¿Sasa entiendeychu Biblia?

Gran Bretaña llaqtayoq Steven sutiyoq runan nin: “Familiaypiqa sapa domingon Bibliata leeq kayku. Yacharanin chay libro Diosmanta hamusqanta, chaywanpas manan gustawaqchu leey, pisillata entiendesqayrayku”, nispa.

España llaqtayoq Valvanera sutiyoq warmin nin: “17 wataypi kashaqtiymi Biblia leeyta qallarirani, mana entiendespaytaq saqepurani”, nispa.

Australia llaqtayoq Jo-Anne sutiyoq warmin nin: “‘Catolicakunaqa sapa p’unchaymi Bibliata leenayku’ nispaymi, kinsa watapi Biblia leeyta tukurani, ichaqa manan entienderanichu”, nispa.

MANAN ima libropas Biblia hinaqa askhanpiqa vendekuranchu, t’ikrakuranchu, nitaq imaymana sayayniyoq colorniyoqpas ruwakuranchu. Chhaynaña kaqtinpas, askha runakunan chayta leespa mana entiendenkuchu. ¿Chhaynapichu qanpas tarikunki?

¿Munanchu Dios Biblia entiendenanchista?

Biblian nin: “Diospa Simin Qelqakunaqa llapallanmi Diospa yuyaychasqan”, nispa (2 Timoteo 3:16). Chhaynaqa, ¿munanchu Dios yuyaychasqan qelqa entiendenanchista? Icha, ¿yachaysapakunallapaqchu, religionpi umalliqkunallapaqchu qelqachiran?

Chayta yachananchispaq kay textokunata qhawasun:

“Kay kamachikuy simiqa manan sinchi sasachu hunt’anaykichispaq, manataq karupipaschu kashan.” (Deuteronomio 30:11.)

“Simiykikuna sut’i willasqaqa runatan k’anchan, wawa hina sonqoyoqkunamanmi yuyayta qon.” (Salmo 119:130.)

“Chay kikin raton Jesusqa Santo Espirituq hunt’aykusqan kusikuywan nirqan: –Yayalláy, qanmi kanki hanaq pachapipas kay pachapipas munaychakuq. Kay yachaykunatan yachayniyoqkunamanta yuyayniyoqkunamantawan pakarqanki, huch’uykunamantaq sut’incharqanki, chaymantan yupaychayki, [nispa].” (Lucas 10:21.)

Chay textokuna nisqan hina, Diosqa munanmi Bibliaq yachachikuyninkuna entiendenanchista. Chhaynaqa, ¿iman yanapanman tukuy sonqowan leeshaspapas mana entiendeqkunata? Qatiqnin paginakunapin chaymanta yachasun.