Nout bann frèr é sèr,

Nout lamour pou Bondié é pou domoun i pous anou ‘alé vèr bann domoun pou fé bann disip é fé batiz azot’ (Mat 28:19, 20 ; Mark 12:28-31). Kan nou èm domoun san atand rien an rotour, sa i èd anou touch lo kèr sak néna « la mantalité k’i fo pou gingn viv pou toultan » (Akt 13:48).

Dann tan avan, nou té fé zéfor pou aprann par kèr in prézantasion é pou propoz bann publikasion. Jordi, lo plis inportan sé koz èk domoun. Kan nou koz dési in zafèr k’i intérès azot vréman, nou mont ké nou èm azot. Pousa, nou doi tourn la diskusion dési sak lo moun la bézoin. É sé sa mèm ti liv-la i sa aprann anou fé.

Néna 12 loson dann ti liv-la, é chakèn i koz dési in kalité nou la bézoin pou fé mont domoun ké nou èm azot, é ké nou vé osi zot i dovien bann disip Jézu. Dan chak loson nou sa oir in zistoir dan la Bib ousa Jézu oubien in prédikatèr 1^é sièk la fé mont kalité-la. Lo bann loson lé pa fé pou aprann par kèr in prézantasion, mé pou èd anou fé mont ankor plis bann domoun ké nou èm azot. Lé vré, kinport bann diféran fason préché, nou la bézoin 12 kalité-la, mé nou va oir ké an parmi zot désèrtin lé plis util soi pou komans in diskusion, pou fé in vizit oubien in létud la Bib.

Ti pé ti pé dan chak loson, réfléchi koman nou dévré travay la kalité nou lé antrinn oir dan nout fason kozé. Dabor, lé bien ké nou fé grandi nout lamour pou Jéova é pou domoun nout lantouraj. Lamour lé plis méyèr ké ninport kèl kapasité. Li va èd anou ariv fé sak nou voudré : fé bann nouvo disip.

Nou lé fièr sèrv Jéova koté zot « zépol kont zépol » (Sof 3:9). Nou pri Bondié pou béni azot parské zot i vé èm domoun ankor plis é osi parské zot i fé zéfor pou fé bann disip !