8 PARTI
Imaraicuta Diosca cunangama turmintugunata mana tucuchishca
1. Imasata mana ali causaiga callarira
Runaguna mandanauchun nisha Dios saquicpimi ricushcanchi runa gubirnugunaga llaquigunata mana tucuchina ushashcata
Mana ali causaiga Allpaibimi callarira, Satanas Adanda Evata llullashcamanda. Callaribiga paiga jucha illac, ali angel ashahuas, ‘paihuacpi sirtu shimi’ yachaiga mana tiarachu (Juan 8:44). Chiraicumi Jehovata adorana randiga, paita adorachun nisha yuyai callarira. Punda huarmi Evata llullashami pandachira, Diosta mana casusha paita casuchun nisha. Adanga paihua huarmita uyashami juchaibi urmara. Chasna juchayacpimi llaquiguna, huañuigunas tiai callarira. Genesis 3:1-6, 19, leingui.
Evata umashami Supaiga Diospa cuntar tucura. Supaiga mana munarachu Yaya Dioslla Mandac achun nisha. Ashca runagunaga Supaiba parti tucushami Jehova Diosta mana casushcauna. Chiraicumi Supaiga ‘cai munduibi mandac’ tucushca. Juan 14:30; 1 Juan 5:19, leingui.
2. Diosca runagunata manachu alita rara
Dios rashcagunaga tucuillami ali an. Adan, Eva, angelgunahuas Diosta tucuibi casuna ushanaurami (Deuteronomio 32:4, 5). Huingunaga alita, mana alita anllangahua lugarta charinchi. Chiraicumi, Diosta cazushaga paita llaquishcata ricuchinchi. Santiago 1:13-15; 1 Juan 5:3, leingui.
3. Imaraicuta Diosca cunangama turmintugunataga mana tucuchishca
Jehova Diosca mana huiñaigama cuntarguna tiachun nisha saquingachu. Imaraicuta cuntargunata chara mana tucuchishca. Diosca ricuchinata munanmi, paita mana cazuc gubirnuguna runagunaraicu mana ali ashcata (Eclesiastes 7:29; Romanos 8:22). Cai 6 mil huataguna pasashcaibi ricushcanchi, runa gubirnuguna mandaupiga, shuhuaguna, guerrasguna, ungüiguna mana tucurishcata. Jeremias 10:23; Romanos 9:17, leingui.
Diosta cazushaga alimi causashun (Romanos 2:6, 7). Nallami, Jehova Diosca runa gubirnugunata tucuchinga. Jehovahua parti tucushca runagunallami cai Allpaibi causangauna (Isaias 11:9). Apocalipsis 11:15, leingui.
Cai videota ricui: Diosca imahuata turmintugunata mana tucuchishca
4. Llaquigunata Dios chara mana tucuchicpiga, imatata rana anchi
Supaiga nirami, runagunaga Diosta sirvinaunmi pai yanapagllaibi nisha. Canga ricuchinata ushanguimi Supai nishcaguna llulla ashcata. Runa gubirnuta cazuna randiga, Diospa gubirnuta cazushami, Supai llullac ashcata ricuchingui. Proverbios 27:11; Apocalipsis 12:10, 11, leingui.
5. Imasata Diospa parti tucunata ushanchi
Alita rashaga Yaya Dios ñucanchita mandashcatami ricuchinchi
Pundaga yachana manchi, imasa Diosta adorana ashcata. Bibliamanda sirtuta yachachic religionda catina angui (Juan 4:23). Chasnallata Jesus rashcata catishami mana politicaibi, guerrasgunaibi chapurishun. Chita rashami ricuchishun, Supaiba gubirnu parti mana ashcata. Juan 17:14, leingui.
Supaiga paiba ushaihuanmi ricuchin ashiyanaguna, irus causaiguna ali ashcata shina. Chita ñucanchi mana racpiga, amigoguna, ailluguna asisha piñangaunami (1 Pedro 4:3, 4). Chasna tucucpiga, Diosta sirvic runagunahua amigo tucuna mangui. Dios mandashcagunatas cazuna angui. Chita rashaga ricuchinguimi Supai llulla ashcata. Llaquiguna shamucpihuas, ashca runaguna Diospa parti tucusha catishcauna. 1 Corintios 6:9, 10; 15:33, leingui.
Dios ñucanchita llaquishcamandami, turmintugunata, mana ali causaigunatas tucuchinga. Diospa Shimibi sinzhita quirisha, Diospa parti tucusha, Allpaibi huiñaibac causashun. Juan 6:40, leingui.
