Sar te terdios kana pes pimos

O Tony, kai piliasas ai gelotar pe moto mai anglal te merel, gindilas ke shai pelas but ai te aliarelpe mishto, ai ke godo nas iek beda. Sar jojadiaspe gadia but?

O pimos chi mekelas les te dikhel le dieli sar sas. Makar vo chi delas po gor, leski gogi chi mekelas les te dikhel sar sas lesko stato ai sar aliarelaspe. Kana mai but pelas, mai but chi delas po gor sar sas chachimasa.

But anda kakala dieli nakhle ke chi kamelas te mekel o pimos. Vi o Alberto nakhlias pa godo. Vo phenel: “Piavas kana khonik chi dikhelas man, gindivas ke nas iek beda. Numa kamavas te piau pimos”. Makar le manush denas duma lentsa, o Tony ai o Alberto gindinas ke o pimos nas iek beda lenge. Numa nas gadia, o pimos ningerelas lengo traio. So shai keren le manush kai nakhen pa kako?

Alosar so te keres.

But manush kai mekle o pimos kerde so phendias o Jesus: “Te si chi iakh e chachi kai kerel tu te peres ando bezex, ankalav la, ai shudela tutar; ke mai mishto tuke te xasaresa iek kotor anda cho stato, [...] sar te avel sa cho stato shudino ando iado [Gehena]” (Mate 5:29).

O Jesus kamelas te sikavel iek diela. Ke trobus te duriuvas katar le dieli kai duriaren amen katar o Del makar univar shai dukhal amen but, sar te shinen amendar iek kotor anda amaro stato. Gadia shai duriarel amen katar le dieli kai keren te pias pimos. Pala godia te avela ke varekon phenel tuke vareso pa o pimos, dikhta sode si malado tuke te pes. a Ai te avela ke nashtis, na pi. Makar nai vushoro, kiro traio si defial kuchi.

Ai te avela ke chi san makiarno numa pes but, so shai keres te les sama sode pes?

So shai azhutil tu

1. Rhugi tu. Ka sa le manush kai pakian ando Del ai kamen te keren so si drago leske, e Biblia phenel lenge: “Ande soste godi mangen katar O Del ando rhugimos so trobul tumen, ai mangen lestar ieke ilesa kai naisil leske. Ai e pacha le Devleski kai nakhel opral pa so godi o manush sai haliarel, garavela tumare ile ai tumare ginduria ando Jesus Kristo” (Filipiana 4:6, 7). Sar trobus te rhugis te del tu pacha o Del ando ilo?

Pervo, trobus te des po gor ke si tu iek beda ai ke pes but pimos. Ai te phenes le Devleske so si te keres, vo si te azhutil tu te na peres. Proverbios 28:13 phenel: “Kon garavel peske bezeja chi zhala leske mishto, numa kon purhila len ai mekela len si te sikaven leske mila”. O Jesus phendias amenge te mangas katar o Del: “Na mek ame te zhas ando zumaimos, numa skepisar ame katar o nasul” (Mate 6:13). So shai keres te sikaves ke rhugis tu de anda o ilo? Kai si te arakhes suato ka so rhugis?

2. E Biblia shai del tu zor. De tu gogi ke “e Vorba le Devleski zhuvindil ai pherdi leski putierasa [si la zor]; [...] phenel pa so gindil ai so mangel o ilo” (Zhiduvuria 4:12). Vareso kai azhutisardias ka but manush kai penas pimos sas, te chiton verseturia la Bibliake suako gies ai te denpe gogi ande lende. Sar phendias o manush kai ramosardias o Salmo, “veselo o manush kai chi phirel sar sikiaren les le nasul, [...] kai si les leski dragostia ande o zakono le Bare Devlesko, ai kai bulguil [chitol ai delpe gogi] ka o zakono diese ai riate”. Ai phenel ke: “Sogodi vo kerel niril” (Psalmo 1:1-3, E Nevi Viasta ai o Psalmo [ENV]).

O Alberto, sas les e zor te mekel o pimos ke sikiolas pa e Biblia le marturentsa le Jehovaske. Phendias: “Zhanau chachimasa ke te na avela pala le zakonuria la Bibliake, nas te mekau o pimos ai agies sas te avau mulo”.

3. Le sama so keres. E Biblia phenel ke uni manush mai anglal te aven kristianuria sas makiarne ai ke “o Duxo amare Devlesko” azhutisardias len te len sama so trobunas te keren ai te meken o pimos (1 Korintiana 6:9-11). Pala godia e Biblia phenel: “Na machon le molasa, [...] numa te aven pherdo ando Swunto Duxo” (Efisiana 5:18; Galatiana 5:21-23). O Jesukristo phendias o “Dat kai si ando rhaio dela O Swunto Duxo kodolen kai mangen lestar”. Ai mai phendias: “Mangen, avela tumende dino” (Luk 11:9, 13).

Godola manush kai kamen te keren so phenel o Del trobun te len sama so keren ai kana te terdion. Te sikion ai te chiton e Biblia ai te rhugin de anda o ilo si te azhutil len. Ai te na peraven le vast, shai seren ke “numa kudo kai bariarel so si drago le Duxoske kjidela katar o Duxo o traio pe sakda. Te na mukas ame te na keras o mishtimos; ke ame kjidasa kana avela e vramia, te na mukasa ame tele” (Galatianuri 6:8, 9, ENV).

4. Dikh kasa phires. Proverbios 13:20 phenel: “Kon phirel le jarane manushentsa kerdiola jarano, numa kon phirel godolentsa kai chi gindin so keren si te zhal leske nasul”. Pala godia, shai phenes ka ke amiguria ke chi mai pes sar mai anglal. Shai avela phenen ke nai pala soste te parhudios ai ke nai mishto so keres. E Biblia phendias ke le manush sas te “chudinpe” ai sas te “maren mui” katar godola kai alosaren te meken o pimos ai le “pachiva bi malade” (1 Petri 4:3, 4). Pala godo mai mishto te na mai phires godole manushentsa kai chi azhutin tu te mekes o pimos.

5. Zhi kai shai areses. “Na len tume pala traio kadala lumiako —phenel Romanuria 12:2—, numa meken le Devles te parhuvel tumen sa vi tumari goji, ai antunchi sai haliarena so O Del mangel - so si malades, so si leske drago, ai so si vorta”. Kames te keres so si drago le Devleske? E Biblia si te azhutil tu te alosares zhi kai te pes ai na so alosarena le manush. Numa, sar shai zhanes zhi kai si dosta te pes?

Te avela ke nashtis te gindis ai te alosares mishto si sostar pilian but. Pala godia te avela ke si te pes pimos alosar sode, na jojau tu. Ai le sama sode si malado tuke te pes.

6. Sikio te phenes no. “Ke tjiri vorba t’avel ei, ei, nichi, nichi” (Matei 5:37, ENV). Te avela ke iek manush lashimasa phenel tuke te pes, shai phenes leske ke chi kames. Sar phenel Kolosiana 4:6: “Tumaro divano te avel sagda shukar ai malado, ai trobul te zhanen sar te den atweto swakones malades”.

7. Rode te azhutin tu. Rode amiguria lashe te azhutin tu la Bibliasa te na peraves le vast. “Mai mishto si dui de sar iek —phenel e Biblia—, ke lena mai but lashimos pala pengi lashi buki. Ai te avela ke iek perel, o kolaver shai azhutil ka pesko vortako te ushtiel” (Eclesiastés 4:9, 10; Iakov 5:14, 16). O Instituto Nacional sobre el Abuso del Alcohol y el Alcoholismo, anda o Estados Unidos, phenel: “Kana nai tu zor ai nai vushoro te na pes, mang katar chi familia ai amiguria te azhutin tu”.

8. Na perau le vast. Iakov 1:22, 25 phenel: “Na dziliaren tume, tume korkorho ferdi ke ashunen E Vorba le Devleski, numa keren so mothol. Numa koko kai lel sama mishto ka zakono o chacho kai skepil ame, ai kai chi mai mekel les, ai kai chi ferdi raduilpe te ashunel, ai porme te bustrel, numa kai kerel so mothol, kodo manush avela swuntsome katar O Del ande so godi kerela”.

Sar te mekes o pimos

Na sa le manush kai pen pimos si makiarne. Numa kon pel but shai avela ke la vriamasa o stato si te mangel lestar pimos. Te mekel o pimos, na numa trobul te thol pestar ai e zor katar o Del. O Alberto phenel: “Kana kamavas te mekau o pimos, nashtivas te rhevdiu e dukh kai kerelas mange te na piau. Kothe aliardem ke trobulas man iek dojtoro”.

But manush kai penas pimos gindin sa iek fialo. b Te aven triazo ai te veselin ka o Del, uni manush trobusarde te zhan ande iek shpita te den len draba te na mangel o stato pimos. O Shau le Devlesko kai kerelas milagruria phendias: “Le manush kai si saste chi trobul le dokxtoro, le naswalen trobul” (Marko 2:17).

Si pala soste te ashunes ka o Del

Le lashe suaturia katar e Biblia aven katar o Del o chacho. Vo kamel lashimos amenge pe sa o traio ai na pe jantsi vriama. O Alberto, kai meklias o pimos de kin 24 borsh, kana serel sar sas lesko traio phenel: “Areslo ka murho ilo kana sikilem ke shai parhuvau murho traio ai ke o Jehova kamelas te azhutil man, ai te zhanau ke vo aliarel mange, lel sama mandar ai ke kana trobul man lestar, azhutil man. Chi si te aresen le vorbi te naisiu sa so kerdias pala mande” —phenel asuentsa pel iakha.

Pala godia te avela ke pes but, na perau le vast. O Alberto sas iek anda but manush kai sas sar tute. But chi mai pen sar mai anglal, ai aver manush chi mai pen pimos. Sa godola manush chi keinpe pala sa e zor kai kerde, ai tu sa iek fialo chi si te keis tu.

Te avela ke alosares te na mai pes vai te pes mai jantsi, ser tuke so phendias o Del o Jehova: “Te lesa opre ka murhe zakonuria! Atunchi, ki pacha avela sar iek reko, ai so keresa vorta, sar o pai anda e maria” (Isaías 48:18).

[Nota]

[Recuadro]

 Sim iek sluga katar o pimos?

Shai pushes tu

• Piau mai but pimos de sar mai anglal?

• Piau mai but dati de sar mai anglal?

• O pimos kai piau akana, si mai zuralo?

• Piau pimos te bistrau le bedi kai si man?

• Iek amigo vai iek niamo, phendias mange ke piau but?

• Pala o pimos, sas man bedi khere, ande e buki vai kana zhau te phiravau man?

• Shai nakhau iek kurko ai te na piau?

• Nai mange drago kana le kolaver chi pen?

• Chi phenau le kolavrenge sode piau?

Te avela ke desa anglal ai phenes ke ei ka iek vai mai but, shai avela ke trobus te les sama sode pimos pes.

Te na keis tu

Mai anglal te pes pimos, gindi tu:

• “Si mishto te piau vai nichi?”

So shai keres: Te avela ke nashtis te mekes, mai mishto te na pes.

• “Sode si te piau?”

So shai keres: Alosar sode pimos si te pes.

• “Kana si te piau?”

So shai keres: Na pi kana trades, kana trobus te les sama vareso vai kana keres buki le Devleske. Ai na pi te avela ke azhukeres iek tsinorho vai pes draba.

• “Kai si te piau?”

So shai keres: Na pi andel riga kai chi azhutin tu te mekes o pimos, kana khonik chi dikhel tu, vai angla le manush kai nai lenge drago o pimos.

• “Kasa si te piau?”

So shai keres: Si malado te pes manushentsa lashe sar amiguria ai familia. Ai na manushentsa kai pen but pimos.

E Vorba le Devleski azhutisardias ka iek manush kai pelas but

O Supot, kai beshel ande Tailandia, sas iek manush kai pelas but. Astardias te pel numa de riate ai tsirha po tsirha astardias te pel diminiatsi, ai porme ando dopash le giesesko. Butivar pelas numa te makiol. Kana astardias te sikiol le marturentsa le Jehovaske sikilo ke le Devleske nai drago le makiarne. Anda godia meklias te pel, numa la vriamasa astardias pale te pel pimos. Kana leski familia dikhlias les, thodiaspe tristo.

O Supot kamelas chachimasa ka o Jehova ai kamelas te kerel so si vorta. Leske amiguria kai si kristianuria azhutisarde les ai vi azhutisarde ka leski familia te na dikhel les jasardo ai te aven mai pasha leste. Azhutisardias les but so phenel 1 Korintiana 6:10 —kai mothol ke le makiarne chi avela lenge e Amperetsia le Devleski— ai kothe dias po gor sar dikhelas les o Jehova ai ke trobulas te mekel o traio kai sas les.

Akana khanchi nas te terdiarel les te mekel o pimos. So azhutisardias les sas o sunto dujo le Devlesko, le lashe suaturia katar Leski Vorba, leski familia ai e congregacion. Leski familia sas defial veselime kana dikhlias ke boldilo sar Marturo. Sar kamlias sa pesko traio, o Supot si iek lasho amigo katar o Del ai azhutil avren te prinzharen les.