Сар те сикава мангипе е јаверенге
Са о мануша авена таро прво мануш, о Адеми (Адам). Адалеске сарине амен сием јекх фамилија. Иако ки фамилија ваљани те сикава мангипе јекх јекхеске, авдиве тано ретко адава. Амаро Девел, сој пхердо мангипаја, на сине ле намера те овел аѓаар.
СО ВАКЕРЕЛА Е ДЕВЛЕСКОРО ЛАФИ БАШО МАНГИПЕ
„Манг те пашутне сар коркори тут“ (3. МОЈСЕЕВА 19:18).
„Манген тумаре душманен“ (МАТЕЈ 5:44).
СО ЗНАЧИНЕЛА ТЕ МАНГА Е ЈАВЕРЕН
Приметин сар о Девел опишинѓа о мангипе ко пло Лафи, ко 1. Коринќаните 13:4-7:
О мангипе тано „стрпливо хем љубезно“.
Размислин: Сар осетинеа тут кеда о јавера тане туја стрплива, љубезна хем на реагиринена грубо кеда грешинеа?
О мангипе „нане љубоморно“.
Размислин: Сар осетинеа тут кеда о јавера тане љубоморна туке?
О мангипе „на родела пли корист“.
Размислин: Сар осетинеа тут кеда о јавера поштујнена тло мислење хем на мангена секогаш те овел пало ленгоро?
О мангипе „на памтинела о лошнипе“.
Размислин: О Девел спремно простинела околенге со каинена пе башо пле гревија. Ко е Девлескоро Лафи баши лесте пишинела: „Нане вечно те памтинел о грешке, ни нане те овел хољамо засекогаш“ (Псалм 103:9). Амен ценинаја кеда некој со вреџинѓем ле простинела аменге. Адалеске амен да ваљани спремно те простина кеда о јавера вреџинена амен (Псалм 86:5).
О мангипе „нане бахтало баши неправда“.
Размислин: Кеда ка случинел пе аменге нешто лошно, амен на мангаја о јавера те овен бахтале адалеске со иси амен муке. Адалеске, ни амен на сием бахтале кеда е јаверен иси лен муке, чак ако на понашинена пе сине аменцар шукар.
Ако мангаја те добина берекетија таро Девел, мора те манга е јаверен бизи разлика кобор берш иси лен, која националност тане или ко со верујнена. Јекх начин сар шај те сикава мангипе тано аѓаар со ка поможина адаленге со ваљанела ленге помош.
