Η Ρεβέκκα ισινέ εκ τζουβέλ σο μανγκέλας ι Ιεχωβάς, εμ λάκο ρομ, ο Ισαάκ, μανγκέλας-λες. Σαρ γνωριντάς η Ρεβέκκα τον Ισαάκ; Σαρ σικαντάς η Ρεβέκκα ότι μανγκέλας τι κερέλ ι Ιεχωβάς χαρούμενος; Για τι σικλιάς πιο μπουτ λάκε.

Ο ντατ ντα η ντάι του Ισαάκ ισινέ ο Αβραάμ ντα η Σάρρα. Μπεσένας εκχέ τθεμέστε σο βακέρντιβελας Χαναάν, ντα οτθέ ο τζενέ να πακιάνας κο Ιεχωβά. Όμως, ο Αβραάμ μανγκέλας τι αρακχέλ πι τσσαβέσκε εκχέ ρομνιά σο πακιάλας κο Ιεχωβά. Οτθάρ, μπουτσσαντάς εκχές κατά υπηρέτες σο τθερέλας, σο ισινέ μάλλον ο Ελιέζερ, για τι αρακχέλ εκχέ ρομνιά για τον Ισαάκ κι Χαρράν, εκ τθεμ σο μπεσένας μερικά τζενέ του Αβραάμ.

Ο Ελιέζερ ντα γιαβερά υπηρέτες σο τθερέλας ο Αβραάμ γκιλέ κι Χαρράν. Ο ταξίδι ισινέ μπουτ μπαρό. Λιντέ παλά-πουμέντε ντες καμήλες σο ισινέ λονταντέ χαμπιματέντζαρ ντα δωρέντζαρ. Σαρ κα αγαβέλας ο Ελιέζερ καλέ τζουβλιά κα τραμπίνελας για τι αβέλ η ρομνί του Ισαάκ; Όταν βοβ ντα ο γιαβερά υπηρέτες ερεσλέ κι Χαρράν, σταματισάλε σε εκ χανίγκ επειδή ο Ελιέζερ τζανέλας ότι ατζεχάνικ κάποιος κα αβέλας τι λελ πανί. Προσευχισάλο κο Ιεχωβά ντα βακερντάς: “Άμα μανγκλόμ εκχέ τσσαγιάταρ τι ντελ-μαν πανί ντα βόι κα ντελ εμ μαν αλλά εμ μι καμηλέν πανί, κα αγαβάβ ότι ανταλά τραμπιντάν”.

Αζομάν αβιλί κι χανίγκ εκ τσσάι σο βακερένας λάκε Ρεβέκκα. Η Αγία Γραφή βακερέλα  ότι ισινέ μπουτ σουκάρ. Ο Ελιέζερ μανγκλάς λάταρ πανί, ντα βόι βακερντάς: “Αμί, αμέσως. Κα νταβ-τουτ πανί ντα κα νικαβάβ τι καμηλένγκε-ντα”. Σκέφτινε! Ο καμήλες όταν μερένα πανίσκε πίνα μπουτ πανί. Οτθάρ, η Ρεβέκκα έπρεπε τι τζαλ μπουτ φαρ κι χανίγκ για τι νικαβέλ πανί. Ντικχέσα κι φωτογραφία σο δύσκολη μπουτί κερέλα;​— Ο Ελιέζερ ατσσιλό πουταρντέ μόσαρ όταν ντικχλάς σαρ απαντιντάς ο Ιεχωβά λέσκε προσευχιάτε.

Ο Ελιέζερ ντινάς κι Ρεβέκκα μπουτ σουκάρ δώρα. Βόι βακερντάς λέσκε ντα ι γιαβερέ υπηρετόνγκε σο ισινέ λέσαρ, τι αβέν κο κχερ λάκε φαμιλιάτε. Ο Ελιέζερ βακερντάς λένγκε σόσκε μπουτσσαντάς-λες οτθέ ο Αβραάμ ντα σαρ απαντιντάς ο Ιεχωβά λέσκε προσευχιάτε. Η φαμιλί ι Ρεβεκκάκι χαιρισάλι μπουτ ντα μουκχλάς τι παντρίνελ λάσαρ ο Ισαάκ.

Τούι όμως σο βακερέσα, μανγκέλας η Ρεβέκκα τι παντρίνελ με τον Ισαάκ;​— Η Ρεβέκκα τζανέλας ότι ο Ελιέζερ μπουτσσάντιλο κατά Ιεχωβά. Οτθάρ, όταν λάκι φαμιλί πουτσλάς-λα άμα μανγκέλα τι τζαλ κι Χαναάν ντα τι παντρίνελ με τον Ισαάκ, βόι βακερντάς: “Βα, μανγκάβα τι τζαβ”. Σοράν, νασλί με τον Ελιέζερ. Όταν ερεσλέ κι Χαναάν, παντρισάλι με τον Ισαάκ.

Επειδή η Ρεβέκκα κερντάς οντουβά σο μανγκέλας ο Ιεχωβά, βοβ ευλογιντάς-λα. Μπουτ μπρεσά μετά, μπιάντιλο ο Ιησούς λάκε φαμιλιάταρ! Άμα μοιασάλαν κι Ρεβέκκα ντα κερέσα ι Ιεχωβάς τι χαιρίνελ, βοβ κα ευλογίνελ τουτ-ντα.