Imatapash rurana munaita charinaca na yanga munailla o muscuillachu can. Imatapash munajushcata pactachingapaca, aliguta pensarina, shinllita esforzarinami minishtirin.

Huaquinbica, imata rurangapaj munajushcataca huaquin punllacunapilla, quillacunapilla o huaquin huatacuna jipami pactachi ushanchi. Ñucanchi munajushcata pactachingapaj ashtaca tiempo minishtirijujpica, chai tiempopica shuj cosascunatapashmi rurana capanchi.

Quiquin munajushcata pactachishpaca, alimi sintiringui, quiquinba amigocunahuanbash ashtahuan alimi llevaringui, ashtahuan cushillami cangui.

Ashtahuan alimi sintiringui. Quiquin imata munashcata asha tiempopilla pactachishpaca, unailla tiempo pactachingapapashmi huaquin cosascunata rurangapaj munapangui. Shinallata, shujcuna atichinajujpipash na paicuna munashcata ruranguichu.

Ashtahuan alimi llevaringui. Tucuicunami, imata munashcata pactachingapaj esforzarinajuj gentecunahuan llevarinata gushtanchi. Ashtahuangarin, ishcaipura chai munaitallata pactachingapaj esforzarinajushpaca ashtahuan alimi llevarin.

Ashtahuan cushillami cangui. Quiquin imata munajushcata pactachishpaca cushillami sintiringui.

Cristobalca ninmi: “Imata munajushcata pactachingapaj esforzarishpami ocupado cani. Imatapash ña pactachishpaca, ‘usharcanimari’ yashpami cushijuni” nin.

BIBLIAPICA NINMI: “Huairata chapaj runaca, na tarpungachu. Fuyuta ricuriajlla causaj runapash, na cozechangachu” nishpa (Eclesiastés 11:4).

Imatapash rurana munaita charingapaj, chaicunata pactachingapaca:

Imacunatalla rurangapaj munashcatami shuj hojagupi anotashpa, chaicunata pactachingapaj esforzarina capangui.

Imashina pactachinatapash pensarishpami caicunapipash pensarina capangui:

• ima fechapi pactachinata,

• pactachingapaj imata ruranata,

• ima jarcaicuna tianata, chai jarcaicunata imashina mishanatapash.

Rurai callaripai. Tucuita imashinapacha pactachinata na yachashpapash, quiquinba munaita pactachingapaj imata rurai callarinataca uchallami rurana capangui. Imagutapash rurashpaca, quiquinba munaita pactachingapaj shuj gradasta vitsashcatashnami ricuna capangui.

BIBLIAPICA NINMI: ‘Imatapash ucha rurajcunaca ashtacatami charinga’ nishpa (Proverbios 21:5).