Bibliaq yanapayninwan cambianku

¿Imaynatan juj qhapaq runa qhapaq kaymanta aswan valeq qorita tarinman karqan? ¿Imaynatan juj qhelli ruwaypi, droga viciopi kausaq runa llapa chayta saqepunman karqan? ¿Iman juj wayna runata yanapanman karqan machay viciota saqenanpaq? Paykuna kikinku chayta willawasun.

“Noqaqa munayta sumaqta kausanaypaqmi piensasharqani” (JOHN RICKETTS)

¿IMA WATAPIN NACERQAN? 1958 WATAPI

¿MAYMANTAN? ESCOCIA NACIONMANTA

¿IMAMANTAN WILLAKUSHAN? PAYQA ALLIN EMPRESAYOQSI KASQA

ÑAUPA VIDAY: Erque kashaqtiyqa junt’asqan imaykupas kaq, manan imapas faltawaqkuchu. Papayqa ejercitopi juj umalliqmi karqan, chhaynapin llapa familiantin juj-juj llaqtakunaman astakachakuq kayku. Noqaykuqa Escocia nacionpin tiyarqayku, chaymantan ichaqa Inglaterra, Alemania, Kenia, Malasia, Irlanda, Chipre nacionkunaman rirqayku. Pusaq wataymantapachan Escociapi kaq imaymana escuelakunapi tiyarqani. Chaymantaqa Cambridge nisqa Universidadpin estudiarqani.

Iskay chunka wataypi kashaspan imachus estudiasqaypi llank’ayta qallarirqani. Petroliowan llank’aq jatun empresapin llank’arqani. Ñaupaqtaqa América del Sur nisqa ladopin llank’arqani, chaymantataq África ladopi, chaymantataq Australia Occidental ladopi. Chaypin juj jatun empresata kicharqani, chaymantan ichaqa vendepurqani.

Chayta vendesqayraykun tawa chunka watallaypiraq kashaspa jubilakurqani, manañan imapipas llank’arqanichu. Manan tiempoywan imata ruwayta aterqanichu chaymi viajayta qallarirqani. Iskay kutitan Australia nacionta motollapi muyurqani, llapa kay mundotan muyurqani. Noqaqa munay sumaqta kausanaypaqmi piensasharqani.

BIBLIAQ YANAPAYNINWAN CAMBIAPUNI: Manaraq jubilasqa kashaspan noqaqa munaqpuni kani kay munay kausaymanta Diosta “gracias” niyta. Chaymi Anglicana nisqa iglesiaman riq kani, chay religionmanmi tayta-mamayqa apawaqku, ichaqa manan chaypiqa Bibliataqa ancha leeqkuchu. Chaymantan ichaqa Mormón runakunawan estudiayta qallarirqani, chaypipas manan sonqoyqa thajchu kasharqan, manan Bibliata ancha leeqkuchu.

Juj kutinmi wasi punkuyta takaykamurqanku, paykunaqa Jehová Diospa testigonkunan kasqaku. Paykunaqa Bibliamantapunin imatapas rimapayawarqanku. Chay kutipin qhawachiwarqanku 1 Timoteo 2:3, 4 textota, chaypin Diosmanta rimaspa nishan: “Payqa llapa runapas salvasqa kanantan munan, cheqaq kaqtapas allinta yachanankutan munan”, nispa. Testigokunawan rimasqaypin repararqani imaynas paykunaqa Bibliamantapuni, sut’itapuni imatapas yachachinku chayta.

Paykunawan estudiaspan noqapas cheqaq yachachikuyta allinta yacharqani. Allintan entienderqani imaynas Diosqa mana kaqllachu Jesuswan chayta, manan paykunaqa rimay kasqanman jinachu iskayninkupas kaqlla kanku (Juan 14:28; 1 Corintios 11:3). Noqaqa entiendeytapunin munarani chayta, “imaynapitaq Diosri kaqlla kanman Jesuswan” nispan niq kani, manan chay umayman jaykuyta atiqchu. Bibliata estudiaspañan yacharqani mana chhaynachu kasqanta.

Biblia estudiay qallarisqay p’unchaykuna qhepallamanmi Testigo hermanokunaq juñunakusqanman riyta qallarirqani. Paykunaqa sumaq sonqo runakunan kasqaku, Diospa siminman jinapunin imatapas ruwasqanku, admirakunapaqmi karqan. Paykunataqa santo runakunata jinaraqmi qhawarirqani. Tukuy sonqon munanakusqakupas, chaykunata rikuspan nirqani: “Kaypunin cheqaq religionqa” nispa (Juan 13:35).

BENDICIONKUNA CHASKISQAY: Bautizakusqay qhepallamanmi reqsirqani juj munay sonqo hermanata, payqa Testigo familiapin nacesqa, paypa sutinmi Diana. Imaynachus kasqanmi, sumaq sonqo kasqanmi sonqoyta suwawarqan jinan tiempowanqa paywan casarakapurqani. Payqa munaytan yanapawan, Diospa qowasqan bendicionpunin payqa.

Maytapunin munasharqayku maypichus yanapanata munashanku chay llaqtaman riyta, jinan 2010 watapi Centroamérica nisqa ladopi Belice llaqtaman astakurqayku. Kaypiqa kusatan Diosmanta uyarikunku, reqsiytapunin munashanku payta.

Kunanraqmi allinta yachani Diosmanta simin qelqamantapas, chaykunawanmi sonqoy llanllarinraq. Noqaqa precursormi kani, tukuy tiempoywanmi Diosta servishani, askhatañan yanapashani Diosta reqsinankupaqpas. May kusikunapaqpunin runakunaq vidanku cambiasqankuta rikuyqa, may munaypunin chayqa. Noqapas kusisqan kashani Diosta servispa, vida qowasqanmanta graciasta qospa.

“Paykunaqa sumaqtan rimapayawarqanku” (MAURÍCIO ARAÚJO)

¿IMA WATAPIN NACERQAN? 1967 WATAPI

¿MAYMANTAN? BRASIL NACIONMANTA

¿IMAMANTAN WILLAKUSHAN? MILLAY QHELLI KAUSAYTAS APAQ

ÑAUPA VIDAY: Noqaqa Avaré llaqtachapin wiñarqani, chayqa São Paulo llaqtapin kashan. Chaypi tiyaqkunaqa yaqa llapapas empresakunapi llank’aqkunan karqanku.

Papayqa manaraq naceshaqtiymi wañukapusqa. Erqecha kashaspayqa mamitaypa p’achankunawanmi paypa mana rikusqallan churakuq kani. Warmi jinan imatapas ruwaq kani, chaymi runakunaqa niwaqku “kaymanqa qharikunachá gustan” nispa. Tiempowanqa qharimasiy wayna chicokunawanmi kaq kani, kuraq runakunawan iman kaq kani.

Yaqa iskay chunka wataypi kashaspaymi tusuna wasikunata, bar ninku chaykunata hasta iglesiakunata ima riq kani qharikunata warmikunata ima maskhaspa, imaymana qhelli ruwaykunatan ruwaq kani. Carnaval tiempopiqa warmi jina p’acharukuspan tusuq kani. Desfile nisqa kaqtinmi tusuna escuelakunamanta riq kayku. Chaypin allin reqsisqa kapurqani.

Noqaq amigoykunaqa qharipura kaqkuna, cuerpon vendeq warmikuna, drogakuq runakuna iman karqan. Wakinmi niwaqku crack nisqa drogata mallinaypaq, ratullan chayman vicio jap’iwarqan. Mayninqa paykunawan kuskan tuta illariq chay drogata pitaq kayku. Maynintaq sapallay p’unchay ch’isiyaq chayta pitaq kani. Manañan cuerpoypas cuerpoychu kasharqan, chaymi wakinqa nisharqanku “sida onqoywanchá kashan” nispa.

BIBLIAQ YANAPAYNINWAN CAMBIAPUNI: Chayllamanmi Jehová Diospa testigonkunawan reqsinakurqani. Paykunaqa sumaqtan rimapayawarqanku. Romanos 10:13 textotan leewarqanku, chaypin nishan: “Jehová Diospa sutinta llapa wajakuqkunaqa salvasqan kanqaku”, nispa. Chaypin yacharqani imaynas ancha allinpuni Diosta sutinmanta wajakuy chayta. Chaymi mayninqa crack nisqa drogata tutantin pitasqay qhepata ventanata kicharispa cielota qhawariq kani, chaypin Jehová Diospa yanapayninta waqasparaq mañakuq kani.

Mamitayqa may llakisqan kasharqan imayna vida apasqayta rikuspa. Chaymi sonqollaypi nirqani: “Saqepusaqpuni kay drogakunata” nispa. Chay p’unchaykunallapin Testigo hermanokunawan Biblia estudiayta qallarirqani. Paykunaqa allintan entiendechiwarqanku imaynas estudiasaq chayqa llapa chay viciota saqepusaq chayta. paykunaq nisqanman jinan karqan.

Yachasqayman jinan allinta repararqani imaynas kausayniyta cambianaypuni karqan chayta. Noqapaqqa qharipura puñuyta, qhariwan kayta saqeymi sasa karqan, chaytaqa yuyay jap’isqaymantapachan ruwaq karqani. Chaykunapi cambianaypaqqa llapa ñaupaq reqsisqay runakunamantan t’aqakapunay karqan. Manañan rirqanichu tusuna wasikunatapas, machana wasikunatapas, chhayna juj wasikunatapas.

Manan noqapaqqa facilchu karqan llapa chaykunata saqey. Ichaqa Jehová Dios noqawan kusisqa kasqanta, paypa munakuwasqanta yachaymi yanapawarqan saqepunaypaq (1 Juan 3:19, 20). 2002 watapaqqa llapa imaymanatañan saqepurqani chaymi bautizakapurqani, Jehová Diospa testigonmi kapurqani.

BENDICIONKUNA CHASKISQAY: Mamitayqa may kusisqan kasharqan llapa mana allinkuna saqepusqayta rikuspa, chaymi paypas Biblia estudiayta qallarirqan. Ichaqa umanpin juj onqoy jap’irqan, manan atipurqanchu ima entiendeytapas. Chaywanpas kallpachakushanmi Diosta astawan reqsinanpaq payta munakunanpaqpas.

Pusaq watañan yaqa tukuy tiempoyta Diosman qoshani, llapa munaq runakunamanmi paypa siminta yachachishani. Imapaqtaq niyman, mayninqa kutimuwaqmi mana allin piensaykuna, ichaqa maytan kusikuni chaykunata mana ruwaspa, Jehová Diospas noqawan kusisqa kasqanta yachaspa.

Diosman jap’ipakuspa, paypa munasqanman jina kausaspan kusisqa kani, noqallataqmi respetowan qhawarikuni. Kunanraqmi yachani imas kusisqa kausay chayta.

“Payqa t’oqo celindron” niwaqkun (LUKA ŠUC)

¿IMA WATAPIN NACERQAN? 1975 WATAPI

¿MAYMANTAN? ESLOVENIA NACIONMANTA

¿IMAMANTAN WILLAKUSHAN? PAYQA NISHUTAS IMAYMANA MACHANATA UJAQ

ÑAUPA VIDAY: Noqaqa Eslovenia nacionpi Liubliana llaqtapin nacerqani. Allillanmi wiñasharqani, chaymantan ichaqa tukuy ima cambiapurqan. Tawa wataypi kashaqtiymi papay seq’okapusqa. Mamitallayñan noqata wayqeytawan uywawanankupaq llank’anan karqan.

Chunka pisqayoq wataypi kashapan abuelaywan tiyaq ripurqani. Chayniqkunapiqa askhan amigoykuna kaq, manataqmi abuelayqa mamay jinachu ñawillanpi purichiwaq. Chunka soqtayoq wataypi kashaspan juj amigokunata reqsirqani, paykunaqa sapa semana tukuytan machaq kaqku. Chujchaypas jatunllañan kaq, mana kasukuq millay runakuna jinan p’achakuqpas kani. Chaymantaqa cigarro pitayta iman yacharqani.

Imaymana clase drogatan mallirqani, chaywanpas imaymana machana ujaymi astawanqa gustawaq. Pisi-pisimantan iskay kinsa copamantaqa noqa sapallay juj botella vinota ima tukuq kani. Sinchi machasqaña kasharani chaypas manan reparachikuqchu kani, manapas machasqachu kashayman jinan kaq kani. Mayninqa samaynillaypin reparawaqku, mayninpin ichaqa jayk’a litro vinotaña, vodka nisqawan tupachisqa cervezataña tomaq kani chaypas manapuni reparawaqkuchu.

Mayninqa, machana wasikunapi illarisqayku qhepamanqa noqan amigoykunataqa yanapaq kani, paykunamanta iskay kuti mastaña tomayman karqan chaypas noqan paykunataqa aysakachaq kani. Juj kutinmi noqamanta rimaspa jujnin amigoy juj kaqta nirqan: “Payqa t’oqo celindron” nispa. Chay nisqanwanqa maytapunin sonqoy nanarqan. Esloveniapiqa sinchi machaqkunata k’amispan chhaynata ninku.

BIBLIAQ YANAPAYNINWAN CAMBIAPUNI: Chay p’unchaykunallapin estudiasqaypi jujnin compañeroywan rimarqani. Payqa manañan ñaupaq jinachu kasharqan, llamp’u sonqomanmi tukupusharqan, “imaynapitaq chhaynamanri tukupushan” nisharqanin. Paywanmi rimayta munasharqani, jinan cafeyta servisqanku wasiman invitarqani. Chaypin payqa willawarqan imaynapichus cambiasharqan chayta. Payqa Jehová Diospa testigonkunawanmi estudiashasqa. Willawarqanmi imakunatachus yachasharqan chaytapas. Noqaqa manan jayk’aqpas ima religionpipas karqanichu, mosoqmi karqan chay compañeroypa llapa ima willawasqanpas. Chhaynapin noqapas Biblia estudiayta qallarirqani, juñunakuykunamanpas rillaqmi kani.

Pisi-pisimantan yacharqani Bibliapi munay yachachikuykunata. Chaypin yacharqani imaynas noqanchisqa “tukukuy p’unchaykunapiña” kausashanchis chayta, imaynas Diosqa kay pachamanta mana allin runakunata chinkachinqa, imaynas kasukuqkunataqa munay huertaman churanqa chaytapas (2 Timoteo 3:1-5; Salmos 37:29). Noqapas allin runakuna ukhupin kayta munasharqani, chaymi tukuy ima mana allin ruwaykunata saqepuyta munasharqani.

Amigoykunamanmi imachus yachasqayta willarqani, paykunan ichaqa asipayawarqanku. Chay ruwawasqankun noqataqa astawan yanapawarqan cambianaypaq, chaypin repararqani imaynas paykunaqa mana allin amigokunachu kanku chayta. Chaypin repararqani imaynas chhayna runakuna machaytapas yachachiwarqanku chayta. Paykunaqa ima jinallañan sapa semana tukuyta suyaqku, chaypin nishuta machaqku.

Paykunamanta t’aqakuspan Jehová Diosta serviqkunawan amigota ruwarqani. Chay mosoq amigoykunaqa munaytan yanapawaqku, paykunapas tukuy sonqon munakuqku Jehová Diosta, tukuy atisqankutan kallpachakuqku paypa munayninman jina kausanankupaqpas. Paykunaq yanapayninwanmi machayta saqepurqani.

BENDICIONKUNA CHASKISQAY: Maytan Diosta “gracias” nini yanapawasqanmanta, kunanqa manan tragotaraqchu tomani kusisqa kanaypaqqa. Manachus Diosta tariyman karqan chayqa imachá noqamanta kanman karqan, maypichá kashayman karqan. Kunanqa thajmi, kusisqan kashani.

Qanchis watañan Eslovenia nacionpi kaq Jehová Diospa testigonkunamanta sucursalpi llank’ashani. Manapunin imapas Jehová Dios reqsiy jinaqa payta serviy jinaqa kanchu, chaywanqa sonqopas sonqon kausanki.