti lo ndali ti e. A ye ti tene so a lingbi e manda Bible. Mbeti so, Mä Kota Wafango ye, ayeke mû maboko na mo ti manda Bible ni.

Me tongana nyen mandango ye na ndo Jéhovah ayeke mû ande maboko na e ti duti na fini ti lakue lakue?— Legeoko tongana ti so a lingbi e te ye lâ oko oko, a lingbi e manda nga ye lâ oko oko na ndo Jéhovah. Bible atene: “Fade zo angbâ na fini gi na lege ti mapa pëpe, me na lege ti tënë kue so asigigi na yanga ti Nzapa.”​—Matthieu 4:4.

A lingbi e manda nga ye na ndo Jésus Christ, ngbanga ti so Nzapa atokua Molenge ti lo ti zi siokpari ti e. Mbeti ti Nzapa atene: “Salut ayeke na yâ mbeni zo oko pëpe.” Lo kiri lo tene nga: ‘Zo so afa na gigi mabe na yâ Molenge ni ayeke na fini ti lakue lakue.’ (Kusala 4:12; Jean 3:36). Fadeso, ti ‘fa na gigi mabe’ na yâ Jésus aye ti tene nyen?— A ye ti tene so e yeda biani na Jésus na e hinga so, tongana lo yeke dä pëpe, e lingbi ti duti na fini pëpe. E yeda na ye so? Tongaso, zia e ngbâ lakue ti mä Kota Wafango ye lâ oko oko, na e sala ye so lo tene.

Mbeni nzoni lege ti mä Kota Wafango ye ayeke ti diko mbeti so lege mingi, na ti bâ afoto kue so ayeke na yâ ni nga ti gbu li dä. Bâ wala  mo lingbi ti kiri tënë na ahundango tënë so ayeke na tele ti afoto ni. Nga, a yeke nzoni mo na babâ wala mama ti mo adiko mbeti so legeoko. Tongana ala lingbi ti diko ni na mo pëpe, mo na ambeni kota zo nga na ambeni molenge alingbi ti diko ni. Tongana mo wara lege ti mû maboko na azo ti mä Kota Wafango ye na ti hinga ye so a lingbi ala sala ti duti na fini ti lakue lakue na yâ fini sese ti Nzapa, a yeke duti ande nzoni ape?—

Mbeti ti Nzapa atene na e: “Sese so ayeke hon.” Na pekoni Bible afa tongana nyen e lingbi ti duti teti lakue lakue na yâ fini sese ti Nzapa. Lo tene: “Zo so asala ye so Nzapa aye, lo duti lakue lakue.” (1 Jean 2:17). Tongaso, tongana nyen e lingbi ti duti na yâ fini sese ti Nzapa teti lakue lakue?— A yeke na mandango ti hinga Jéhovah nga na Molenge ti Lo so Lo ye lo mingi, Jésus. Me, a lingbi e sala nga ye ague oko na ye so e manda. Zia si mandango mbeti so amû maboko na mo ti sala aye so.