But manuša preačhile te phirel andre khangeri, bo pes ode pal lende ňiko duchovňe na starinelas aňi lenge ňiko na pomožinelas, sar predživenas varesavo pharipen. Phenen tumenge, soske te džal pre amaro kresťansko zhromažďeňe? Savo užitkos man olestar ela?

Ela tumenge feder pro jilo maškar o manuša, so tumen rado dikhen. Imar varesave berša pal o Kristus, sas le kresťanen o zbori, kaj pes zdžanas, te služinen le Devleske. Sikavenas pes andal e Biblija a jekh avres denas zor peskere lavenca. (Hebrejom 10:24, 25) Sar pes zdžanas, šunenas, hoj hine lačhe kamarata, kresťanska phrala the pheňa. (2. Tesaloničanom 1:3; 3. Jána 14) Amen ada keras thiš a the amenge hin mište pro jilo.

Sikhľona te dživel pal e goďi andal e Biblija. Avka, sar varekana, the adaďives, aven pre amare zhromažďeňa o murša, o romňija the o čhave. Lačhe učiťeľa ode na den amen peskeri goďi, ale furt phundraven e Biblija, sikaven biblicka zasadi a amen achaľuvas, sar ada te uplatňinel andre amaro dživipen. (5. Mojžišova 31:12; Nehemiáš 8:8) Vakerel pes ode pal but zaujimava nameti a amen šaj pes zapojinas aleha, hoj ke ada vareso phenas. Ode thiš jekhetane giľavas. Avka sikavas, andre soste sar kresťana paťas. (Hebrejom 10:23)

Pomožinena tumenge zoraleder te paťal le Devles. O apoštol Pavol pisinďa jekhe zboroske, savo akor sas: Igen tumen kamav te dikhel, kaj... [jekh avrestar te chudas duchovno zor]: tumen mire paťabnastar a me tumare paťabnastar. (Rimanenge 1:11, 12 NZ) Te pes zdžas amare duchovne phralenca the pheňenca pre amare kresťanska zhromažďeňa, paťas furt zoraleder le Devles a andal calo jilo pes ľikeras olestar, so phenel e Biblija.

Aven ke amende te dikhel pre peskere jakha, hoj ada avka hin! Rado tumen ode dikhaha! Vaš ada, hoj avena, pes na poťinel, ňiko ode na phirel la pokladňičkaha te mangel love.

• Ko diňa priklados, sar te dičhon avri o kresťanska zhromažďeňa?

• Savo užitkos amen hin, te phiras pre amare zhromažďeňa?