Zuze na Mariya akakhala ku Nazareti pabodzi na Yezu na anawo anango amuna na akazi. Zuze akhaphata basa yakupala matabwa toera kutsalakana banja yace, pontho akhapfundzisambo banja yace thangwi ya Yahova na Mitemo yace. Banja ineyi ikhaenda kalambira Yahova mu sinagoga mwakukhonda phonya, pontho kabodzi pacaka ikhaendambo kacita Paskwa ku Yerusalemu.

Pikhali Yezu na pyaka 12 pyakubalwa, Zuze na banja yace acita ulendo wa nsindzo wakulapha toera kuenda ku Yerusalemu ninga pikhacita iwo pyaka pyonsene. Nzinda ukhadzala na anthu akuti akhaenda kacita phwando ya Paskwa. Pidamala phwando ineyi, Zuze na Mariya pabodzi na anthu anango atoma kucita ulendo wakubwerera kunyumba kwawo, mbakanyerezera kuti Yezu ali pabodzi na iwo. Buluka penepo iwo adzindikira kuti Yezu nee ali na iwo. Natenepa ansaka pakati pa acibale awo, mbwenye nee an’gumana.

Na thangwi ineyi, Zuze na Mariya abwerera ku Yerusalemu. Iwo amala ntsiku zitatu mbakasaka mwanawo, buluka penepo adzan’gumana mu templo. Iye akhali pakati pa apfundzisi mbakaabvesera mwadidi, pontho  mbakaacita mibvundzo. Apfundzisi adzumatirwa kakamwe na Yezu mbatoma kuncita mibvundzo. Pontho akhadzumatirwa na mitawiro yace. Iwo adzindikira kuti Yezu akhadziwa mwadidi Mwambo wa Yahova.

Zuze na Mariya akhali akudzudzumika kakamwe. Mariya alonga: ‘Mwananga, ife tikhakusaka m’mbuto zonsene! Ukhali kupi?’ Yezu atawira: “Imwe nkhabe dziwa kuti ndisafunika kukhala n’nyumba mwa Babanga?”

Yezu abwerera pabodzi na anyakubalace ku Nazareti. Zuze apfundzisa Yezu basa yakupala matabwa. Yezu akhali munthu wa ntundu wanji pikhali iye mwana? Mu ndzidzi ukhakula iye, udziwisi wace ukhathimizirika, pontho akhali wakufunika pamaso pa Mulungu na anthu.