Mwaona mafoto ali pa m’bruxura ino akuti Mboni za Yahova zisabvala tani mwadidi zingagumanika pa misonkhano yawo ya mpingo? Thangwi yanji tisatsalakana kakamwe mabvaliro na makhunganyikiro athu?

Toera kulemedza Mulungu wathu. Ndimomwene kuti Mulungu nee asayang’ana basi ene maonekero athu akunja. (1 Samwele 16:7) Mbwenye tingagumanyikana pabodzi toera kumulambira, cifuno cathu ndi kupangiza cilemedzo kwa iye na kwa alambiri andzathu. Khala tiri pa thando ya kutonga miseru, ife mbatidatsalakana mwadidi maonekero athu thangwi ya cidzo ca ntongi wa miseru. Mu njira ibodzi ene, maonekero athu pa misonkhano asapangiza cilemedzo cathu kwa “Ntongi wa dziko yonsene ya pantsi,” Yahova Mulungu, pontho asalemedzambo mbuto inamulambira ife.—Genesi 18:25.

Toera kupangiza midida inaphatisira ife mu umaso. Bhibhlya isakulumiza Akristu toera kubvala “mwakulemedzeka na mwandzeru.” (1 Timoti 2:9, 10, Tradução do Novo Mundo) Kubvala “mwakulemedzeka” kusabveka kucalira nguwo zakuti zinacitisa anthu kutiyang’anisisa thangwi yakubvala nguwo zakudzumisa, zinacitisa anango kukhala na manyerezero akuipa, peno zakuphenekera. Pontho kukhala na ‘ndzeru zadidi’ kunatiphedza toera kusankhula nguwo zakubalika zakuti nee ndi zaphwazo peno zikulu. Midida ineyi isapitiriza kuphata basa ngakhale pa pisankhulo pyakusiyana-siyana pya munthu paekha. Maonekero athu adidi na akutundusa anakwanisa ‘kulemedza mu pyonsene mafala a Mulungu, Mpulumusi wathu’ pontho “mbasimba Mulungu.” (Tito 2:10; 1 Pedro 2:12) Tingabvala mwadidi pakuenda ku misonkhano, tinatundusa anango mu njira inaona iwo ulambiri wa Yahova.

Lekani kutawirisa kuti kusowa kwanu nguwo zakuthema kukucimwaniseni kugumanika pa Nyumba ya Umambo. Nguwo zathu nee zisafunika kukhala za kobiri izinji peno zakutundusa mbwenye zinakwanisa kukhala nguwo zadidi, zakucena na zakuthema.

• Thangwi yanji mabvaliro athu ndi akufunika pa kulambira Mulungu?

• Ndi midida ipi inatsogolera pisankhulo pya mabvaliro na makhunganyikiro athu?