SAR osetineja tut ked dobineja jekh ohrabrujućo lil ando to šukar amal? Asavko lil o Timotej dobinđa ando apostol Pavle, kova tano avdije penđardo sar e biblijaki knjiga 2. Timoteju. Ov sigurno jedva ađićerđa te arakhi jekh mirno than te bi šaj te čitini odova so pisinđa lese oleso šukar amal. O Timotej šaj pućlja pe: „Sar tano o Pavle? Da li isi le dijekh savet ando odova sar te ćerav mi služba? Da li akava lil ka pomožini maje pana pošukar te propovedinav, te sikavav hem te pomožinav averenđe?“ Sar so ka dikha, ko akava ohrabrujućo lil o Timotej na dobinđa samo o odgovorija ko akala pućiba, već hem disave savetija. Ama, ko akava članko ka usredsredina amen ko glavna buća kola o Pavle pisinđa lese.

Ked o Timotej počminđa te čitini o lil, ov odmah osetinđa so o Pavle brinini pe olestar. O Pavle vićinđa le „mo manglo ćhavo“ (2. Tim. 1:2). Ked dobinđa akava lil, oko 65. berš ki nevi era, o Timotej verovatno hine le pobuter ando 30 berš hem hine iskusno starešina. Ov sarađujinđa e Pavleja pobuter ando deš berš hem but sikljilo olestar.

E Timoteje sigurno ohrabrinđa ked dikhlja so o Pavle aćhilo verno ko sa o kušnje. O Pavle hine ko phanlipe ko Rim hem ađićerđa te mudaren le (2. Tim. 1:15, 16; 4:6-8). O Timotej šajinđa te dikhel so o Pavle hine hrabro, ked phenđa: „Sa trpinava“ (2. Tim. 2:8-13). Sar e Timoteje hem amen šaj te zorjaćeri e Pavleso primer andi istrajnost.

O Pavle podstakninđa e Timoteje te dikhel upri pi služba sar diso but vredno. Ov manglja o Timotej, te ćerel „e Devleso dar“ kova dobinđa te ovel pozoralo sar ked ćerela pe i jag te ovel pozorali (2. Tim. 1:6). O Pavle aso lafi „dar“ koristinđa grčko lafi harisma. Odova grčko lafi značini nezasluženo dar ja diso so našti te zaradini pe niti te zaslužini pe. O Timotej dobinđa odova dar ked hine birimo te služini ki skupština ko jekh posebno način (1. Tim. 4:14).

So o Timotej valjanđa te ćerel odole daroja? Ði čitinđa o lafija „ćer le te ovel pozoralo sar ked ćereja i jag te ovel pozorali“, šaj razmislinđa ando odova so o manuša hine len običaj te tharen jag ko po ćher. Podijekh puti kotar i jag bi aćhola samo žaro. Ama, te bi ovela jag hem te bi ovela tato, valjanđa te  mrdini pe i jag. Jekh rečniko phenela so o grčko glagol (anazopireo) kova o Pavle koristinđa značini „palem te tharel pe, te oživini pe hem te thabljol“, so bi simbolično značini „te ove oduševimo đi ćereja diso.“ Avere lafencar, o Pavle savetujinđa e Timoteje: „De sa tutar ki služba!“ Sigurno slažineja tut so odola lafija odnosinena pe hem upro amende avdije.

Ko lil kova o Pavle pisinđa e Timotejese, ov phenđa pana diso so ka pomožini lese te ovel pana pošukar ki služba. O Pavle pisinđa: „Arakh o barvalipe kova tano dindo tuće uzi pomoć ando sveti duh kova tano ano amende“ (2. Tim. 1:14). So hine odova barvalipe? So hine dindo e Timotejese? Jekh stiho angleder, o Pavle vaćerđa ando „ispravno sikljovibe“ ja ando ćaćipe kova avela ando Lil (2. Tim. 1:13). Sar hrišćanin, o Timotej valjanđa te sikavi ando ćaćipe e phralen hem e phenjen hem e manušen kola na hine deo andi skupština (2. Tim. 4:1-5). Isto ađahar, o Timotej hine naimenujimo sar starešina te brinini pe ando e Devleso stado (1. Petr. 5:2). O Timotej šajinđa te arakhi po barvalipe – o ćaćipe kova valjanđa te sikavi – ađahar so bi oslonini pe ko e Jehovaso sveti duh hem ko oleso Lafi (2. Tim. 3:14-17).

Avdije, hem amenđe tano dindo o zadatko te propovedina i šukar vest (Mat. 28:19, 20). Amen valjani hem ponodri te cenina odova barvalipe ađahar so ka istrajina ki molitva hem so hem ponodri ka ovel amen šukar navike ando proučibe kotar e Devleso Lafi (Rimlj. 12:11, 12; 1. Tim. 4:13, 15, 16). Isto ađahar, amen isi amen pana zaduženja, sar soj tane te služina sar starešine ja te ova ki punovremeno služba. Asavko zaduženje valjani te ćerel amen te ova ponizna hem te podstaknini amen pana pobuter te oslonina amen upro Jehova. Odolese, amen šaj te arakha odova barvalipe, ja te štitina le ađahar so ka cenina le hem so ka oslonina amen upri e Jehovasi pomoć ki amari služba.

E Timotejeso zadatko hine te sikavi averen te ćeren i služba koja ov ćerđa. Odolese, o Pavle podstakninđa e Timoteje: „Odova so šunđan mandar... de aso pouzdana manuša kola ađahar ka oven osposobime te sikaven averen“ (2. Tim. 2:2). Odova značinđa so sa so o Timotej sikljilo valjanđa te podelini avere phralencar. But tano važno hem avdije sa o nadglednikija ki skupština te ćeren isto odova. Jekh šukar nadgledniko na garavi ljubomorno odova so đanela ando po zaduženje. Umesto odova, ov sikavi averen te bi hem on šaj te ćeren isto odova zaduženje. Ov na darala so avera ka đanen pobuter olestar ja so ka ćeren pošukar olestar odova zaduženje. Isto ađahar, jekh nadgledniko na sikavi averen samo o osnovna buća ando odova zaduženje. Ov mangela te pomožini len te sikljon te oven razborita đi ćerena odova hem duhovno te napredujinen. Ko asavko način, odola „pouzdana manuša“ kas ov sikavđa, ka pomožinen e skupštinaće pana pobuter.

O Timotej sigurno hine zahvalno e Pavlese aso ohrabrujućo lil kova dobinđa olestar. Šaj samo te zamislina e Timoteje sar nekobor putija čitini odola savetija hem sar razmislini sar šaj ko najšukar način te primenini len ki pi služba.

Hem amen mangaja te primenina odola savetija. Sar? Amen šaj te da sa amendar, o dar kova dobinđam, te ćera le te ovel sa pozoralo, sar ked ćeraja i jag te ovel pozorali, te arakha amaro barvalipe hem te delina averencar amaro iskustvo hem odova so đanaja. Ko asavko način, sar so o Pavle phenđa e Timotejese, amen šaj „potpuno [te ćera amari] služba“ (2. Tim. 4:5).