KOTOR 6
O Job si chacho le Devlesa
O Satanas phenel le Devleske ke o Job luvudil les numa pala pesko mishtimos. Numa nas gadia, o Job si iek servitori chacho
SHAI aven chache le servitori le Devleske kana si zumade, makar miala ke chi mol lenge khanchi? Iek manush kai bushelpe Job trobusardias te nakhel pa kako. Aida dikhas so sas.
O Job trailas ande vriama kana le israeliti beshenas ando Egipto. Vo beshelas kai agies prinzharas sar e Arabia ai sas o niamo katar o Abrahan. Iek gies, kana o Jehova ai le angeluria sas ande iek baro kidimos ando cheri dikhle po Job. Vi o Satanas sas kotse lentsa. Angla savorhende, o Jehova phendias ke nas aver manush mai chacho katar o Job, gadia o Jehova sikavelas ke pakialas ande leste. O Satanas phendias ke o Job luvudilas le Devles ke arakhelas les ai delas les but dieli. Phendias ke te jasarela sa, sas te mekel les.
O Del meklias ka o Beng te lel katar o Job sa so sas les, leske shave ai te tradel leske iek zhungalo nasualimos. Sar o Job chi zhanelas ke o Satanas sas kon tradias leske sa godola dieli, nashtilas te aliarel sostar o Jehova mekelas te nakhel sa godo. Numa ande sa pesko traio chi dias le zea ka o Jehova.
Atunchi, gele ka o Job jojamne amiguria ai phende leske but dieli kai nas chache. Penge vorbentsa, kai ashile ramome ande Biblia ando libro katar o Job, kamenas te gindil ke o Del sas joliariko sostar o Job kerelas bezeja kana khonik chi dikhelas. Vareso kai nas chacho! Phende ke o Del chi pakialaspe ande peske servitori ai ke nai leske pala lende. Numa o Job chi kamlias te pakial so phende ai phendias ke sas te avel chacho le Devlesa zhi kai merela.
Numa o Job atsadilo sostar gindilaspe but ande peste ai ke sas defial lasho. O Elihu, iek terno kai ashunelas sa, sikadias leske ke nas vorta te gindil numa ande peste ai na ando anau katar o Jehova ai lesko barimos. Ai vortosardias kal jojamne amiguria katar o Job.
Polme, o Jehova vortosardias o gindo katar o Job. Le pramentsa kai vo kerdias sikadias leske sode de tsinorho si o manush angla o Del. O Job sas les lasho ilo ai dikhlias mishto so phendias o Jehova kana vortosardias les. Ai o Jehova kai si defial miloso ai lasho, sastiardias les ai dias les duvar mai but katar sa so sas les ai desh shave mai (Iakov 5:11). So nakhlias o Job sikadias ke nai chaches so phendias o Beng, le manush shai aven chache makar nakhena but bedi phare.
(Ankalado anda o libro katar o Job.)
