6 LEKCIJA
So užarel olen, so mule?
1) So hin lačho hiros prekal ola, kaske vareko muľas?
Sar o Ježiš avľas andre Betanija pašes paš o Jeruzalem, leskro baro kamaratos o Lazar sas imar 4 džives andro hrobos. O Ježiš geľa leskre pheňenca la Martaha the la Mariaha, kaj le Lazar parunde, avle ode but manuša. Savo radišagos šunde andre peskre jile, e Marta the e Maria, sar o Ježiš uštadžas le Lazar andal o meriben! Pregenen Ján 11:21–24, 38–44.
E Marta pačalas, hoj o Jehovas kamel te uštavel olen, so mule, hoj te dživen ade pre phuv. Pregenen Jób 14:14, 15.
2) So pes ačhel olenca, so mule?
O Del phendžas le Adamoske: Prachostar sal the andro prachos džaha. (1. MOJŽIŠOVA 3:19)
O Del kerdžas le manušen prachostar. (1. Mojžišova 2:7; 3:19) Amen sam masestar, kokalendar, hin andre amende rat, ale nane andre amende duša, so našťi merel, so džidžiľahas pal amaro meriben. Te o manuš merel, leskri godži merel thiš. Sa, so les sas andre godži, našľol. O Lazar na vakerlas, hoj vareso predžidžiľa, bo ola, so mule, na džanen ňič, na šunen dukh aňi ňič aver. Pregenen Kazateľ 9:5, 6, 10.
Trapinel o Del le manušen pal o meriben andro peklos? E Biblija ňič ajso na pisinel. Ko sikavel pal o peklos, klaminel a kerel le Devlestar igen nalačhes. Le Devleske na avel šoha andre godži, hoj te trapinel le manušen andro peklos. Ada hin prekal leste baro džungaľipen. Pregenen Jeremiáš 7:31.
Dikh o videjo So pes amenca ačhela pal o meriben?
3) Šaj o mule amenca vakeren?
O mule našťi vakeren aňi šunen. (Žalmy 115:17) Ale varesave nalačhe aňjela, vakeren le manušenca a keren pestar olen, so mule. (2. Petra 2:4) O Jehovas zakazinel, hoj te probaľinas te vičinel vaj te vakerel lenca. Pregenen 5. Mojžišova 18:10, 11.
4) Ko šaj ušťel andal o meriben?
Milijoni manuša ena uštade andal o meriben. Dživena pale ade pre phuv. Uštade ena mek the ola, so šoha na sprindžarde le Devles, a kernas nalačhipen. Pregenen Skutky 24:15.
Manuša, so ušťena, šaj sprindžarena o čačipen pal o Del. Sikavna pes ada, hoj te pačan le Ježišoske, mušinen thiš te dživel pal oda, so phenel. (Zjavenie 20:11–13) Te kerna o lačhipen, dživena pro furt pre phuv. Pregenen Ján 5:28, 29.
5) So pes dodžanas pal o Jehovas?
O Del bičhadžas le Ježiš te merel vaš amenge, hoj ola, so mule, te en uštade andal o meriben. Olestar dikhas, hoj o Jehovas le manušen kamel andal calo jilo a hino ke lende lačhejileskro buter sar peske zaslužinen. Kaha tumen kamľanas te dikhel, olendar, so ena uštade andal o meriben? Pregenen Ján 3:16; Rimanom 6:23.
