Mundo enteropi gentecunaca shuj gentecunapa culpamandallatami shuj jatun peligropi canchi. Shinapash Taita Diosca gentecuna mandashpa catichunga na saquingachu. Imashinami ña yachajurcanchi, Taita Diosca gobierno gentecunata shuj gentecuna aprovechashpa, mandashpa charichunga na saquingachu. Shinapash gobiernocunata tucuchinataca ¿imashinata Taita Diosca villachishca?

Chaita ali intindingapaca pensaripai: ¿Nachu shuj llactaman rijushpaca mapa nishcatara ricushpa yachanguiman maita rina cashcata? Ña viaje rijushpaca ¿nachu ali rijujta o nali rijujta yachangapaca mapata ricushpandi ringuiman? Mapapi ricushpa ali ñanda rijushcata seguro cashpaca alimi sintiringui. Taita Diospash fin ña chayamunallapi cai mundopi ima pasanata ali yachachunmi paipa Shimi Bibliata cushca. Bibliaca shuj mapa cuendami can. Bibliapi nishcacuna pactarijta ricushpami fin ñapacha chayamunataca seguro canchi.

Bibliapica ninmi, ima horapash na tiashca llaquicunata gentecuna ricunajuj punllacunapimi finga chayamunga nishpa. Shinaca maijan llaquicuna tiana cashcata ricupashun.

1. MUNDO ENTEROPIMI JATUN LLAQUICUNA TIANGA Mateo capítulo 24​pica ninmi, mundo enteropimi guerracuna, terremotocuna, yarjaicuna tianga. Nali gentecunapash ninandami miranga, taitata mamata na juyajcunapash, pandata yachachijcunapash tiangami nishpa (Mateo 24:6-26). Chai cosascunami tucurimui tiempo cashcata ricuchinga. Chai tucurimui tiempoca fin chayamujpimi tucuringa (Mateo 24:3, 14). Terremotocuna, guerracuna siempre tiashca cajpipash Bibliapi nishca shinaca tucuillami shuj tiempopi pactarina carca. Ashtahuangarin cati quimsa profeciacuna tiashca tiempopillatami tiana carca.

2. ALITA RURANATA ÑANA YARIJCUNA Bibliapica ‘tucurimui punllacunapi’ nalita rurajcuna ushashcata miranga nishpami cashna nirca: ‘Paicunalla ali cangapaj munajcuna, charijyangapaj munajcuna, pitapash yalimi canchi nijcuna, jariyashpa jatun tucujcuna, Diostapash nali shimicunata rimajcunami tianga. Taitata, mamatapash na cazujcuna, na pagui nijcuna, Diostapash na manllajcunami canga. Pitapash na juyajcuna, ali tucungapaj na munajcuna, yangata juchachijcuna, ima munashcata rurajcuna, llaquitapash na llaquijcuna, ima alitapash na ricunayachijcunami tianga. Umachishpa japichijcuna, imamandapash ninanda jariyajcuna, Taita Diostapash na juyashpa, yanga cushijushpa causanatalla juyajcunami tianga’ nishpa (2 Timoteo 3:1-4). Chashna gentecunaca siempremi tiashca. Shinapash ‘cai tucurimui punllacunapi’ ashtahuan ashtahuan mirajujpimi Bibliapica nin, chai punllacunaca ‘jatun llaqui’ punllacunami canga nishpa. Shinaca ¿nachu chashna punllacunapi causanajupanchi?

3. ALPACA HUAGLIJUNMI Bibliapica ninmi, Taita Diosca ‘cai pachata tucuchijcunataca’ tucuchingami nishpa (Apocalipsis 11:18). ¿Imashinata cunan punllacunapica Alpata huaglichinajun? Noepa punllacunapi shinami cai pachapi causajcunaca Taita Diospa ñaupajpi ninandapacha huaglinajun. Chaimandami Taita Diosca Noetaca nirca, paicunataca cai Alpandimi llaquichisha nishpa (Génesis 6:11-13). Chashna nali gentecuna mirajujtaca ¿nachu ricunajupanchi? Nali gentecuna mirajushca jahuapash gentecunaca mundo enteropi tucuilla gentecunata tucuchinalla armacunatami rurashca. Ashtahuangarin, ñucanchi causanajunchi Alpatapash, yacucunatapash, plantacunatapash tucuitami gentecunaca huaglichinajun.

Shinaca pensaripai ¿ñaupa punlla gentecunaca mundo enteropi gentecunata tucuchingapaj  armacunata, bombacunata charircachu? Na. Shinapash cunanbica chashna armacunata, bombacunata charinmi, yacucuna, alpacunapash contaminadomi can. Mushuj cosascunatapash ashtacatami llujchin. Shinapash gentecunaca na cuenta japinllu chai mushuj cosascunahuan gentecunapa causaitallata peligropi churajushcata. Chashna llaqui causaicuna mirajujpipash Taita Diosca ninmi, nali gentecuna cai Alpata nara huaglichijpillatami chai gentecunataca tucuchisha nishpa.

4. MUNDO ENTEROPIMI VILLACHINAJUN Mateo libropica nircapashmi, fin nara chayamujpillatami ‘Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami tucurimuica chayamunga’ nishpa (Mateo 24:14). Iglesiacunaca cai textopi nishca shinaca na villachinajushcachu. Cai textopi nishca shina villachingapaca Diospa Reinomanda o Dios mandanamanda ali villaicunatami villachina carca. Shinaca ¿picunata Diospa Reinomanda mundo enteropi villachinajushca?

Testigo de Jehovacunaca Diospa Reinomanda ali villaicunata villachingapami Internetpica jw.org nishca direccionda charin. Chaipica 700 yali shimicunapimi Diospa Reinomanda parlaj publicacionguna tian. Internet nara tiajpipash testigo de Jehovacunataca Diospa Reinomanda ali villaicunata villashcamandami gentecunaca rijsin carian. 1939 huatamandami Villajun nishca revistapa punda paginapica cashna nishca tiajun: “Jehová Diospa Reinomandami villajun” nishpa. Religiongunamanda parlaj shuj libropash ninmi: “Pipash paicunashnalla tucui ladocunapi aliguta villachinataca na ushashcachu” nishpa. Gentecunamanga Diospa Reinomi nali gentecunata tucuchinga nishpami ashtahuanbachaca villachinchi.

¿Mateo capítulo 24​pi shimicuna pactarijujta quiquinga ricupashcanguichu? Yalishca 100 huatacunamandami cai revistapica villachishca cai mundopi ima cosascuna pasajujta. Shinami cai revistata liij gentecunapash tucurimui punllacunapi causanajushcata cuenta japishca. Shinapash na crij gentecunaca cai tucuri punllacuna ashtahuan huaglijujtaca na cringapaj munanllu. Paicunaca ninmi, cunan punllacunapi mushuj  aparatocuna llujshijpimi mundo enteropi ima pasajujta ricunchi, uyanchi nishpa. Chai gentecuna imata nijpipash ashtaca gentecunaca nishcami cai punllacunapi causaica ashtahuanmi huaglijun nishpa.

Cai mundopi causai ashtahuan huaglijujpimi 2014 huatapi huaquin cientificocunaca Consejo de Seguridad de las Naciones Unidas nishcata advirtishpa cashna nirca: “Huaquin investigaciongunata rurashpami cuenta japishcanchi, mushuj cosascuna llujshishpa ali cashpapash mundo enteropi causaitami peligropi churajun” nishpa. Cai mundopi imacunalla pasajujta ricushpami ashtaca gentecunapash, cai revistata escribijcunapash, cai revistata liijcunapash tucuri punllacunapi causanajushcata, fin ñalla chayamunatapash crin. Shinapash fin chayamunataca na manllanachu capanchi. Chai punllamanda salvaritaca ushashunmi.