O Ježiš ľidžal savore zbori le Jehovaskere svedkengere. (Efezanom 5:23) Aľe sar, te hino kraľis andro ňebos? Ov diňa lav, hoj kidela avri „verno the goďaver sluhas“. Leha ľidžala peskere služobňiken pre phuv. (Pregen Matúš 24:45) O Ježiš diňa ale „sluhas“ andro vast bari zor. Aľe furt hino sluhas. Soske? Bo služinel peskere Rajeske, le Ježišoske the leskere phralenge, čiže olenge, so ena le Ježišoha andro ňebos. Ko hin ada sluhas? So savoro kerel predal amende?

1) Ko hin „verno the goďaver sluhas“?

O Jehovas furt ľidžalas peskero ľudos prekal varesavo manuš abo vajkeci murša. (Malachiáš 2:7; Hebrejom 1:1) Pal o Ježišoskero meriben o Jehovas ľidžalas peskero ľudos prekal o apoštola the vajkeci phuredera. On pes zdžanas andro foros Jeruzalem. (Skutky 15:2) Avka sar oda kerenas on, the amen hin adaďives vajkeci phrala, čiže o veduco zboros, so dodikhel pre buťi le Jehovaskere svedkengeri pal calo svetos. On amen sikhľaren a ľidžan sar te vakerel pal o Del. Kala vajkeci phrala hin „verno the goďaver sluhas, saves thoďa leskero Raj [o Ježiš]“. (Matúš 24:45a) Ala phrala hine kidle avri le Jehovastar, hoj vladňinena le Ježišoha andro ňebos.

2) So hin oda chaben, so amen davkerel o verno sluhas?

O Ježiš phenďa, hoj o verno sluhas del te chal [le kresťanenge] pro spravno časos. (Matúš 24:45b) Sar oleske te achaľol? Oda chaben hin sa, so šunas pro zhromažďeňa, zjazdi, so genas andro kňižki a so dikhas andro videji. Aleha savoreha amen o verno sluhas sikhľarel andal e Biblija. Soske hin oda amenge sar chaben? Te chas lačho chaben, sam saste a birinas. Avka isto, te šunas ola lava, so del o verno sluhas, hin amen zor te dživel avka sar kamel o Jehovas. Tiš birinas te kerel buťi, so amen diňa o Ježiš. (1. Timotejovi 4:6) Sam igen rade, hoj hin amen furt ajso čalo chaben, so amenge pomožinel buter te kamel le Jehovas a mište te achaľol, so amendar kamel.

 DODŽAN TUT BUTER

3) O Jehovas avka ľidžal peskero ľudos

O phrala, so dodikhen pre buťi le Jehovaskere svedkengeri pal calo svetos, keren sa avka, sar len ľidžal o Ježiš. Prekal kajse murša ľidžalas o Ježiš the le perše kresťanen. Mukh o VIDEJO.

Pregen 1. Korinťanom 14:33, 40 a paľis vakeren jekhetane:

• O Jehovas rado dikhel sa pro than. Sar ala lava sikaven, hoj ada užarel the peskere ľudostar?

4) Le verne sluhas hin pro šero sar kampel te kerel e služba

Nekbuter, so perša kresťana kerenas sas, hoj vakerenas le manušenca pal o Del. Pregen Skutky 8:14, 25 a paľis vakeren jekhetane:

• Ko ľidžalas le perše kresťanen sar kampelas te zvestinel?

• So kerde o Peter the o Ján, sar len aver apoštola bičhade andre Samária?

O veduco zboros kerel nekbuter buťi predal oda, kaj so nekbuter manuša te sprindžaren o čačipen. Mukh o VIDEJO.

 O Ježiš sikaďa, savi bari buťi hin te vakerel lačho hiros. Pregen Marek 13:10 a paľis vakeren jekhetane:

• Soske o veduco zboros kerel sa, kaj pes te dochudel o čačipen ko nekbuter manuša?

• Soske amenge kampel, kaj amen o veduco zboros, čiže „verno the goďaver sluhas“, te ľidžal andre služba?

5) O verno sluhas amenge phenel, so sar te kerel

O phrala pheňa pal calo svetos džanen, so te kerel, bo len ľidžal o veduco zboros. Khatar o veduco zboros džanel, so ela predal amende nekfeder? Kerel avka, sar oda kerelas o veduco zboros paš o perša kresťana. Pregen Skutky 15:1, 2 a paľis vakeren jekhetane:

• Soske pes o perša kresťana maškar peste kerenas?

• Pal kaste gele o Pavol, o Barnabáš the aver phrala, kaj te chuden goďi, so te kerel?

Pregen Skutky 15:12–18, 23–29 a paľis vakeren jekhetane:

• O veduco zboros andro Jeruzalem rodelas le Jehovaskeri goďi a až paľis phenelas, so kampel te kerel. Sar rodelas le Jehovaskeri goďi? (Dikh o teksti 12, 15 the 28.)

Pregen Skutky 15:30, 31 the 16:4, 5 a paľis vakeren jekhetane:

• Sar sas le perše kresťanenge, te chudle ľil andal o veduco zboros pal oda, so kampel te kerel?

• Sar o phrala the pheňa dikhle le Jehovaskero lačhipen, te kerde pal o lava andal o ľil?

Pregen 2. Timotejovi 3:16 the Jakub 1:5 a paľis vakeren jekhetane:

• Sar adaďives o veduco zboros rodel le Jehovaskeri goďi sigeder, sar amenge phenel, so te kerel?

 SO SIKHĽIĽAM

O Kristus thoďa „verne the goďaver sluhas“, čiže o veduco zboros. Ola phrala amenge phenen, so sar te kerel. Starinen pes, kaj pro zhromažďeňa, le kňižkendar the le videjendar te chudas zor avka, sar manuš chudel zor lačhe chabenestar.

So bi phenehas

• Ko thoďa „verne the goďaver sluhas“?

• So savoro predal amende kerel o veduco zboros?

• Tu paťas, hoj o veduco zboros hino „verno the goďaver sluhas“?