Дикхеа ли е манушен ки слика?— Ола тане о Матеј, Марко, Лука, Јован, Петар, Јаков, Јуда хем о Павле. Акала мануша живинена сине ко исто време е Исусеа хем пишинге баши лесте. Те сикљова побутер баши ленде.

Трин лендар сине апостолија хем џана сине е Исусеа те вакерен е манушенге башо Јехова. Џанеа ли кој сине ола?— О Матеј, о Јован хем о Петар. О апостолија о Матеј хем о Јован бут шукар џанена  сине е Исусе хем солдуј џене пишинге по јекх лил башо лескоро живото. О апостол Јован пишинѓа панда штар лила, адала тане: Откровение, Прво лил е Јованескоро, Дујто лил е Јованескоро хем Тринто лил е Јованескоро. О апостол Петар пишинѓа дуј лила со и тане ки Библија. Ола тане о Прво лил е Петарескоро хем о Дујто лил е Петарескоро. Ко дујто лил о Петар пишинѓа башо адава кеда шундило е Јеховаскоро гласо таро небо сар вакерела: ‚Акава тано мо мангло чхаво, кова со радујнела ман‘.

О јавера да мануша тари слика пишинге лила со сикавена амен башо Исус. Јекх лендар тано о Марко. Кеда але те пханден е Исусе, ов шај сине адатхе хем дикхља са со уло. Јавер лендар тано о Лука. Ов сине доктори хем шај пало е Исусескоро мериба ов уло христијани, или лескоро ученико.

Јавера дуј џене со дикхеа лен ки слика со пишинге лила тари Библија тане е Исусескере потикне пхраља. Џанеа ли ленгере анава?— Ленгере анава тане Јаков хем Јуда. Ола одма на верујнге ко Исус, чак мислинена сине кај делиндило. Ама пало несаво време, ола верујнге ко Исус хем уле христијанија.

Панда јекх мануш ки слика со пишинѓа лила тари Библија тано о Павле. Англедер те овел христијани, лескоро анав сине Савле. Ов мрзинела сине е христијанен хем сине бут лошно ленцар. Џанеа ли сар о Павле уло христијани?— Јекх диве, о Павле џала сине ко друмо хем таро јекх пути шунѓа гласо таро небо. Адава гласо сине е Исусескоро! Ов пучља е Павле: ‚Соске сиан лошно адаленцар со верујнена ки манде?‘ Пало адава, о Павле уло шукар мануш хем ов да уло христијани. О Павле пишинѓа 14 лила тари Библија.

Амен читинаја и Библија секова диве. Кеда читинаја ла, сикљоваја бут буќа башо Исус. Мангеа ли те џане побутер башо Исус?—