Te zamislina amenge kaj siam ki diz Erihon. Akaja diz sine ko Hanaan. Ko adava than o manuša na verujnena sine ko Jehova. Adari bešela sine jekh romni, lakoro anav sine Raav.

Keda i Raav sine terni čhaj, šungja sar o Mojsej phravgja o Lolo More hem sar vodinela sine e Izraelcon keda iklile taro Egipet. Isto agjaar, šungja sar o Jehova pomožinela len sine te pobedinen keda džana sine ko vojne. Akana šungja kaj o Izraelcija ale paše uzo Erihon.

Jekh rat, duj Izraelcija sine bičhalde čojrale te dikhen o Erihon. Ola gele ki Raav khere. Oj vikingja len te ačhon ki late. Adaja rat, o cari šungja soske ale o duj Izraelcija ki diz hem kaj gele ki Raav. Adaleske ov bičhalgja manušen te astaren len. I Raav garavgja e duje Izraelcon ko krovi hem vakergja e manušenge: ,Adala duj džene sine ki mande, ama gele peske. Ako gelen akana pali lende, šaj te astaren len!‘ Džanea li soske i Raav garavgja len?— Soske verujnela sine ko Jehova hem džanela sine kaj ov ka del e Izraelconge o Hanaan.

Angleder te džan peske tari Raav, o duj Izraelcija vakerge lake kaj ka spasinen hem la hem lakere familija keda ka ovel uništimo o Erihon. Džanea li so vakerge lake te kerel?— Ola vakerge lake: ,Le akava lolo šelo, hem phan le ki pendžera. Togaš, sa okola so ka oven ko to kher ka oven spasime‘. I Raav kergja agjaar sar so vakerge lake. Džanea li so ulo palo adava?—

Palo nesave dive, o Izraelcija, jekh puti ko dive mirno phirena sine okolu o Erihon. Agjaar kerge šov dive. Ama o eftato dive, adava kerge le efta puti. Togaš, sarine počminge glasno te vikinen. O Jehova kergja te peren o zidija tari diz. Ama o kher kote so sine o lolo šelo na pelo! Šaj li te dikhe adava ki slika?— I Raav hem lakiri familija sine spasime!

So šaj te sikljove tari Raav?— I Raav verujnela sine ko Jehova adaleske so šungja  but šukar bukja baši leste. Tu da sikljovea but šukar bukja bašo Jehova. Verujnea li tu da ki leste sar i Raav?— Džanaja kaj kerea adava!