1, 2. (α) Σόσκε νανέ εύκολος οντουλένγκε σο τθερένα τσσαβέν τι σικλιαρέν-λεν τι τθερέν πίστη κο Ιεχωβά, ντα καβά ισί ο μόνος τρόπος για τι κερέν-λες ανταβά; (β) Καλά σταρ πράγματα κα ντικχάς ακανά;

ΕΚ ΝΤΑΪ ντα εκ ντατ κι Γαλλία βακερντέ: «Αμέν πακιάσα κο Ιεχωβά, αλλά ανταβά να μανγκέλα τι βακερέλ ότι κα πακιάν αμαρέ τσσαβέ-ντα. Η πίστη νανέ κληρονομική. Ι τσσαβένγκι πίστη μπαριόλα σιγά σιγά». Εκ πφραλ κατά Αυστραλία γραφιντάς: «Η πιο μπαρί δυσκολία σο μπορεί τι τθερές ισί τι βοηθίνες τι τσσαβές τι τθερέλ πίστη αντρέ πι γκίστε». Επίσης βακερντάς: «Μπορεί τι νιωθίνες ότι ντινάν τι τσσαβές εκ απάντηση σο αγαντάς-λα. Ντα σοράν κερέλα τούκε πάλι ι ίδια ερώτηση! Ο απαντήσεις σο ικανοποιήνενα τι τσσαβέσκι περιέργεια αντιβές μπορεί μα τι ικανοποιήνεν-λα ο γιαβέρ ντιβές». Καζόμ μπαριόνα ο τσσαβέ, μπουτ νταντά ντα νταγιά αγαβένα ότι πρέπει τι εξηγίνεν πάλι ο ίδια πράγματα με πιο μπουτ λεπτομέρειες. Ντα αγαβένα ότι ισί σημαντικός τι χρησιμοποιήνεν μπουτ τρόπους για τι σικλιαρέν πουμαρέ τσσαβέν τι μανγκέν ι Ιεχωβάς.

² Άμα τθερένα τσσαβέν, μήπως μερικές φορές σκεφτίνενα άμα  κα μπορίνεν τι σικλιαρέν τουμαρέ τσσαβέν τι μανγκέν ι Ιεχωβάς ντα τι βοηθίνεν-λεν τι υπηρετίνεν-λες ατζέ-ντα όταν κα μπαριόν; Η αλήθεια ισί ότι καέκ τζενό αμένταρ να κα μπορίνελ τι κερέλ-λες ανταβά κορκορό. (Ιερεμίας 10:​23) Οτθάρ, πρέπει τι μανγκάς πάντα ι Ιεχωβάσκι βοήθεια. Βοβ ντινάς κο νταντά ντα κο νταγιά μπουτ λατσσέ συμβουλές. Σαρ μπορίνενα τι βοηθίνεν τουμαρέ τσσαβέν; (1) Προσπαθίνεν τι τζανέν-λεν λατσσές. (2) Σικλιαρέν-λεν ο πράγματα ι Ιεχωβάσκε σο ισί αντρέ τουμαρέ γκίστε. (3) Χρησιμοποιήνεν παραδείγματα. (4) Προσευχίντιβεν για τι τθερέν άγιος πνεύμας ντα κερέν υπομονή τουμαρέ τσσαβέντζαρ.

3. Σαρ μπορίνενα ο νταντά ντα ο νταγιά τι μοιάζεν κο Ιησούς όταν σικλιαρένα πουμαρέ τσσαβέν;

³ Μπουτ φαρ, ο Ιησούς πουτσέλας πι μαθητέν σο πακιάνας. (Ματθαίος 16:​13-15) Προσπαθίνεν τι μοιάζεν λέστε. Όταν κερένα λάφι ή κερένα κάτι τουμαρέ τσσαβέντζαρ, πουτσέν-λεν σο σκεφτίνενα ντα μουκχέν-λεν τι βακερέν οντουλά σο αισθάντιβενα. Μήπως τθερένα κάποιες αμφιβολίες; Εκ πφραλ κατά Αυστραλία σο ισί 15 μπρεσένγκο βακερντάς: «Μο ντατ κερέλα μάντζαρ συνέχεια λάφι για την πίστη σο τθεράβα ντα βοηθίνελα-μαν τι σκεφτίναβ λογικά. Πουτσέλα-μαν: “Σο βακερέλα η Γραφή;” “Πακιάσα τούι ανταβά σο βακερέλα;” “Σόσκε πακιάσα-λες;” Μανγκέλα τι απαντίναβ μιρέ λαφίντζαρ ντα όχι απλά τι βακεράβ πάλι λέσκε ή μι νταγιάκε λάφια. Ντα καζόμ μπαριάβας, έπρεπε τι εξηγίναβ πιο λατσσές μο απαντήσεις».

4. Σόσκε πρέπει τι κερέν υπομονή ντα τι απαντίνεν κο ερωτήσεις σο τθερένα τουμαρέ τσσαβέ; Βακερέν εκ παράδειγμας.

⁴ Άμα τουμαρέ τσσαβέ να πακιάνα αμέσως σαρέ οντουλά σο σικλιαρέλα η Γραφή, κερέν υπομονή. Βοηθίνεν-λεν τι αρακχέν ο απαντήσεις κο ερωτήσεις σο τθερένα. Εκ ντατ βακερντάς: «Ντεν προσοχή κο ερωτήσεις σο κερέλα τουμένγκε τουμαρό τσσαβό. Μα σκεφτίνεν ότι νανέ σημαντικές, ντα μα τι νταρέν τι κερέν λάφι εκχέ θεμάσκε επειδή λατζάνα». Κι πραγματικότητα, ισί λατσσό σο κερένα ερωτήσεις τουμαρέ τσσαβέ επειδή ανταβά σικαβέλα ότι μανγκένα τι αγαβέν. Ατζέ-ντα ο Ιησούς κερέλας ερωτήσεις όταν ισινέ τερνό. (Διαβάνεν Λουκάς 2:​46) Εκ τερνό κατά Δανία βακερντάς: «Όταν βακερντόμ ότι να ισινόμ σίγουρος άμα τθεράσα ι σωστή θρησκεία, μο ντατ ντα μι ντάι ατσσιλέ ήρεμοι​—παρόλο σο ανησυχίνενας μάνγκε. Απαντιντέ αντράλ κατά Αγία Γραφή σαρέ κο ερωτήσεις σο τθεράβας».

5. Ατζέ-ντα όταν ντικχίντιβελα ότι ο τσσαβέ τθερένα πίστη κο Ιεχωβά, σο πρέπει τι κερέλ ο ντατ ντα η ντάι;

⁵ Προσπαθίνεν τι τζανέν λατσσές τουμαρέ τσσαβέν. Μα αμντίνεν ότι τθερένα πίστη κο Ιεχωβά απλά επειδή κερένα ο έργος ι Ντεβλέσκο ντα τζάνα κο συναθροίσεις. Σαρ νιωθίνενα πραγματικά τουμαρέ τσσαβέ ι Ιεχωβάσκε ντα σο πακιάνα ι Γραφιάκε; Κερέν ο πιο λατσσό σο μπορίνενα για τι αγαβέν άμα ισί κάτι σο να μουκχέλα-λεν τι ατσσόν πιστοί κο Ιεχωβά, ντα βοηθίνεν-λεν τι νακχαβέν-λες. Τι κερέν λάφι τουμαρέ τσσαβέντζαρ ι Ιεχωβάσκε κάθε ντιβές όταν κερένα λέντζαρ πράγματα. Τι προσευχίντιβεν τουμαρέ τσσαβένγκε εμ όταν ισινέν λέντζαρ εμ όταν ισινέν κορκορέ.

6. Σαρ κα μπορίνεν τι σικλιαρέν ο νταντά ντα ο νταγιά πουμαρέ τσσαβέν, όταν συνεχίνενα τι σικλιόν ι Ιεχωβάσκε ντα ι Γραφιάκε;

⁶ Ο τζενέ μπεϊντίνενας τι ασουνέν ι Ιησούς επειδή μανγκέλας ι Ιεχωβάς ντα τζανέλας λατσσές οντουλά σο βακερέλα η Γραφή. Επίσης, αγαβένας ότι μανγκέλας-λεν. Οτθάρ, ασουνένας-λες με προσοχή. (Λουκάς 24:​32· Ιωάννης 7:​46) Αντικάς, όταν τουμαρέ τσσαβέ ντικχένα τουμαρί αγάπη ι Ιεχωβάσκε, κα βοηθίντιβεν τι μανγκέν-λες βον-ντα. (Διαβάνεν Δευτερονόμιο 6:​5-8· Λουκάς 6:​45) Οτθάρ, συνεχίνεν τι διαβάνεν με προσοχή ι Γραφή ντα σαρέ αμαρέ έντυπα. Σικλιόν πιο μπουτ οντουλέ πραγματένγκε σο κερντάς ο Ιεχωβά. (Ματθαίος 6:​26, 28) Καζόμ πιο μπουτ σικλιόνα ι Ιεχωβάσκε, αζόμ πιο λατσσές κα μπορίνεν τι σικλιαρέν τουμαρέ τσσαβέν λέσκε.​—Λουκάς 6:40.

7, 8. Κάθε φορά σο σικλιόνα κάτι ι Ιεχωβάσκε, σο μπορίνενα τι κερέν; Σαρ κερντέ-λες ανταβά μερικά νταντά ντα μερικά νταγιά;

⁷ Όταν σικλιόνα κάτι ι Ιεχωβάσκε, τι συζητίνεν-λες τουμαρέ τσσαβέντζαρ. Τι κερέν-λες ανταβά κάθε φορά σο ισινέν λέντζαρ, όχι σάντε όταν προετοιμάνενα-τουμέν ι συναθροισιένγκε ή όταν κερένα ι φαμιλιάκι λατρεία. Ντικχέν σο κερέλα εκ ντατ ντα εκ ντάι κατά Ηνωμένες Πολιτείες. Κερένα λάφι για τον Ιεχωβά πουμαρέ τσσαβέντζαρ όταν ντικχένα κάτι σουκάρ κι φύση ή όταν χάνα εκ σουκάρ χαμπέ. Βον βακερντέ: «Βακεράσα αμαρέ τσσαβένγκε ότι ο Ιεχωβά κερντάς με αγάπη ντα σκεφτιντάς με προσοχή σαρέ ο πράγματα σο ντινάς-αμέν». Εκ αντρόγυνος κατά Νότια Αφρική μπεϊντίνελα τι κερέλ λάφι πι ντουέ τσσαΐντζαρ για τη δημιουργία, όταν κερένα μπουτί κο κήπος. Για παράδειγμας, μπορεί τι βακερέν λένγκε καζόμ εντυπωσιακός ισί όταν εκ σπόρος αβέλα φυτός. Ο ντατ ντα η ντάι βακερντέ: «Προσπαθίνασα τι βοηθίνας αμαρέ τσσαΐν τι τθερέν μπαρό σεβασμός ι ζωγιάκε ντα σαρέ ι σουκάρ πραγματένγκε σο τθερένα ζωή».

⁸ Εκ ντατ κατά Αυστραλία γκιλό πι τσσαβέσαρ, σο ισινέ περίπου ντεσέ μπρεσένγκο, σε εκ Μουσείος. Ο ντατ αποφασιντάς τι χρησιμοποιήνελ οντιά ευκαιρία για τι βοηθίνελ πι τσσαβές τι μπαριαρέλ πι πίστη ντα τι ντικχέλ αποδείξεις ότι ο Ιεχωβά ισί ο Δημιουργός. «Ντικχλάμ σε εκ έκθεση μπουτ πλάσματα σο τζουβντιόνας κι ντεριάβ κο πουρανέ μπρεσά ντα βακέρντιβενας αμμωνοειδή ντα τριλοβίτες. Αγαντάμ ότι οντουλά πλάσματα, σο να υπαρχίντιβενα αντιβές, ισινέ μπουτ σουκάρ ντα να ισινέ κερντέ με απλός τρόπος, ισινέ κερντέ σαρ ισί ο τζουβντέ πλάσματα αντιβές. Άρα, άμα η εξέλιξη ισί μπαγιά, σόσκε οντουλά πλάσματα ισινέ αζόμ σουκάρ; Ισινέ εκ μάθημας σο κερντάς μάνγκε μπαρί εντύπωση ντα σο συζητιντόμ-λες μι τσσαβέσαρ».

9. Σόσκε ισί λατσσό τι χρησιμοποιήνας παραδείγματα; Σο παράδειγμας χρησιμοποιηντάς εκ ντάι;

⁹ Ο Ιησούς χρησιμοποιήνελας παραδείγματα ή ιστορίες για τι σικλιαρέλ ι γιαβερέν. (Ματθαίος 13:​34, 35) Κάνα χρησιμοποιήνενα παραδείγματα, τουμαρέ τσσαβέ χρησιμοποιήνενα πουμαρί φαντασία. Ανταβά κα βοηθίνελ-λεν τι σκεφτίνεν οντουβά σο σικλιαρντέν-λεν, τι αγαβέν-λες  ξεκάθαρα ντα τι ντεν-πες γκοντί ανταβά μάθημας. Επίσης μπεϊντίνενα οντουλά σο σικλιόνα. Για παράδειγμας, εκ ντάι κι Ιαπωνία μανγκέλας τι σικλιόν ο ντούι τσσαβέ λάκε ότι ο τρόπος σο κερντάς ο Ιεχωβά ι μπαρμπάλ σικαβέλα καζόμ μπουτ πφαμπόλα αμένγκε. Ο εκ ισινέ οχτώ μπρεσένγκο ντα ο γιαβέρ ντεσέ μπρεσένγκο. Οτθάρ, χρησιμοποιηντάς εκ παράδειγμας σο κα μπορίνενας τι αγαβέν-λες. Ντινάς κο τσσαβέ τθουτ, σικέρι ντα καφές. Σοράν μανγκλάς ι κάθε εκχέσταρ τι κερέλ λάκε εκ καφές. «Κερντέ-λες με μπουτ προσοχή», βακερντάς. «Όταν πουτσλόμ-λεν σόσκε κερντέ-λες με μπουτ προσοχή, βακερντέ ότι μανγκένας τι κερέν-λες ακριβώς σαρ πιάβα-λες. Εξηγιντόμ λένγκε ότι ο Ντεβέλ-ντα τσσουντάς ο αέρια σο ισί αντρέ κι μπαρμπάλ με μπουτ προσοχή για τι μπορίνας τι τζουβντιάς». Ο τσσαβέ μπεϊντιντέ μπουτ ανταβά μάθημας ντα να μπισταρντέ-λες ποτές!

10, 11. (α) Καβά παράδειγμας μπορίνενα τι χρησιμοποιήνεν για τι σικαβέν τουμαρέ τσσαβέσκε ότι υπαρχίντιβελα Δημιουργός; (Ντικχ ι φωτογραφία σο ισί κι αρχή.) (β) Τουμέν καλά παραδείγματα χρησιμοποιηντέν;

¹⁰ Καβά παράδειγμας μπορίνενα τι χρησιμοποιήνεν για τι σικαβέν τουμαρέ τσσαβέσκε ότι υπαρχίντιβελα Δημιουργός; Μπορίνενα τι χρησιμοποιήνεν εκ συνταγή για τι κερέν εκ κέικ τουμαρέ τσσαβέσαρ. Εξηγίνεν λέσκε σόσκε ισί μπουτ σημαντικός τι κεράς ακριβώς ο οδηγίες σο τθερέλα η συνταγή. Σοράν ντεν τουμαρέ τσσαβέστε εκ πφαμπάι ή εκ γιαβέρ φρούτος ντα πουτσέν-λες: «Τζανέας ότι η πφαμπάι τθερέλα εκ συνταγή;» Σοράν τσσιν ι πφαμπάι κο μασκάρ ντα ντεν-λες εκ τανό σπόρος. Εξηγίνεν ότι ο σπόρος ισί σαρ εκ συνταγή. Τθερέλα αντρέ οδηγίες για τι κερές εκ πφαμπάι. Αλλά νανέ σαρ ο κέικ, ισί μπουτ πιο δύσκολος τι κερές-λες. Μπορίνενα τι πουτσέν-λες: «Κάποιος γραφιντάς ι συνταγή για το κέικ. Αλλά κον γραφιντάς ι συνταγή ι πφαμπαγιάκι;» Άμα τουμαρό τσσαβό ισί πιο μπαρό, μπορίνενα τι εξηγίνεν λέσκε ότι ατζέ-ντα η συνταγή για τι κερές εκ δέντρος, σο κα νικαβέλ πιο μπουτ πφαμπαγιά, ισί αντρέ κο DNA σο ισί αντρέ κο σπόρος. Μπορίνεσα επίσης τι σικαβές μερικές φωτογραφίες ντα παραδείγματα σο ισί κο σελίδες 10 μέχρι 20 κατά βιβλιάριος Η Προέλευση της Ζωής​—Πέντε Ερωτήματα που Αξίζει να Τεθούν.

¹¹ Μπουτ νταντά ντα νταγιά διαβάνενα πουμαρέ τσσαβέντζαρ ο θέμας «Προϊόν Σχεδιασμού;» σο ισί κο περιοδικός Ξύπνα! Άμα λένγκε τσσαβέ ισί μπουτ χουρντέ, ο νταντά ντα ο νταγιά μπορίνενα τι εξηγίνεν ο λάφια σο ισί οτθέ με εκ απλός τρόπος. Για παράδειγμας, εκ αντρόγυνος κι Δανία κερντάς λάφι ι τσιρικλένγκε ντα για το αεροπλάνα. Βον βακερντέ: «Ο αεροπλάνα μοιάζενα κο τσιρικλέ. Αλλά μπορίνενα ο  αεροπλάνα τι κερέν βαντρέ ντα τι μπαριαρέν χουρντέ αεροπλανάκια; Μανγκένα ο τσιρικλέ αεροδρόμια; Ντα σο μπεϊντίνεσα τι ασουνές, εκ αεροπλάνος ή εκχέ τσιρικλές; Άρα κον τθερέλα πιο μπουτ γκοντί, οντουβά σο κερντάς ο αεροπλάνα ή οντουβά σο κερντάς ι τσιρικλέν;» Κάνα κερένα λάφι τουμαρέ τσσαβέντζαρ ντα πουτσένα-λεν, βοηθίνενα-λεν τι “σκεφτίνεν” ντα τι κερέν πιο ζουρανί πουμαρί πίστη κο Ιεχωβά.​—Παροιμίες 2:​10-12.

12. Σαρ μπορίνενα τι χρησιμοποιήνεν παραδείγματα για τι σικλιαρέν τουμαρέ τσσαβέν ότι οντουλά σο βακερέλα η Γραφή ισί μπαγιά;

¹² Μπορίνενα τι χρησιμοποιήνεν παραδείγματα για τι σικλιαρέν τουμαρέ τσσαβέν ότι σαρέ οντουλά σο βακερέλα η Γραφή ισί μπαγιά. Για παράδειγμας, μπορίνενα τι διαβάνεν ο εδάφιος Ιώβ 26:7. (Διαβάνεν) Μα βακερέν απλά τουμαρέ τσσαβένγκε ότι οντουλά σο διαβαντέν ισί ι Ιεχωβάσκε λάφια. Αλλά βοηθίνεν-λεν τι χρησιμοποιήνεν πουμαρί φαντασία. Κα μπορίνενας τι βακερέν λέσκε ότι ο τζενέ κο ντιβεσά του Ιώβ μάλλον να πακιάνας ότι η πφουβ να στηρίντιβελα πουθενά. Τζανένας ότι σαρέ ο πράγματα, σαρ εκ μπάλα ή εκ μπαρ, πρέπει τι στηρίντιβεν κάπου. Αζομάν καέκ τζενό να αρακχλάας αποδείξεις ότι η πφουβ να στηρίντιβελα πουθενά, επειδή να τθερένας τηλεσκόπια ή διαστημόπλοια. Οντουβά σο σικλιάσα ισί ότι η Γραφή, παρόλο σο γραφίντιλι κο πουρανέ μπρεσά, βακερέλα πάντα ι αλήθεια επειδή ισί κατά Ιεχωβά.​—Νεεμίας 9:6.

13, 14. Σαρ μπορίνενα οντουλά σο τθερένα τσσαβέν τι σικλιαρέν-λεν τι ντεν καν οντουλέντε σο βακερέλα η Γραφή;

¹³ Ισί επίσης μπουτ σημαντικός τι σικλιαρέν τουμαρέ τσσαβέν ότι κα αβέν πιο χαρούμενα όταν ντένα καν οντουλέντε σο βακερέλα η Γραφή. (Διαβάνεν Ψαλμός 1:​1-3) Κα μπορίνενας, για παράδειγμας, τι βακερέν τουμαρέ τσσαβένγκε ότι γκιλέας χάι τι μπεσέν εκχέ νησίστε. Πρέπει τι τραμπίνεν καλέ τζενέν κα λεν πουμέντζαρ. Σοράν, πουτσέν-λεν: «Σο τζενέν κα μανγκένας τι αβέν τουμέντζαρ για τι τζουβντιόν σαρέ ειρηνικά;» Τελικά, κα μπορίνεας τι διαβάνες λένγκε ο εδάφια Γαλάτες 5:​19-23 για τι ντικχέν σο τζενέ μανγκέλα ο Ιεχωβά τι τζουβντιόν κο νεβό ντουνιάς.

¹⁴ Αντικάς, μπορίνενα τι σικλιαρέν τουμαρέ τσσαβέν ντούι μπουτ σημαντικά πράγματα. Πρώτον, ο Ιεχωβά σικλιαρέλα-αμέν σαρ τι τθεράς εκ ευτυχισμέ ζωή ακανά ντα σαρ τι τζουβντιάς με ειρήνη ι γιαβερέντζαρ. Δεύτερον, σικλιαρέλα-αμέν σαρ τι τζουβντιάς κο νεβό ντουνιάς. (Ησαΐας 54:​13· Ιωάννης 17:3) Κα μπορίνενας επίσης τι σικαβέν τουμαρέ τσσαβένγκε σαρ βοηθιντάς η Γραφή αμαρέ πφραλέν. Μπορίνενα τι αρακχέν εκ εμπειρία κατά έντυπα σο τθεράσα. Για παράδειγμας, τραμπίνεν εκ εμπειρία κατά θέματα «Η Αγία Γραφή Αλλάζει Ζωές», σο ισί κο περιοδικός Σκοπιά. Ή πουτσέν εκχέ πφραλές τουμαρέ εκκλησιάταρ τι βακερέλ τουμένγκε ντα τουμαρέ τσσαβένγκε σαρ βοηθιντάς-λες η Γραφή τι κερέλ μπαρέ αλλαγές για τι κερέλ ι Ιεχωβάσκο γκι.​—Εβραίους 4:12.

15. Σο κα βοηθίνελ-τουμέν τι σικλιαρέν τουμαρέ τσσαβέν;

¹⁵ Χρησιμοποιήνεν τουμαρί φαντασία για τι μπεϊντίνεν τουμαρέ τσσαβέ οντουλά σο σικλιαρένα-λεν ντα μα τι βαριόνεν. Σκεφτίνεν μπουτ τρόπους για τι βοηθίνεν-λεν τι μπεϊντίνεν τι σικλιόν ι Ιεχωβάσκε ντα τι πλησιάνεν-λες. Ντα συνεχίνεν τι κερέν-λες ανταβά καζόμ μπαριόνα. «Ποτές μα τι τσσιναβέν τι χρησιμοποιήνεν νεβέ τρόπους για τι εξηγίνεν πάλι ο πράγματα σο σικλιαρντέν τουμαρέ τσσαβέν», βακερντάς εκ ντατ.

16. Όταν σικλιαράσα αμαρέ τσσαβέν, σόσκε ισί σημαντικός τι κεράς υπομονή; Σαρ σικαντέ υπομονή μερικά νταντά ντα νταγιά;

¹⁶ Με τη βοήθεια σο ντέλα ο πνεύμας ι Ιεχωβάσκο, τουμαρέ τσσαβέ μπορίνενα τι τθερέν ζουρανί πίστη. (Γαλάτες 5:​22, 23) Όμως η πίστη μανγκέλα χρόνος για τι μπαριόλ. Οτθάρ, πρέπει τι κερέν υπομονή τουμαρέ τσσαβέντζαρ ντα τι συνεχίνεν τι σικλιαρέν-λεν. «Σαρ αντρόγυνος, ασχολίντιβαας μπουτ αμαρέ τσσαβέντζαρ», βακερντάς εκ ντατ κατά Ιαπωνία σο τθερέλα εκχέ τσσαβές ντα εκχέ τσσαγιά. «Από αζομάν σο ισινέ μπουτ χουρντέ, διαβάναβας λέντζαρ 15 λεπτά κάθε ντιβές, εκτός άμα τθεράας συνάθροιση. Οντουλά 15 λεπτά να ζορίνενας ούτε αμέν ούτε λεν». Εκ επίσκοπος περιοχής γραφιντάς: «Όταν ισινόμας έφηβος, τθεράβας μπουτ ερωτήσεις ντα αμφιβολίες αντρά-μάντε σο να βακεράβας-λεν κο γιαβερά. Σιγά σιγά, όμως, λάβας απαντήσεις είτε κο συναθροίσεις είτε κι φαμιλιάκι ή κι προσωπική μελέτη. Οτθάρ, ισί σημαντικός τι συνεχίνεν ο νταντά ντα ο νταγιά τι σικλιαρέν πουμαρέ τσσαβέν».

17. Σόσκε ισί σημαντικός οντουλά σο τθερένα τσσαβέν τι τθερέν ζουρανί πίστη κο Ιεχωβά; Σαρ εκ ντατ ντα εκ ντάι κο Βερμούδες βοηθιντέ πουμαρέ τσσαΐν τι τθερέν πίστη κο Ιεχωβά;

¹⁷ Βέβαια, τουμαρέ τσσαβέ κα σικλιόν μπουτ πράγματα όταν ντικχένα ότι τουμέν τθερένα ζουρανί πίστη κο Ιεχωβά. Βον ντένα σημασία σο κερένα. Οτθάρ, συνεχίνεν τι κερέν πιο ζουρανί τουμαρί πίστη. Μουκχέν τουμαρέ τσσαβέν τι ντικχέν καζόμ πραγματικός ισί ο Ιεχωβά τουμένγκε. Για παράδειγμας, όταν εκ ντατ ντα εκ ντάι κο Βερμούδες τθερένα εκ πρόβλημας, κερένα προσευχή πουμαρέ τσσαΐντζαρ ντα μανγκένα κατά Ιεχωβά τι οδηγίνελ-λεν. Επίσης βακερένα πουμαρέ τσσαΐνγκε τι κερέν προσευχή κο Ιεχωβά όταν ισί κορκορέ. «Επίσης, βακεράσα αμαρέ μπαρέ τσσαγιάκε: “Τι τθερές εμπιστοσύνη κο Ιεχωβά, τι συνεχίνες τι κερές μπουτ πράγματα κι Ντεβλέσκο έργος ντα μα τι ανησυχίνες μπουτ”. Όταν ντικχέλα ο αποτέλεσμας, τζανέλα ότι ο Ιεχωβά βοηθίνελα-αμέν. Ανταβά μπαριαρντάς μπουτ λάκι πίστη κο Ντεβέλ ντα κι Γραφή».

18. Σο δεν πρέπει τι μπιστρέν ο νταντά ντα ο νταγιά;

¹⁸ Νταντάλεν ντα νταγιάλεν, μα μπιστρέν-τουμέν ότι να μπορίνενα τι κερέν τουμαρέ τσσαβέν τι τθερέν πίστη ζορίσαρ. Τουμέν φυτίνενα ντα ποτίνενα, αλλά σάντε ο Ιεχωβά μπορίνελα τι κερέλ-λες τι μπαριόλ. (1 Κορινθίους 3:6) Οτθάρ, τι κερέν μπαρέ προσπάθειες για τι σικλιαρέν τουμαρέ αγαπημέ τσσαβέν λέσκε, ντα τι προσευχίντιβεν τι ντελ-λεν πο πνεύμας για τι τθερέν πίστη. Μπορίνενα τι αβέν σίγουροι ότι ο Ιεχωβά κα ευλογίνελ ο μπαρέ προσπάθειες σο κερένα.​—Εφεσίους 6:4.