TI PIKA kate aye ti tene nyen? Mo hinga ni?— Bâ mbeni tapande. Mo tara awe ti sala mbeni ye so akara mo? Peut-être mo tara ti pika mbeni ballon. Wala mo tara ti huru kamba. Mbeni zo atene na mo awe, “He, He, He! Mbi yeke sala ni ahon mo”?— Zo ni so ayeke pika kate ti lo la.

Tongana azo asala tongaso, mo yeke tene nyen? A nzere na mo?— Tongana mo la si mo yeke pika kate, azo ayeke tene nyen na ndo ti mo?— Ti tene na mbeni zo, “Mbi hinga ye mingi ahon mo” ayeke nzoni?— Jéhovah aye mara ti azo so asala ye tongaso?—

Kota Wafango ye ahinga lani azo so abâ tele ti ala so ala yeke nzoni ahon tanga ti azo kue. Ala yeke pika kate na ndo ti ala mveni, na ala yeke bâ azo tongana asenge zo na lê ti ala. Ni la si mbeni lâ Jésus atene na ala mbeni mbaï ti fa na ala so a yeke sioni mingi ti pika kate. Zia e mä ni.

Mbaï ni ayeke ti mbeni Farizien na ti mbeni zo ti rongo nginza ti lampo. A-Farizien ayeke fa tënë ti Nzapa na azo. Ala yeke sala ka ye mo bâ mo tene ala yeke mbilimbili nga nzoni ahon azo kue. Farizien ti yâ ti mbaï ti Jésus ni ague na temple na Jérusalem ti sambela Nzapa.

Jésus atene so mbeni zo ti rongo nginza ti lampo ague nga na temple ni ti sambela Nzapa. Azo mingi aye tënë ti azo ti rongo nginza ti lampo pëpe. Ti ala, azo so ayeke gi ti nzi ala. A yeke tâ tënë so mingi ti azo ti rongo nginza ti lampo ayeke sala ye lakue na lege ni pëpe.

Na temple ni kâ, Farizien ni akomanse ti sambela Nzapa tongaso:  ‘O Nzapa, mbi mû merci na mo so mbi yeke zo ti siokpari tongana tanga ti azo pëpe. Mbi yeke nzi zo pëpe, wala mbi yeke sala ambeni ye ti sioni pëpe. Mbi yeke tongana zo ti rongo nginza ti lampo so kâ so pëpe. Mbi yeke zo ti mbilimbili. Mbi yeke ke kobe lege use na yâ ti dimanche oko, si mbi wara ngoi mingi ti gbu li na ndo ti mo. Mbi yeke mû dîme ti aye ti mbi kue na temple ni.’ Ti bê ti Farizien ni, lo yeke tâ nzoni mingi ahon tanga ti azo, ni la ape?— Lo sala nga tënë ni na Nzapa.

Me zo ti rongo nginza ti lampo ayeke ti lo tongaso pëpe. Tongana lo sambela, lo mû même lê ti lo na nduzu pëpe. Lo ngbâ ti lo yongoro kâ, lo ba li ti lo na sese. Vundu ahon ndo ti lo ndali ti siokpari so lo sala. Lo yeke pika ndo ti kate ti lo. Lo gi nga ti tene na Nzapa pëpe so lo yeke nzoni mingi. Me lo tene: ‘O Nzapa, bâ mawa ti mbi, mbi so mbi yeke mbeni zo ti siokpari.’

Ti mo, lo so wa si anzere na lê ti Nzapa? A yeke Farizien ni, lo so atene ni yeke nzoni mingi so? Wala a yeke zo ti rongo nginza ti lampo ni, lo so vundu asala lo ndali ti asiokpari ti lo?—

Jésus atene so zo ti rongo nginza ti lampo ni la si anzere na lê ti Nzapa. Ngbanga ti nyen? Lo fa nda ni, lo tene: ‘Ngbanga ti so zo kue so atara ti bâ tele ti lo, lo yeke nzoni ahon tanga ti azo kue, fade a sala si lo ga kete. Me zo so abâ tele ti lo, lo yeke kete, fade a yä lo na nduzu.’​—Luc 18:9-14.

 Jésus aye lani ti fa nyen na yâ mbaï ti lo ni?— Lo ye lani ti fa so a yeke sioni ti bâ so e yeke nzoni ahon azo kue. Peut-être e yeke tene na yanga pëpe so e yeke nzoni ahon azo kue, me salango ye ti tele ti e alingbi ti kä e. Mo sala ye tongaso awe?— Bâ tapande ti bazengele Pierre.

Tongana Jésus atene na abazengele ti lo so na ngoi so a yeke ga ti gbu lo, ala kue ayeke dö lo ti zia, Pierre apika kate ti lo, lo tene: ‘Atâa azo kue adö mo azia, mbi yeke zia mo lâ oko pëpe!’ Me Pierre ahanda tele ti lo. Ti lo, lo yeke zia Jésus pëpe. Me lo dö biani Jésus lo zia. Ye oko, lo kiri na mbage ti Jésus, tongana ti so e yeke manda ande na chapitre 30 ti buku so.​—Matthieu 26:31-33.

Zia e mû mbeni tapande ti ngoi ti e. Peut-être wafango mbeti ti mo ahunda ambeni tënë na mo nga na mbeni kamarade ti klase ti mo. Mo kiri tënë hio hio, me kamarade ti mo ni akiri ti lo tënë hio hio pëpe. Mo yeke sala nyen? Mo yeke na ngia tongana mo hinga akiringo tënë ni. Me ti haka tele ti mo na lo so akiri tënë hio hio pëpe ayeke salango ye na nzoni bê la?— Ti fa so mo hinga ye mingi ahon lo ayeke nzoni?—

A yeke ye so Farizien ni asala lani la. Lo pika kate ti lo so lo yeke nzoni ahon zo ti rongo nginza ti lampo ni. Me Kota Wafango ye atene so ye so Farizien ni asala ayeke na lege ni pëpe. Tâ tënë, mbeni zo alingbi ti sala ambeni ye nzoni mingi ahon mba ti lo. Me a ye ti tene pëpe so lo yeke tâ nzoni mingi.

Tongaso, tongana e hinga ye mingi ahon mbeni zo, mbeni ye ti pika kate dä la?— Gbu li ti mo kete. E si e leke li ti e?— Oko pëpe, Nzapa la aleke li ti e oko oko kue. Na mingi ti aye so e hinga, e manda ni na mbage ti ambeni zo. Peut-être e diko aye ni na yâ ti mbeni mbeti. Wala peut-être mbeni zo la si atene ni na e. Même tongana e leke mbeni tënë gi e oko, na lege ti nyen la e leke ni?— Na lege ti li so Nzapa amû na e.

 Tongana ye akara mbeni zo, nzoni ye so mo lingbi ti sala ayeke ti tene na lo mbeni tënë so ayeke mû ngangu na lo. Tene na lo so ye so lo sala, mo ye ni. Mo lingbi ti mû même maboko na lo ti sala ni nzoni ahon ti kozo. A yeke ye so mo ye si azo asala na mo, ni la ape?—

Ambeni zo ayeke ngangu ahon ambeni. Ka tongana mo yeke ngangu ahon ita ti mo, mbeni ye ti pika kate dä la?— Oko pëpe. Kobe so e yeke te la si amû maboko na e ti wara ngangu. Na a yeke Jéhovah si amû lâ na ngu-nzapa nga na aye kue so amû lege na kobe ti sigigi, ni la ape?— Tongaso, tongana e yeke na ngangu, a lingbi e mû merci na Nzapa.​—Kusala 14:16, 17.

Zo oko pëpe na popo ti e aye ti mä mbeni zo na pikango kate na ndo ti lo mveni, ni la ape?— Dabe mo na tënë ti Jésus so: ‘Legeoko tongana ti so mo ye si azo asala na mo, sala ni na ala nga.’ Tongana e sala tongaso, e yeke duti lâ oko pëpe tongana Farizien ti yâ ti mbaï ti Kota Wafango ye, so apika kate na ndo ti lo mveni.​—Luc 6:31.

 Mbeni lâ, mbeni zo ahiri Jésus zo ti nzoni. ‘Ni la, mbi yeke nzoni.’ A yeke ye so Kota Wafango ye atene la?— Oko pëpe. Nde na so, lo tene: “Zo oko ti nzoni ayeke pëpe, gi Nzapa oko.” (Marc 10:18). Atâa so Kota Wafango ye ayeke nzoni-kue, lo pika kate ti lo lani pëpe. Nde na so, lo mû gonda ni kue na Babâ ti lo, Jéhovah.

Ni la, mbeni zo ayeke dä so e lingbi ti pika kate na ndo ti lo?— Lo yeke dä. E lingbi ti pika kate na ndo ti Wasalango e, Jéhovah Nzapa. Tongana e bâ so lâ ayeke gue ti linda, si ndo asala pendere mingi, wala e bâ mbeni pendere ye so Nzapa aleke, e lingbi ti tene na mbeni zo, ‘Nzoni Nzapa ti e, Jéhovah, la asala ye so!’ Zia e duti lakue ndulu ti sala tënë ti akota ye so Jéhovah asala awe na so lo yeke sala ande.